AKP ភ្នំពេញ ថ្ងៃ១១  ខែតុលា  ឆ្នាំ២០២៥ -- ឯកឧត្តមបណ្ឌិត យ៉ង សាំងកុមារ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំបើកសិក្ខាសាលា ស្តីពី «ការត្រៀមសម្របសម្រួលទីផ្សារស្រូវផ្ការំដួល និងការផ្តល់សេវាកម្មកសិកម្មរួម (One Stop Service)»  ដល់មន្ត្រីកសិកម្មឃុំចំនួន ៥៧នាក់ នៅក្នុងខេត្តព្រះវិហារ កាលពីថ្ងៃទី១០ ខែតុលា ឆ្នាំ២០២៥ ដែលជាកម្មវិធីគាំទ្រដោយមូលនិធិសហប្រតិបត្តិការអន្តរជាតិអាល្លឺម៉ង់(GIZ)។

សិក្ខាសាលានេះមានការចូលរួមពីឯកឧត្តម ខាត់ សុធី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក ពឹង ទ្រីដា ប្រធានមន្ទីរកសិកម្មខេត្តព្រះវិហារ លោក ស៊ុន ទ្រី អនុប្រធាននាយកដ្ឋានផ្សព្វផ្សាយកសិកម្ម រុក្ខាប្រមាញ់ និងនេសាទ និងវិស័យឯកជនពាក់ព័ន្ធផងដែរក្នុងគោលបំណងផ្តល់ព័ត៌មានអំពីការផ្តួចផ្តើម ដើម្បីភាពប្រសើរឡើងនូវវិស័យស្រូវអង្ករកម្ពុជា (BRIC) ការផ្តល់សេវាកសិកម្មរួម និងកិច្ចសហការរវាងក្រសួងកសិកម្ម គំនិតផ្តួចផ្តើម BRIC និងសេវាកម្ម One Stop Service ផ្តល់ព័ត៌មានអំពីការកាត់បន្ថយការបំភាយឧស្ម័នកាបូនពីផលិតកម្មស្រូវ និងឱកាសដើម្បីទទួលបានឥណទានកាបូន (Carbon Credit) ព្រមទាំងប្រមូលមតិត្រឡប់ពីភាគីពាក់ព័ន្ធទាំងអស់។

ឯកឧត្តមបណ្ឌិត យ៉ង សាំងកុមារ បានគូសបញ្ជាក់ថា សេវាកម្ម One Stop Service គឺជាយន្តការសំខាន់នៃការកាត់បន្ថយថ្លៃដើមផលិត ឆ្ពោះទៅបង្កើនប្រាក់ចំណូលរបស់កសិករលើផលិតកម្មដំណាំស្រូវ។ ឯកឧត្តមបានជំរុញដល់មន្រ្តីកសិកម្មខេត្តព្រះវិហារឱ្យធ្វើការត្រៀមខ្លួនទៅលើការសម្របសម្រួលទីផ្សារស្រូវផ្ការំដួលនាខែវិច្ឆិកាខាងមុខនេះ និងការរៀបចំក្រុមកសិករដើម្បីងាយស្រួលទទួលបានកញ្ចប់សេវារួមតែមួយនៅរដូវបន្ទាប់ ដោយចាប់ផ្តើមពីសេវាច្រូតនៅក្នុងខែវិច្ឆិកា ការភ្ជួរលុបជញ្ជ្រាំងដែលចាប់ផ្តើមពីខែធ្នូ និងសេវាបន្តបន្ទាប់ទៀត។

ឯកឧត្តមបណ្ឌិត យ៉ង សាំងកុមារក៏ បានណែនាំដល់អ្នកពាក់ព័ន្ធក្នុងការអនុវត្តន៍គម្រោងទាំងអស់ត្រូវយកចិត្តទុកដាក់សហការឱ្យគម្រោងដើរត្រូវគ្នាជាមួយគោលនយោបាយរាជរដ្ឋាភិបាល ជាពិសេសក្នុងការសហការជាមួយមន្រ្តីកសិកម្មឃុំ បង្កើនគុណភាព និងប្រសិទ្ធភាពសេវាបម្រើកសិករជាដើម៕

ដោយ៖ ពេជ្រ សំអឿន ( ប្រភព៖ ក្រសួងកសិកម្ម រុក្ខាប្រមាញ់ និងនេសាទ )