AKP កំពង់ធំ ថ្ងៃទី០៥ ខែតុលា ឆ្នាំ២០២៥ -- ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ បានអំពាវនាវដល់សហគ្រាសធំតូច និងមធ្យមផ្នែកចំណីអាហារ សូមឱ្យមានអនាម័យ និងគុណភាពស្របតាមស្តង់ដារអន្តរជាតិ។ អភិបាលខេត្តកំពង់ធំបានមានប្រសាសន៍ដូចនេះក្នុងឱកាសដែលឯកឧត្តម និងឧកញ៉ា តែ តាំងប៉ ប្រធានក្រុមប្រឹក្សាភិបាលសម្ព័ន្ធសមាគមសហគ្រាសធុនតូច និងមធ្យមកម្ពុជា និងជាប្រធានក្រុមប្រឹក្សាភិបាលសមាគមមូលនិធិសម្តេចតេជោដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា អញ្ជើញជាអធិបតីក្នុងពិធីបើកសិក្ខាសាលាស្តីពី “ប្រព័ន្ធគ្រប់គ្រងគុណភាពចំណីអាហារសម្រាប់សហគ្រាសធុនតូច និងមធ្យម” ក្នុងគោលបំណងអភិវឌ្ឍន៍សហគ្រាសធុនតូច និងមធ្យមផ្នែកចំណីអាហារឱ្យកាន់តែមានស្តង់ដារ និងមានការប្រកួតប្រជែងជាសកល កាលពីថ្ងៃទី១០ ខែតុលា ឆ្នាំ២០២៥ នៅសាលប្រជុំប្រាសាទតោ។

ឯកឧត្តម នួន ផារ័ត្ន បានបញ្ជាក់ថា សហគ្រាសធុនតូច និងមធ្យម (SMEs) គឺជាកម្លាំងជំរុញដល់កំណើនសេដ្ឋកិច្ចសម្រាប់បណ្តាប្រទេសដែលមានសេដ្ឋកិច្ចកំពុងរីកលូតលាស់ដូចជាប្រទេសកម្ពុជាយើង និងបានដើរតួនាទីយ៉ាងសំខាន់នៅក្នុងការបង្កើតការងារ បង្កើតប្រាក់ចំណូលសម្រាប់ប្រជាជនដែលមានប្រាក់ចំណូលទាប និងងាយរងគ្រោះ ជំរុញកំណើនសេដ្ឋកិច្ចស្ថេរភាពសង្គម និងរួមចំណែកដល់ការរីកចម្រើននៃវិស័យឯកជនយ៉ាងខ្លាំង។

ឯកឧត្តម នួន ផារ័ត្ន បញ្ជាក់ទៀតថា ខេត្តកំពង់ធំ មានសហគ្រាសធុនតូច និងមធ្យមភាគច្រើនស្ថិតនៅក្នុងវិស័យកសិកម្ម និងសិប្បកម្មបាននឹងកំពុងពង្រឹងសមត្ថភាពការផលិតកម្មរបស់ខ្លួនឱ្យក្លាយទៅជាសហគ្រាសធុនធំស្របតាមគោលនយោបាយរបស់រាជរដ្ឋាភិបាល ជាពិសេសពង្រឹងសមត្ថភាពរបស់ខ្លួនក្នុងការអភិវឌ្ឍការងារធុរកិច្ចឱ្យកាន់តែរីកចម្រើនថែមទៀត។

ឧកញ៉ា តែ តាំងប៉ បានថ្លែងបញ្ជាក់ថា សម្ព័ន្ធសមាគមសហគ្រាសធុនតូច និងមធ្យមកម្ពុជា បានបង្កើតឡើង និងចុះបញ្ជីអនុញ្ញាតពីក្រសួងមហាផ្ទៃឆ្នាំ២០១០ ហើយបានតម្កល់ទុកលក្ខន្តិកនៅក្រសួងពាណិជ្ជកម្មឆ្នាំ២០១១។ សម្ព័ន្ធសមាគមសហគ្រាសធុនតូច និងមធ្យមកម្ពុជា គឺជាស្ថាប័នអព្យាក្រឹត្យ មិនមែនរដ្ឋាភិបាល មិនប្រកាន់ពូជសាសន៍ សាសនា និងនិន្នាការនយោបាយ និងមិនធ្វើជាឧបករណ៍របស់គណបក្សនយោបាយណាមួយឡើយ ដោយក្នុងនោះរួមទាំងមិនផ្តល់ជាមធ្យោបាយ សម្ភារៈហិរញ្ញវត្ថុ ធនធានមនុស្សដើម្បីគាំទ្របេក្ខជន ឬធ្វើជាអ្នកគាំទ្រគណបក្សនយោបាយណាមួយដែរ៕

 ដោយ: ស៊ុម វណ្ណា