AKP ភ្នំពេញ ថ្ងៃទី០៩ ខែតុលា ឆ្នាំ២០២៥ -- ប្រទេសអ៊ូហ្គង់ដា និងសូម៉ាលីកាលពីថ្ងៃពុធ បានចុះហត្ថលេខាលើអនុស្សរណៈនៃការយោគយល់គ្នា(MoU) ថ្មីចំនួនបី ដើម្បីពង្រឹងកិច្ចសហប្រតិបត្តិការទ្វេភាគីក្នុងវិស័យសំខាន់ៗ។

កិច្ចព្រមព្រៀងត្រូវបានចុះហត្ថលេខានៅទីក្រុងកាមប៉ាឡា រដ្ឋធានីនៃប្រទេសអ៊ូហ្គង់ដា ក្នុងអំឡុងកិច្ចប្រជុំគណៈកម្មការអចិន្ត្រៃយ៍រួមលើកទី២ រវាងប្រទេសទាំងពីរដែលគ្របដណ្តប់លើវិស័យសន្តិសុខ ការអប់រំ និងកីឡាអន្តោប្រវេសន៍ និងកម្លាំងពលកម្ម។ ក្រុមមន្ត្រីបាននិយាយថា កិច្ចព្រមព្រៀងថ្មីនេះត្រូវបានគេរំពឹងថានឹងជំរុញពាណិជ្ជកម្មក្នុងតំបន់ ការចល័ត និងស្ថិរភាព។

យោងតាមមន្ត្រីរដ្ឋាភិបាលបានឱ្យដឹងថា អនុស្សរណៈយោគយល់គ្នានេះនឹងបង្កើតឱកាសថ្មីក្នុងវិស័យអប់រំ ការធ្វើចំណាកស្រុក និងពលកម្ម រួមជាមួយនឹងកិច្ចសហការនាពេលអនាគតក្នុងវិស័យសន្តិសុខ សុខភាព និងកិច្ចការជនភៀសខ្លួន។

កិច្ចព្រមព្រៀងមួយក្នុងចំណោមកិច្ចព្រមព្រៀងទាំងបីផ្តោតលើការការពារសិទ្ធិរបស់ពលរដ្ឋអ៊ូហ្គង់ដាដែលកំពុងធ្វើការនៅប្រទេសសូម៉ាលី និងបង្កើតផ្លូវការងារស្របច្បាប់សម្រាប់គ្រូបង្រៀន អ្នកជំនាញសុខភាព និងកម្មករជំនាញផ្សេងទៀត។ បច្ចុប្បន្ន​ប្រទេស​អ៊ូហ្គង់ដា​មាន​ពលរដ្ឋ​ជាង​២០.០០០​នាក់​ធ្វើការ​នៅ​ប្រទេស​សូម៉ាលី។

កិច្ចប្រជុំរយៈពេលពីរថ្ងៃត្រូវបានដឹកនាំដោយ លោក ចន មូលីមបា (John Mulimba) រដ្ឋមន្ត្រីក្រសួងការបរទេសនៃប្រទេសអ៊ូហ្គង់ដាទទួលបន្ទុកកិច្ចសហប្រតិបត្តិការក្នុងតំបន់ និងលោក ហ្វារ៉ាហ៍ សីខ៍ អាប់ឌុលកាដៀ (Farah Sheikh Abdulkadir) រដ្ឋមន្ត្រីក្រសួងអប់រំរបស់ប្រទេសសូម៉ាលី។

នៅក្នុងសេចក្តីថ្លែងការណ៍រួម រដ្ឋមន្ត្រីទាំងពីរបានកោតសរសើរចំពោះ«ទំនាក់ទំនងជាបងប្អូន» និងបានអះអាងជាថ្មីនូវការប្តេជ្ញាចិត្តរបស់ពួកគេក្នុងការពង្រឹងកិច្ចសហប្រតិបត្តិការលើវិស័យពាណិជ្ជកម្ម ការវិនិយោគ និងចលនាដោយសេរីរបស់ប្រជាជនដើម្បីលើកកម្ពស់ជីវភាពរស់នៅ៕

ដោយ៖ មូល មិនា (ប្រភព៖ ស៊ីនហួ)