AKP កំពង់ចាម ថ្ងៃទី១៤ ខែតុលា ឆ្នាំ២០២៥-- លោក ខ្លូត ចិន្តា អភិបាលរងខេត្តកំពង់ចាម បានធ្វើការណែនាំដល់អាជ្ញាធរគ្រប់លំដាប់ក្នុងក្រុង ស្រុក ឃុំ សង្កាត់ និងអ្នកពាក់ព័ន្ធទាំងអស់ក្នុងខេត្តកំពង់ចាម ត្រូវបង្កើនការយកចិត្តទុកដាក់ខ្ពស់ ចំពោះការអប់រំផ្សព្វផ្សាយដល់ប្រជាពលរដ្ឋ ក្នុងមូលដ្ឋានរបស់ខ្លួន ពិសេស ម្ចាស់សណ្ឋាគារ ផ្ទះសំណាក់ ភោជនីដ្ឋាន មណ្ឌលកម្សាន្ត និងម្ចាស់ខារ៉ាអូខេ អំពីបញ្ហាគ្រឿងញៀន និងបំផុស ដល់ប្រជាពលរដ្ឋនៅក្នុង មូលដ្ឋានរបស់ឱ្យចូលរួមប្រើប្រាស់កម្មវិធី App No Drug ឱ្យបានគ្រប់ៗគ្នា ដើម្បីចូលរួមទាំងអស់គ្នា សហគមន៍គ្មានគ្រឿងញៀន ព្រោះការអនុវត្តនូវប្រព័ន្ធផ្តល់ព័ត៌មាន App No Drug អាចឱ្យបងប្អូនប្រជាពលរដ្ឋក្នុងខេត្តនិងទូទាំងប្រទេសអាចរាយការណ៍មកកាន់សមត្ថកិច្ចអំពីសកម្មភាពការចរាចរគ្រឿងញៀន ការសេពគ្រឿងញៀន និងអ្វីដែលពាក់ព័ន្ធនឹងគ្រឿងញៀន ដែលអាចឱ្យសមត្ថកិច្ច របស់យើងចុះទៅអន្តរាគមន៍បង្ក្រាបទាន់ពេលវេលា និងមានប្រសិទ្ធភាពបំផុត។

លោកអភិបាលរងលើកឡើងដូចនេះក្នុងក្នុងកិច្ចប្រជុំសាមញ្ញលើកទី១៧ អាណត្តិទី៤ របស់ក្រុមប្រឹក្សាខេត្ត ដែលរៀបចំនៅសាលប្រជុំសាលខេត្ត នាព្រឹកថ្ងៃទី១៤ ខែតុលា ឆ្នាំ២០២៥ នេះ ក្រោមអធិបតីភាព ជាមួយ ឯកឧត្តម ខ្លូត ផន ប្រធានក្រុមប្រឹក្សាខេត្ត ដោយមានការចូលរួមគ្រប់ភាគីពាក់ព័ន្ធទាំងអស់ក្នុងខេត្ត។

សូមបញ្ជាក់ថា កិច្ចប្រជុំសាមញ្ញលើកទី១៧ អាណត្តិទី៤ របស់ក្រុមប្រឹក្សាខេត្ត លើកយករបៀបវារៈចំនួន ៧ មកពិនិត្យ និងពិភាក្សា រួមមាន៖ ១-ពិនិត្យ និងអនុម័តសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី១៦ អាណត្តិ ទី៤ របស់ក្រុមប្រឹក្សាខេត្តកំពង់ចាម។ ២-ពិនិត្យ ពិភាក្សា និងអនុម័តសេចក្តីព្រាងរបាយការណ៍ស្ដីពី ការអនុវត្តការងារប្រចាំខែ កញ្ញា និងលើកទិសដៅប្រចាំខែតុលា ឆ្នាំ២០២៥ របស់រដ្ឋបាលខេត្តកំពង់ចាម។ ៣-ពិនិត្យ ពិភាក្សា និងអនុម័តសេចក្តីព្រាងផែនការសកម្មភាពរយៈពេល៣ខែ (តុលា វិច្ឆិកា ធ្នូ) ឆ្នាំ២០២៥ របស់រដ្ឋបាលខេត្តកំពង់ចាម។ ៤- ពិនិត្យ ពិភាក្សា និងអនុម័តសេចក្តីព្រាងប្រតិទិនសម្រាប់រៀបចំវេទិកាផ្សព្វផ្សាយ និង ពិគ្រោះយោបល់ របស់ក្រុមប្រឹក្សាខេត្តកំពង់ចាម លើកទី២ អាណត្តិទី៤ ឆ្នាំ២០២៥។៥-ពិនិត្យ ពិភាក្សា និងអនុម័តសេចក្ដីព្រាងសេចក្តីសម្រេចស្តីពីការសម្រួលប្រការ១  នៃសេចក្តីសម្រេចលេខ០៥១/២៤ ស.ស.រ ចុះថ្ងៃទី១៦ ខែសីហា ឆ្នាំ២០២៤ ស្តីពីការបង្កើតគណៈកម្មាធិការរៀបចំដែនដី និងនគរូបនីយកម្មខេត្តកំពង់ចាម។ ៦- ពិនិត្យ ពិភាក្សា និងអនុម័តសេចក្ដីព្រាងសេចក្ដីសម្រេចស្តីពី ការសម្រួលប្រការ១នៃសេចក្តីសម្រេចលេខ០៥២/២៤ ស.ស.រ ចុះថ្ងៃទី១៦ ខែសីហា ឆ្នាំ២០២៤ ស្តីពីការបង្កើតលេខាដ្ឋាន នៃគណៈកម្មាធិការរៀបចំដែនដី និងនគរូបនីយកម្មខេត្តកំពង់ចាម និងទី៧-បញ្ហាផ្សេងៗ៕

ដោយ ឆាយ ម៉ុត