AKP ព្រះសីហនុ ថ្ងៃទី១១ ខែតុលា ឆ្នាំ២០២៥ -- ព្រឹកថ្ងៃសៅរ៍ ទី១១ ខែតុលា ឆ្នាំ២០២៥ នេះ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ និងឯកឧត្តម ម៉ាង ស៊ីណេត អភិបាល នៃគណ:អភិបាលខេត្តព្រះសីហនុ អញ្ជើញចុះជួបសំណេះសំណាល និងពិសារអាហារសាមគ្គីជាមួយនិវត្តន៍ជនមកពីក្រុងស្រុកចំនួន៥  នៅទីបញ្ជាការតំបន់ប្រតិបត្តិការសឹករងព្រះសីហនុ។

លោកវរ:សេនីយត្រី នូវ សំអុល មេបញ្ជាការតំបន់ប្រតិបត្តិការសឹករងព្រះសីហនុ និងជាប្រធានគណ:កម្មាធិការសមាគមន៍អតីតយុទ្ធជនកម្ពុជាខេត្តព្រះសីហនុ បានស្វាគមន៍ចំពោះពិធីសំណេះសំណាល និងអាហារសាមគ្គីជាមួយនិវត្តន៍ជនក្នុងខេត្តព្រះសីហនុចំនួន ៦៦គ្រួសារ មកពីក្រុង ស្រុកចំនួន៥ ក្នុងខេត្តព្រះសីហនុ ដោយក្នុងនោះ មកពីស្រុកកំពង់សិលា ០៩គ្រួសារ ស្រុកស្ទឹងហាវ ០៥គ្រួសារ ក្រុងកំពង់សោម ០៩គ្រួសារ ស្រុកព្រៃនប់ ១២គ្រួសារ  និងក្រុងព្រះសីហនុ ៣១គ្រួសារ។ ក្នុងចំណោមនិវត្តន៍ជនទាំង ៦៦គ្រួសារនោះ និវត្តន៍ជនដែលអត់មាមដី អត់មានផ្ទះមានចំនួន ៦០គ្រួសារ និងនិវត្តន៍ជនដែលមានដី និងផ្ទះទ្រុឌទ្រោមមានចំនួន ០៦គ្រួសារ។

លោកប្រធានគណ:កម្មាធិការសមាគមអតីតយុទ្ធជនកម្ពុជាខេត្តព្រះសីហនុ បានបន្តថា កាលពីឆ្នាំ២០១៤ អតីតយុទ្ធជនចំនួន ៨០គ្រួសារបានធ្វើការចាប់ឆ្នោតយកដីចំការ ១ហិកតា ចំណែកអតីតយុទ្ធជន ១០២គ្រួសារទទួលបានដីឡូ ៣០ x ៤០ម៉ែត្រ និងដីចំការ ១ហិកតា និងឆ្នាំ២០២៤ សម្តេចតេជោ ហ៊ុន សែន ប្រធានសមាគមន៍អតីតយុទ្ធជនកម្ពុជា និងសម្តេចធិបតី ហ៊ុន ម៉ាណែត ជាអនុប្រធាន តាមរយ: ឯកឧត្តម គន់ គីម សម្តេចជួយសាងសង់ផ្ទះជូនអតីតយុទ្ធជនខេត្តព្រះសីហនុចំនួន ៥១ខ្នង ក៏ប៉ុន្តែនៅឆ្នាំ២០២៤ យើងសាងសង់បានចំនួន ២០ខ្នង បានធ្វើការប្រគល់ជូនអតីតយុទ្ធជនយើងរួចហើយ និងនៅសល់ ៣១ខ្នងផ្ទះទៀត ក្រុមជាងបានតំឡើងគ្រោងបញ្ឈរបាន ១៦ខ្នង និងសល់ ១៥ខ្នងទៀតបានផ្សារដែករួចហើយ រង់ចាំអាកាសធាតុរាំងនឹងចាប់ផ្តើមដំណើរការតំឡើងបន្ត ។

ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ បានមានប្រសាសន៍សំណេះសំណាលជាមួយបងប្អូនអតីតយុទ្ធជនដោយគូសបញ្ជាក់ថា ថ្ងៃនេះដោយទទួលបានការណែនាំពីសម្តេចតេជោ ហ៊ុន សែន ប្រធានគណ:កម្មាធិការសមាគមន៍អតីតយុទ្ធជនកម្ពុជា និងសម្តេចធិបតី ហ៊ុន ម៉ាណែត អនុប្រធានគណ:កម្មាធិការសមាគមន៍អតីតយុទ្ធជន និងក្នុងនាមខ្ញុំជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ ចង់ដឹងអំពីសុខទុក្ខ និងជីវភាពរស់នៅរបស់ពុកម៉ែទាំងអស់គ្នា និងសុំឱ្យបញ្ចេញមតិ យោបល់អំពីកង្វល់របស់ពុក ម៉ែ ពូ មីង ប្រសិនបើពុក ម៉ែ ពូ មីង បងប្អូនមានដី ក៏ប៉ុន្តែខ្វះថវិកាសាងសង់ផ្ទះ ឬខ្វះដី ខ្វះផ្ទះស្នាក់នៅពិតប្រាកដ យើងជួបគ្នាព្យាយាមរកវិធានការថ្មីចូលរួមដោះស្រាយជូនពុក ម៉ែ ពូ មីងទាំងអស់គ្នា ព្រោះពុក ម៉ែបានលះបង់កម្លាំងកាយ ចិត្ត សាច់ស្រស់ ឈាមស្រស់ក្នុងបុព្វហេតុការពារជាតិ ការពារទឹកដីរបស់កម្ពុជា ឈានដល់កម្ពុជាទទួលបានសុខសន្តិភាពពេញផ្ទៃក្នុងប្រទេស។ សម្រាប់ខេត្តព្រះសីហនុ យើងបានត្រៀមដីសម្បទាសង្គមកិច្ច សម្រាប់ធ្វើការដោះស្រាយជូនអតីតយុទ្ធជន ក៏ដូចជានិវត្តន៍ជនរបស់យើង ប្រសិនបើមិនមានដី និងផ្ទះស្នាក់នៅពិតប្រាកដ យើងរួមគ្នាព្យាយាមដោះស្រាយជូនពុក ម៉ែ ពូ មីង ដូច្នេះពុក ម៉ែ ត្រូវសហការជាមួយលោកប្រធានគណ:កម្មាធិការសមាគមន៍អតីតយុទ្ធជន ក៏ដូចជានិវត្តន៍ជន ព្រោះរាជរដ្ឋាភិបាលកម្ពជាបាននិងកំពុងយកចិត្តទុកដាក់ចំពោះអតីតយុទ្ធជន និងនិវត្តន៍ជនរបស់យើងនៅទូទាំងប្រទេសដោយមិនទុកឱ្យយុទ្ធជន និងនិវត្តន៍ជនរបស់យើងខ្វះខាតជម្រកស្នាក់នៅដោយមិនបានគិតគូរនោះទេ៕

ដោយ: ងូ សុមុនី