AKP ភ្នំពេញ ថ្ងៃទី១១ ខែតុលា ឆ្នាំ២០២៥ -- ឯកឧត្តម គី ច័ន្ទរំដួល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំ កិច្ចប្រជុំពិភាក្សា កំណត់គោលការណ៍ លក្ខខណ្ឌ និងផែនការសម្រាប់ត្រៀមបង្កើតសហគមន៍កសិកម្មទំនើបមៀនប៉ៃលិន ដោយមានការចូលរួមពីថ្នាក់ដឹកនាំ មន្ត្រីជំនាញមន្ទីរកសិកម្មខេត្តប៉ៃលិន មន្ត្រីកសិកម្មឃុំ និងកសិករមៀនប៉ៃលិន កាលពីថ្ងៃទី១០ ខែតុលា ឆ្នាំ២០២៥  នៅមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិន។

ឯកឧត្តម គី ច័ន្ទរំដួល បានមានប្រសាសន៍ថា គោលបំណងនៃកិច្ចប្រជុំពិភាក្សានេះ គឺដើម្បីប្រមូលបញ្ហាប្រឈមរបស់កសិករដាំដុះមៀនប៉ៃលិន រៀបចំផែនការផលិត ផែនការលក់ផ្លែមៀនស្រស់ និងការកែច្នៃផ្លែមៀនជាដំណាប់ មៀនកំប៉ុង មៀនចំណិតសម្រាប់ធ្វើជាភេសជ្ជៈ ធ្វើយ៉ាងណាឱ្យផ្លែមៀនដែលបានផលិតមកត្រូវបានប្រើប្រាស់អស់ ដោយគ្មានការបោះចោលដែលនាំឱ្យកសិករខាតបង់។ 

ជាលទ្ធផល កិច្ចពិភាក្សាបានឯកភាពគ្នានូវចំណុចមួយចំនួនរួមមាន ការពិនិត្យ កែសម្រួលកិច្ចសន្យា ទិញលក់ដែលកសិករបានធ្វើកន្លងមក ដោយកិច្ចសន្យាត្រូវមានភាគីពាក់ព័ន្ធចូលរួម (កសិករ អ្នកទិញ អ្នកបេះ និងមន្ទីរជំនាញ) ជាមួយគ្នានោះនៅក្នុងកិច្ចពិភាក្សានោះដែរ កសិករដាំដុះមៀនប៉ៃលិនទាំងអស់ មានការប្ដេជ្ញាចិត្តខ្ពស់ក្នុងការចូលរួមបង្កើតសហគមន៍កសិកម្មទំនើបមៀនប៉ៃលិននាថ្ងៃខាងមុខ៕

ដោយ៖ ពេជ្រ សំអឿន (ប្រភព៖ ក្រសួងកសិកម្ម រុក្ខាប្រមាញ់ និងនេសាទ)