AKP ភ្នំពេញ ថ្ងៃទី១៥ ខែតុលា ឆ្នាំ២០២៥-- លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា បានថ្លែងថា ប្រព័ន្ធអេកូស៊ីសស្តែមអប់រំបែបឌីជីថលដែលបានដាក់ឱ្យដំណើរការនាពេលនេះ គឺជាសមិទ្ធផលថ្មីមួយទៀតក្នុងចំណោមសមិទ្ធផលជាច្រើន ដែលក្រសួងអប់រំ យុវជន និងកីឡាបានដាក់ចេញនូវផែនការយុទ្ធសាស្ត្រកំណែទម្រង់ ជាពិសេសគឺកំណែទម្រង់គ្រូបង្រៀនផ្សារភ្ជាប់ទៅនឹងការរីកចម្រើនផ្នែកបច្ចេកវិទ្យាឌីជីថល។ ការលើកឡើងរបស់លោកជំទាវបណ្ឌិត គឹម សេដ្ឋានី យ៉ាងដូច្នេះក្នុងពិធីសម្ពោធដាក់ដាក់ឱ្យដំណើរការប្រព័ន្ធអេកូស៊ីសស្តែមអប់រំបែបឌីជីថល នៅវិទ្យាស្ថានគរុកោសល្យរាជធានីភ្នំពេញ កាលពីរសៀលថ្ងៃទី១៤  ខែតុលា  ឆ្នាំ២០២៥។

លោកជំទាវបានឱ្យដឹងថា ការរៀបចំ និងការដាក់សម្ពោធឱ្យដំណើរការប្រព័ន្ធអេកូស៊ីសស្តែមអប់រំបែបឌីជីថលនៅវិទ្យាស្ថានគរុកោស្យរាជធានីភ្នំពេញនាពេលនេះ គឺជាលទ្ធផលនៃកិច្ចសហ្រតិបត្តិការរវាងក្រសួងអប់រំ យុវជន និងកីឡា និងក្រសួងប្រៃសណីយ៍ និងទូរគមនាគមន៍ ដោយបានលើកគម្រោងស្តីពីការបង្កើត និងប្រតិបត្តិការថ្នាលអប់រំដោយប្រើប្រាស់បច្ចេកវិទ្យាគមនាគមន៍ព័ត៍មាន និងប្រព័ន្ធផ្សព្វ ផ្សាយ។ គម្រោងនៃកិច្ចសហប្រតិបត្តិការនេះគឺដើម្បីធ្វើទំនើបកម្មកម្មវិធីអប់រំទាំងនៅកម្រិតចំណេះទូទៅ និងនៅគ្រឹះស្ថានបណ្ដុះបណ្ដាលគ្រូបង្រៀននៅកម្ពុជាឱ្យឆ្លើយតបទៅនឹងបរិវត្តកម្មឌីជីថល ស្របតាមយុទ្ធសាស្រ្តបញ្ចកោណដំណាក់កាលទី១ នៃរាជរដ្ឋាភិបាលកម្ពុជា នីតិកាលទី៧។

ក្នុងឱកាសនោះ លោកជំទាវបណ្ឌិត គឹម សេដ្ឋានី បានថ្លែងអំណរគុណយ៉ាងជ្រាលជ្រៅដល់ក្រសួងប្រៃសណីយ៍ និងទូរគមនាគមន៍ និងស្ថាប័នផ្សព្វផ្សាយអប់រំកម្ពុជា (EBC) ដែលបានផ្តល់ការសហការគាំទ្រយ៉ាងល្អជាមួយក្រសួងអប់រំ យុវជន និងកីឡា ក្នុងការអភិវឌ្ឍប្រព័ន្ធអប់រំឌីជីថលទាំងនៅកម្រិតមធ្យមសិក្សាចំណេះទូទៅ និងនៅកម្រិតគ្រឹះស្ថានបណ្ដុះបណ្ដាលគ្រូបង្រៀន ជាអាទ៍ដូចមាននៅវិទ្យាល័យហ៊ុនសែន សេរីភាព និងនៅគរុកោសល្យរាជធានីភ្នំពេញ ក្នុងការរួមចំណែកជាមួយរាជរដ្ឋាភិបាលក្នុងការអភិវឌ្ឍមូលធនដល់យុវជនជំនាន់ក្រោយសម្រាប់បន្តវេន និងជាសសរទ្រូងដ៏រឹងមាំសម្រាប់ប្រទេសជាតិ៕

ដោយ៖ ចាន់ សុភឿន (ប្រភព៖ ក្រសួងអប់រំ)