AKP ភ្នំពេញ ថ្ងៃទី១៥ ខែតុលា ឆ្នាំ២០២៥ --
ឯកឧត្តម ឧត្តមសេនីយ៍ឯក នាក់ យុទ្ធា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានប្រតិភូបានជម្រាបជូនឱ្យដឹងមុនចាកចេញពីកម្ពុជាថា  តបតាមការអញ្ជើគណៈកម្មាធិការកណ្តាលត្រួតពិនិត្យគ្រឿងញៀន មីយ៉ាន់ម៉ា (CCDAC) កម្ពុជា បានចាត់បញ្ជូនមន្ត្រីជាន់ខ្ពស់កម្ពុជាចំនួន១៣រូប ដើម្បីចូលរួមកិច្ចប្រជុំប្រចាំឆ្នាំរបស់គណៈកម្មាធិការមន្ត្រីជាន់ខ្ពស់នៃប្រទេសហត្ថលេខី នៃអនុស្សរណៈយោគយល់គ្នា ស្តីពីបញ្ហាគ្រឿងញៀននៅក្នុងមហាអនុតំបន់ទន្លេមេគង្គ (MOU) ដែលនឹងប្រព្រឹត្តទៅនៅថ្ងៃទី១៦-១៧ ខែតុលា ឆ្នាំ២០២៥ នៅទីក្រុងYangon នៃសាធារណរដ្ឋសហព័ន្ធមីយ៉ាន់ម៉ា។ 

ក្នុងឱកាសនោះ ឯកឧត្តម ឧត្តមសេនីយ៍ឯក នាក់ យុទ្ធា បានបញ្ជាក់ថា កិច្ចប្រជុំលើកនេះគឺរៀបចំឡើងដើម្បីពិនិត្យលើវឌ្ឍនភាពការងារសំខាន់ដែលបានសម្រេចក្នុងកិច្ចប្រជុំកាលពីឆ្នាំ២០២៤ កន្លងទៅនៅទីក្រុងវៀងច័ន្ទ ប្រទេសឡាវ មានដូចជា: 
១. ស្ថានភាពគ្រឿងញៀននៅក្នុងតំបន់ ក្នុងពេលបច្ចុប្បន្ន ២.ការអនុវត្តផែនការសកម្មភាព អនុតំបន់ XII ៣.លទ្ធផលកិច្ចប្រជុំ លើកទី៦៨ របស់គណៈកម្មាធិការគ្រឿងញៀនអង្គការសហប្រជាជាតិ ៤.ការអនុវត្តផែនការសកម្មភាព នៃក្រុមការងារទាំងបីដែលបានបង្កើត កន្លងមក គឺ ក្រុមការងារ អប់រំបង្ការ ក្រុមការងារត្រួតពិនិត្យសារធាតុគីមីផ្សំ និងក្រុមការងារវិភាគនិងកោសល្យវិច្ច័យគ្រឿងញៀន
៥.ការពិនិត្យ ពិភាក្សា និងស្នើសុំការអនុម័តលើ ផែនការសកម្មភាពអនុតំបន់ ១៣ (SAP XIII) និង
៦.ទិសដៅ និងកិច្ចការសហការបន្ត ។
ថ្លែងក្នុងនាម ឯកឧត្តម នាយឧត្តមសេនីយ៍ មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន ឯកឧត្តមឧត្តមសេនីយ៍ឯក នាក់ យុទ្ធា បានថ្លែងអំណរគុណដល់ថ្នាក់ដឹកនាំក្រសួង ស្ថាប័ន ចំនួន៦ ដែល បានចាត់តំណាងដើម្បីចូលរួមជាមួយអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនចូលរួមកិច្ចប្រជុំលើកនេះ ហើយមន្ត្រីទាំងអស់នឹងចាកចេញពីកម្ពុជានៅល្ងាចថ្ងៃទី១៥ ខែតុលា និងត្រឡប់មកវិញនៅថ្ងៃទី១៩ ខែតុលា ឆ្នាំ២០២៥៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន