AKP ព្រះសីហនុ ថ្ងៃទី១០ ខែតុលា ឆ្នាំ២០២៥-- រាជរដ្ឋាភិបាលប្រទេសអូស្ត្រាលីជួយកម្ពុជាជាច្រើន ដូចជា វិស័យដោះមីន អប់រំ សុខាភិបាល គណនេយ្យភាពសង្គម និងវិស័យមួយចំនួនទៀតដល់កម្ពុជា។ នេះជាការលើកឡើងរបស់ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ ក្នុងឱកាសដែលឯកឧត្តមទទួលជំនួបសម្តែងការគួរសមជាមួយ លោកវរនាវីទោ DEAN UREN មេបញ្ជាការនាវា HMAS Ballarat នៃកងទ័ពជើងទឹកអូស្ត្រាលី បានដឹកនាំនាវាចូលសំចតធ្វើទស្សនកិច្ចនៅខេត្តព្រះសីហនុ រយៈពេល៤ថ្ងៃ គឺចាប់ពីថ្ងៃទី១០ ដល់ថ្ងៃទី១៣ ខែតុលា ឆ្នាំ២០២៥ ដោយកិច្ចប្រជុំនេះបានរៀបចំនៅសាលាខេត្តព្រះសីហនុ នារសៀលថ្ងៃសុក្រ ទី១០ ខែតុលា ឆ្នាំ២០២៥។

ឯកឧត្តម ម៉ាង ស៊ីណេត អភិបាលខេត្តព្រះសីហនុ បានស្វាគមន៍ការមកដល់របស់នាវាកងទ័ពជើងទឹកអូស្ត្រាលី និងនាវិកទាំងអស់នៅលើទឹកដីតំបន់ឆ្នេរនៃខេត្តព្រះសីហនុ ដែលមានសក្តានុពលខ្ពស់ស្ថិតនៅទិសនិរតីនៃប្រទេសកម្ពុជា ដែលមាន៦ក្រុង/ស្រុក ២៩ឃុំ/សង្កាត់ ដែលសម្បូរទៅដោយធនធានធម្មជាតិ មានកោះ៣២ មានឧទ្យានជាតិលើគោក បាតសមុទ្រ និងជីវ:ចម្រុះបាតសមុទ្រ ជាប្រភពការអភិវឌ្ឍសេដ្ឋកិច្ច ឧស្សាហកម្ម និងទេសចរណ៍។ ខេត្តព្រះសីហនុ ជាខេត្តតំបន់ស្នូលនៃខេត្តតំបន់ឆ្នេរនៃប្រទេសកម្ពុជា ត្រូវបានបញ្ចូលជាសមជិកក្លឹបឆ្នេរស្អាតលើពិភពលោកនៅប្រទេសហ្សេនេកាលកាលពីឆ្នាំ២០១១ ទាក់ទាញភ្ញៀវទេសចរមកសម្រាកកម្សាន្ត។ ក្រៅពីសក្តានុពល ខេត្តព្រះសីហនុមានផ្លូវគមនាគមន៍ដូចជា ផ្លូវគោក ផ្លូវទឹក និងផ្លូវអាកាស។ ផ្លូវទឹកមានកំពង់ផែអន្តរជាតិចំនួន៣ កំពង់ផែកែវផុស ស្ទឹងហាវ និងកំពង់ផែស្វយ័តក្រុងព្រះសីហនុ។ ដោយឡែកកំពង់ផែស្វយ័តក្រុងព្រះសីហនុត្រូវបានធ្វើការអភិវឌ្ឍជា ៣តំណាក់កាលពីឆ្នាំ២០២៤ ដល់២០៣០ មានជម្រៅទឹករហូត១៧.៥០ម៉ែត្រ យើងអាចនិយាយបានថា នាវាដែលធ្វើចរាចរនៅលើពិភពលោកអាចចូលចតបាន។ ផ្លូវគោកមានផ្លូវជាតិលេខ៣ លេខ៤ តភ្ជាប់ទៅកាន់បណ្តាខេត្តនៅក្នុងព្រះរាជាណាចក្រកម្ពុជា ផ្លូវល្បឿនលៀន និងផ្លូវដែក។ ផ្លូវអាកាស ព្រលានយន្តហោះអន្តរជាតិមានផ្លូវរត់ ៣ ៣០០ម៉ែត្រ តភ្ជាប់ទៅកាន់តំបន់ផ្សេងៗនៅលើពិភពលោក។ រាជរដ្ឋាភិបាលបានរៀបចំផែនការមេអភិវឌ្ឍន៍ខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង  ចែកចេញជា ៤ហ្សូនធំៗ៖ ១. តំបន់ដឹកជញ្ជូន និងឧស្សាហកម្ម ២. ទីក្រុងសមាហរណកម្ម ៣. តំបន់កោះ (អភិវឌ្ឍទេសចរណ៍បែបធម្មជាតិ) ៤. កសិកម្ម និងឧស្សាហកម្ម។ រដ្ឋាភិបាលបានរៀបចំកសាងហេដ្ឋារចនាសម្ព័ន្ធផ្លូវក្នុងក្រុង ៣៧ខ្សែ កសាងបន្ទប់ទឹកសាធារណនៅតាមបណ្តោយឆ្នេរ រូបសំណាក បង្ហាញពីវប្បធម៌ និងអរិយធម៌។ កាលពីឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានដាក់ចេញកម្មវិធីពិសេសជំរុញការវិនិយគខេត្តព្រះសីហនុ៖ ១. ជួយសម្របសម្រួលឯកសារ ២.លើកទឹកចិត្តផ្នែកពន្ធ ក្រុមហ៊ុនអាចទទួលការរួចពន្ធពី៣ ទៅ ៥ឆ្នាំ ហើយកម្មវិធីពិសេសនេះមានតែខេត្តព្រះសីហនុមួយប៉ុណ្ណោះ។ ខេត្តព្រះសីហនុមានតំបន់សេដ្ឋកិច្ចពិសេសចំនួន៥ មានរោងចក្រចំនួន៣០០ ផ្តល់ការងារជូនប្រជាពលរដ្ឋ៥ ទៅ៦ម៉ឺននាក់។

ឯកឧត្តមអភិបាលខេត្តបានបន្តថា សូមអបអរសាទរខួបទី៧៣ នៃទំនាក់ទំនងកាទូតរវាងប្រទេសទាំងពីរ ក្នុងនាមរដ្ឋបាលខេត្ត ប្រជាពលរដ្ឋខេត្តព្រះសីហនុ រដ្ឋាភិបាល អូស្ត្រាលីបានជួយរកសន្តិភាពជូនកម្ពុជា ជាក់ស្តែងឆ្នាំ១៩៩០ បង្កើត អ៊ុនតាក់ ការកាត់ក្តីខ្មែរក្រហម និងផ្តល់អាហារូបករណ៍ដល់និស្សិតខ្មែរ ជួយវិស័យដោះមីន អប់រំ សុខាភិបាល គណនេយ្យភាពសង្គម និងវិស័យមួយចំនួនទៀតផងដែរ។

លោកវរនាវីទោ DEAN UREN មេបញ្ជាការនាវា HMAS Ballarat នៃកងទ័ពជើងទឹកអូស្ត្រាលី បានបញ្ជាក់ថា  នាវា HMAS Ballarat ជាប្រភេទនាវាពិឃាត ជានាវាជំនួយមនុស្សធម៌ រៀងរាល់ខែ៩ ដល់ខែ១០ នាវាចេញដំណើរក្នុងគោលបំណងធ្វើការងារជាមួយប្រទេសដៃគូ ដើម្បីពង្រឹងសន្តិភាព ហើយគោលបំណងមួយទៀត ជាផ្នែកមួយនៃកិច្ចខិតខំប្រឹងប្រែងតំបន់ឥណ្ឌូប៉ាស៊ីហ្វិក ការកសាងមិត្តភាពដែលមានស្រាប់ ការផ្លាស់ប្តូរបទពិសោធន៍រវាងកងទ័ពជើងទឹកកម្ពុជា ដើម្បីធ្វើឱ្យមានទំនាក់ទំនងការទូតរវាងប្រទេសអូស្ត្រាលីជាង ៧៣ឆ្នាំ មានទំនាក់ទំនងល្អ ក្នុងការពង្រឹងទំនាក់ទំនងមនុស្ស និងមនុស្ស ហើយនាវិករបស់យើងនឹងធ្វើការងារជាមួយកងទ័ពជើងទឹកមូលដ្ឋានសមុទ្ររាម ក្នុងសកម្មភាពកិច្ចសហប្រតិបត្តិការយើងមានកម្មវិធីឡេងកីឡា បង្រៀនភាសារអង់គ្លេស និងនីតិវិធីក្នុងការឡើងលើនាវា ដើម្បីឆែកឆេររកអ្វីមួយ ហើយសកម្មភាពទាំង៣ ក្នុងការពង្រឹងពង្រីកការផ្លាស់ប្តូមនុស្ស និងមនុស្ស និងការផ្លាស់ប្តូរបទពិសោធន៍រវាងកងទ័ពជើងទឹកប្រទេសទាំងពីរ។ ក្រៅពីទំនាក់ទំនងទាហាន និងទាហាន នាវិករបស់យើងកំពង់រង់ចាំធ្វើទស្សនកិច្ចនៅលើទឹកដីតំបន់ឆ្នេរនៃខេត្តព្រះសីហនុ ហើយរៀងធំមួយទៀតនាវិករបស់យើងមានឱកាសធ្វើទស្សនកិច្ចចេញទៅក្រៅប្រទេសទៅកាន់លើពិភពលោក៕

ដោយ ងូ សុមុនី