AKP ភ្នំពេញ ថ្ងៃទី១១ ខែតុលា ឆ្នាំ២០២៥ -- វិទ្យាស្ថានសេដ្ឋកិច្ច និងហិរញ្ញវត្ថុ នៃក្រសួងសេដ្ឋកិច្ចនិងហិរញ្ញវត្ថុ បានសហការជាមួយរដ្ឋបាលសាលាខេត្តព្រៃវែង និងមន្ទីរសេដ្ឋកិច្ច និងហិរញ្ញវត្ថុខេត្ត បានរៀបចំកិច្ចប្រជុំពិភាក្សាលើការវាយតម្លៃអំពីប្រសិទ្ធភាពនៃការបណ្តុះបណ្តាល ស្តីពីការគ្រប់គ្រង ហិរញ្ញវត្ថុសាធារណៈសម្រាប់ជំនួយការហិរញ្ញវត្ថុរដ្ឋបាលឃុំ សង្កាត់ ឆ្នាំ២០២៣-២០២៤។

កិច្ចប្រជុំពិភាក្សាខាងលើនេះបានប្រព្រឹត្តទៅនៅថ្ងៃទី១០ ខែតុលា ឆ្នាំ២០២៥ នាសាលាខេត្តព្រៃវែង ក្រោមអធិបតីភាពរបស់ ឯកឧត្តម ហ៊ី ធួក អភិបាលរង នៃគណៈអភិបាលខេត្តព្រៃវែង លោក អៀង សុភ័ក្រ្ត  នាយករងវិទ្យាស្ថានសេដ្ឋកិច្ច និង ហិរញ្ញវត្ថុ លោកប្រធាននាយកដ្ឋាន លោកស្រីអនុប្រធានមន្ទីរសេដ្ឋកិច្ច និងហិរញ្ញវត្ថុ និងតំណាងរដ្ឋបាលខេត្ត ព្រមទាំងជំនួយការហិរញ្ញវត្ថុរដ្ឋបាលឃុំ សង្កាត់សរុបចំនួន ១១៦នាក់។

កិច្ចប្រជុំនេះមានគោលដៅពិនិត្យ ពិភាក្សា ដើម្បីប្រមូលរកធាតុចូល សម្រាប់ការកែលម្អកម្មវិធីសិក្សា និងដំណើរការអនុវត្តការបណ្តុះបណ្តាលឱ្យកាន់តែល្អប្រសើរបន្ថែមទៀត ព្រមទាំងស្វែងយល់ និងផ្ទៀងផ្ទាត់ពីការអនុវត្តតួនាទីភារកិច្ចរបស់ជំនួយការហិរញ្ញវត្ថុរដ្ឋបាលឃុំសង្កាត់ ក្រោយទទួលបានចំណេះដឹងពីការបណ្តុះបណ្តាលទាំងនោះ ដោយអនុលោមតាមខ្លឹមសារនៃប្រកាសអន្តរក្រសួង លេខ ០០២ សហវ.ប្រក ចុះថ្ងៃទី០៤ ខែមករា ឆ្នាំ២០២២ សំដៅគាំទ្រ និងអនុវត្តន៍ការកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ ឱ្យសម្រេចជោគជ័យ ប្រកបដោយប្រសិទ្ធភាព និងចីរភាព ៕

ដោយ: ទូច វលក័្ខណ (ប្រភព៖ វិទ្យាស្ថានសេដ្ឋកិច្ចនិងហិរញ្ញវត្ថុ)