AKP ព្រះសីហនុ ថ្ងៃទី១០ ខែតុលា ឆ្នាំ២០២៥-- ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ បានអញ្ជើញប្រកាសសមាភាពក្រុមការងារចុះមូលដ្ឋានក្រុងកំពង់សោម និងក្រុមការងារគណបក្សក្រុងព្រះសីហនុ ខេត្តព្រះសីហនុ នាព្រឹកថ្ងៃសុក្រ ទី១០ ខែតុលា ឆ្នាំ២០២៥។

តាមសេចក្តីសម្រេចស្តីពីការចាត់តាំងសមាសភាពក្រុមការងាររាជរដ្ឋាភិបាលចុះមូលដ្ឋានក្រុងកំពង់សោម លេខ០១៣-សសរ.រា.ពសន សម្រេចឯកឧត្តម ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានក្រុងកំពង់សោម និងសមាសភាពជាច្រើនរូបទៀត និងសេចក្តីសម្រេចស្តីពីការចាត់តាំងសមាភាពក្រុមការងារគណបក្សចុះមូលដ្ឋានក្រុងកំពង់សោម ខេត្តព្រះ សីហនុ លេខ០០៩ សសរ .ប.ពសន ឯកឧត្តម សុខ លក្យាណ ជាប្រធានក្រុមការងារគណបក្សចុះមូលដ្នានក្រុងកំពង់សោម និងមានសមាសភាពជាច្រើនរូបផ្សេងទៀត។

ឯកឧត្តម សាយ សំអាល់ ឧបនាយករដ្ឋមន្ត្រី បានថ្លែងថា ថ្ងៃនេះយើងបានចូលរួមប្រកាសសមាសភាពក្រុមការងាររាជរដ្ឋាភិបាលចុះមូលដ្ឋានក្រុងកំពង់សោម និងក្រុមការងារគណបក្សក្រុងកំពង់សោម ខេត្តព្រះសីហនុនាពេលនេះ ព្រមទាំងបានថ្លែងអំណគុណចំពោះសមាជិក សមាជិកាដែលបានចូលរួម ហើយយើងមានកិច្ចការងារមួយចំនួនទៀតដែលយើងត្រូវធ្វើបន្ត ១. ការគ្រប់គ្រងសមាជិកឱ្យបានល្អខ្ជាប់ខ្ជួន ២. សមាជិក សមាជិកានៅក្នុងមូលដ្ឋានដើរតាមមាគ៌ាដឹកនាំរបស់គណបក្សប្រជាជនកម្ពុជា ក្នុងការចូលរួមចំណែកកសាង និងអភិវឌ្ឍប្រទេសជាតិ ឈានទៅសម្រេចចក្ខុវិស័យជាប្រទេសដែលមានចំណូលខ្ពស់នៅឆ្នាំ២០៥០ ៣. ការងាររដ្ឋបាលសាធារណៈ ក្នុងនាមយើងជាអ្នកដឹកនាំ តើយើងត្រូវធ្វើអ្វីខ្លះលើគ្រប់វិស័យក្នុងដែនសមត្ថ កិច្ចរបស់យើង។

ទន្ទឹមនោះ ឯកឧត្តម សាយ សំអាល់ ក៏បានធ្វើការណែនាំដល់ប្រធានក្រុមការងារចុះមូលដ្ឋាន ក៏ដូចក្រុមការងារគណបក្សចុះមូលដ្ឋានក្រុងកំពង់សោម ជាពិសេសអាជ្ញាធរក្រុង សង្កាត់ទាំង៥ ត្រូវយកចិត្តទុកដាក់អនុវត្តគោលនយោបាយភូមិ ឃុំ សង្កាត់មានសុវត្ថិភាព ទាំង៧ ចំណុចរបស់រាជរដ្ឋាភិបាលកម្ពុជា ដោយផ្តោតសំខាន់ធ្វើយ៉ាងណាឪ្យភូមិ ឃុំ សង្កាត់មានសុវត្ថិភាព ដោយផ្តោតសំខាន់ ដើម្បីធានាសន្តិសុខ សុវត្ថិភាព ដល់អ្នកវិនិយោគ និងភ្ញៀវទេសចរណ៍ និងការរស់នៅប្រកបដោយសុខស្រួលរបស់ប្រជាជនក្នុងខេត្ត។

គណ:បញ្ជាការឯកភាពរដ្ឋបាលក្រុង អនុវត្តយ៉ាងសកម្មប្រកបដោយស្មារតីទទួលខុសត្រូវចំពោះគោលនយោបាយ និងគោលការណ៍នានារបស់រាជរដ្ឋាភិបាល ក្នុងការចូលរួមថែរក្សាការពារបានយ៉ាងរឹងមាំនូវសន្តិភាព អធិបតីជាតិ បូរណភាពទឹកដី ស្ថិរភាពនយោបាយ សន្តិសុខ សុវត្ថិភាពសង្គម សណ្តាប់ធ្នាប់សាធារណ និងយកចិត្តទុកដាក់ ជំរុញជាប់ជាប្រចាំនូវការអនុវត្តគោលនយោបាយភូមិ ឃុំ សង្កាត់មានសុវត្ថិភាព ព្រមទាំងបេជ្ញាប្រយុទ្ធប្រឆាំងជាមួយឧក្រិដ្ឋជនជួញដូរមនុស្ស ជួញដូរគ្រឿងញៀន ជួញដូរអាវុធ បង្ខាំងអាវុធ បង្ខាំងមនុស្ស និងបទល្មើសផ្សេងៗទៀតឪ្យកាន់តែមានប្រសិទ្ធភាព ប្រសិទ្ធផលខ្ពស់៕

ដោយ ងូ សុមុនី