AKP កំពង់ធំ ថ្ងៃទី១០ ខែតុលា ឆ្នាំ២០២៥-- លោក អ៊ុង វុទ្ធី អភិបាលរងខេត្តកំពង់ធំ បានជំរុញលើកទឹកចិត្តដល់មន្ត្រីសុខាភិបាលត្រូវបង្កើនគុណភាពប្រសិទ្ធភាព និងការផ្ដល់សេវាជូនប្រជាពលរដ្ឋប្រកបដោយក្រមសីលធម៌វិជ្ជាជីវៈ ក្នុងឱកាសជួបសំណេះសំណាលសួរសុខទុក្ខមន្ត្រីសុខាភិបាលនៃមន្ទីរពេទ្យបង្អែកស្ទោង ប្រធានមណ្ឌលសុខភាព ព្រមទាំងអ្នកជំងឺដែលកំពុងសម្រាប់ព្យាបាលនៅមន្ទីរពេទ្យបង្អែកស្ទោង នាព្រឹកថ្ងៃទី១០ ខែតុលា ឆ្នាំ២០២៥។

លោក អ៊ុង វុទ្ធី បានមានប្រសាសន៍ថា ការគោរព និងអនុវត្តបាននូវក្រមសីលធម៌ និងព្យាបាលជំងឺជូនពុកម៉ែបងប្អូនប្រជាពលរដ្ឋនៅតាមមូលដ្ឋានជាពិសេសនៅតាមមណ្ឌលសុខភាពគឺជាការផ្ដល់សេវាដល់ជណ្ដើរផ្ទះពុកម៉ែបងប្អូនប្រជាពលរដ្ឋប្រកបដោយការទទួលខុសត្រូវក្នុងការផ្ដល់សេវាដោយឥតគិតថ្លៃដល់គ្រួសារពលីនិងគ្រួសារកងទ័ពដែលបានតស៊ូប្រយុទ្ធប្រឆាំងក្នុងការការពារជាតិមាតុភូមិពីការឈ្លានពានរបស់បច្ចាមិត្ត។

លោកបានជំរុញដល់គ្រូពេទ្យនៅមន្ទីរពេទ្យបង្អែកស្ទោង និងគ្រប់មណ្ឌលសុខភាពត្រូវចូលរួមអនុវត្តគោលនយោបាយរបស់រាជរដ្ឋាភិបាលយុទ្ធសាស្ត្រក្រសួងសុខាភិបាលក្នុងការទប់ស្កាត់ប្រយុទ្ធប្រឆាំងលុបបំបាត់ជំងឺគ្រុនឈាម ជំងឺគ្រុនចាញ់ឱ្យអស់ពីលទ្ធផលភាពសំដៅលើកកម្ពស់សុខុមាលភាពប្រជាពលរដ្ឋនិងចូលរួមកាត់បន្ថយភាពក្រីក្ររបស់ប្រជាពលរដ្ឋមូលដ្ឋាន និងបានកោតសរសើរខ្ពស់ដល់មន្ទីរពេទ្យបង្អែកស្ទោង ក៏ដូចជាគ្រប់មណ្ឌលសុខភាពដែលបានផ្ដល់សេវា និងបម្រើព្យាបាលជំងឺជូនបងប្អូនប្រជាពលរដ្ឋប្រកបដោយទំនួលខុសត្រូវខ្ពស់ ដែលទទួលបាននូវការគោរពកោតសរសើរពីគ្រប់មជ្ឈដ្ឋានកន្លងមក និងជំរុញឱ្យអនុវត្តកិច្ចការនេះកាន់តែប្រសើរឡើងថែមទៀត។

សូមបញ្ជាក់ថានៅក្នុងពិធីនេះមានការអញ្ជើញចូលរួមពីប្រធានមន្ទីរសុខាភិបាលខេត្ត ប្រធានមន្ទីរពេទ្យបង្អែកស្ទោង ប្រធានការិយាល័យស្រុកប្រតិបត្តិស្ទោង ប្រធានមណ្ឌលសុខភាពចំណុះឱ្យមន្ទីរពេទ្យបង្អែកស្ទោងគ្របដណ្ដប់លើឃុំទាំង១៣នៃស្រុកស្ទោង និង៥ឃុំនៃស្រុកប្រាសាទបល្ល័ង្គសរុប១៧០ភូមិ មានបុគ្គលិកសរុប១៨៧នាក់និងមានប្រជាជនសរុប១៥៨៣៥១នាក់៕ 

ដោយ ស៊ុម វណ្ណា