AKP ភ្នំពេញ ថ្ងៃទី១៤ ខែតុលា ឆ្នាំ២០២៥ -- នាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយកាលពីថ្ងៃចន្ទថា លោកនឹងមិនចូលរួមកិច្ចប្រជុំកំពូលសន្តិភាពអន្តរជាតិ ស្តីពីតំបន់ហ្គាហ្សា នៅទីក្រុងស្សាមអ៊ែល-ស្សៀក របស់ប្រទេសអេហ្ស៊ីបនោះទេ។

សេចក្តីថ្លែងការណ៍មួយរបស់ការិយាល័យរបស់លោក ណេតាន់យ៉ាហ៊ូបាននិយាយថា លោកនាយករដ្ឋមន្ត្រីត្រូវបានអញ្ជើញដោយប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ឱ្យចូលរួមក្នុងកិច្ចប្រជុំកំពូលសន្តិភាពតំបន់ហ្គាហ្សា កាលពីថ្ងៃច័ន្ទនៅប្រទេសអេហ្ស៊ីប។

សេចក្តីថ្លែងការណ៍នោះបាននិយាយថា «នាយករដ្ឋមន្រ្តីអ៊ីស្រាអែលបានថ្លែងអំណរគុណដល់លោកប្រធានាធិបតី ត្រាំ សម្រាប់ការអញ្ជើញ ប៉ុន្តែលោកបាននិយាយថា លោកនឹងមិនអាចចូលរួមបានទេ ដោយសារតែព្រឹត្តិការណ៍នេះនៅជិតដល់ការចាប់ផ្តើមនៃថ្ងៃឈប់សម្រាក»។

លោក ណេតាន់យ៉ាហ៊ូ បានសម្តែងការដឹងគុណចំពោះលោក ត្រាំសម្រាប់កិច្ចខិតខំប្រឹងប្រែងរបស់លោកក្នុងការពង្រីករង្វង់សន្តិភាព។

ប្រធានាធិបតី​អេហ្ស៊ីប​ក៏​បាន​បញ្ជាក់​ដែរ​ថា លោក ណេតាន់យ៉ាហ៊ូ នឹង​មិន​ចូល​រួម​កិច្ច​ប្រជុំ​កំពូល​សន្តិភាព​នោះ​ទេ។

នៅពេលមុននេះ អេហ្ស៊ីបបាននិយាយថា លោក ណេតាន់យ៉ាហ៊ូ និងប្រធានាធិបតីប៉ាឡេស្ទីន លោក ម៉ាមូដ អាប់បាស់ (Mahmoud Abbas) នឹងចូលរួមកិច្ចប្រជុំកំពូលសន្តិភាពនោះ ដើម្បីពង្រឹងកិច្ចព្រមព្រៀងបទឈប់បាញ់ដើម្បីបញ្ឈប់សង្រ្គាមនៅតំបន់ហ្គាហ្សា និងបញ្ជាក់ពីការប្តេជ្ញាចិត្តរបស់ពួកគេចំពោះវា។

មេដឹកនាំពិភពលោកជាង ២០នាក់ត្រូវបានគេរំពឹងថានឹងចូលរួមកិច្ចប្រជុំកំពូលស្សាមអ៊ែល-ស្សៀក ដែលនឹងធ្វើជាសហប្រធានដោយលោក ត្រាំនិងប្រធានាធិបតីអេហ្ស៊ីប លោក អាប់ឌែល ហ្វាតតាហ៍ អាល់-ស៊ីស៊ី (Abdel Fattah al-Sisi)។

អេហ្ស៊ីបបាននិយាយថា កិច្ចប្រជុំកំពូលនេះមានគោលបំណងបញ្ចប់សង្រ្គាមនៅតំបន់ហ្គាហ្សាស្ទ្រីប បង្កើនកិច្ចខិតខំប្រឹងប្រែងដើម្បីនាំមកនូវសន្តិភាព និងស្ថិរភាពដល់តំបន់មជ្ឈិមបូព៌ា និងដឹកនាំដំណាក់កាលថ្មីនៃសន្តិសុខ និងស្ថិរភាពក្នុងតំបន់។

ដំណាក់កាលទីមួយនៃកិច្ចព្រមព្រៀងបទឈប់បាញ់នៅតំបន់ហ្គាហ្សាបានចូលជាធរមានកាលពីថ្ងៃសុក្រក្រោមផែនការរបស់លោក ត្រាំ ដើម្បីបញ្ចប់សង្រ្គាមអ៊ីស្រាអែលរយៈពេលពីរឆ្នាំនៅតំបន់ហ្គាហ្សា។

ចាប់តាំងពីខែតុលា ឆ្នាំ២០២៣ មក ការវាយប្រហាររបស់អ៊ីស្រាអែលបានសម្លាប់ជនជាតិប៉ាឡេស្ទីនជាង ៦៧.៨០០នាក់នៅតំបន់ហ្គាហ្សា ដែលភាគច្រើនជាស្ត្រី និងកុមារ ដែលបានបន្សល់ទុកតំបន់នេះស្ទើរតែគ្មានមនុស្សរស់នៅ៕

ដោយ៖ យា ចិន្តាខន្តី (ប្រភព៖ AA-AKP)