AKP ភ្នំពេញ ថ្ងៃទី០៩ ខែតុលា ឆ្នាំ២០២៥ -- អង្គការសហប្រជាជាតិ (UN) បានអំពាវនាវឱ្យប្រទេសនានាចាប់យកឱកាសដែលបង្ហាញដោយផែនការស្តីពីបទឈប់បាញ់នៅតំបន់ហ្គាហ្សាស្ទ្រីប របស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ដើម្បីបញ្ចប់ជម្លោះដែលកំពុងតែបន្ត។ នេះបើយោងតាមអ្នកនាំពាក្យអង្គការសហប្រជាជាតិ លោក ស្តេហ្វេន ឌូចារិក (Stephane Dujarric)។

លោក ឌូចារិក បាននិយាយក្នុងអំឡុងពេលសន្និសីទអង្គការសហប្រជាជាតិថា «សំណើថ្មីៗរបស់លោកប្រធានាធិបតី ត្រាំបានបង្ហាញពីឱកាសដែលត្រូវតែចាប់យកដើម្បីនាំយកជម្លោះដ៏សោកនាដកម្មនេះឱ្យបានដល់ទីបញ្ចប់»។

លោក​បាន​សង្កត់​ធ្ងន់ទៅ​លើ​ការ​គាំទ្រ​ឥត​ងាករេ​របស់​អង្គការ​សហ​ប្រជាជាតិ​ចំពោះ​គំនិត​ផ្តួច​ផ្តើម​សន្តិភាព​នេះ ហើយ​បាន​សម្តែង​ក្តី​សង្ឃឹម​ថាក្រុមប្រឹក្សា​សន្តិសុខ​អង្គកាសហប្រជាជាតិនឹង​គាំទ្រ​វា​តាម​រយៈ​ដំណោះស្រាយ​មួយ។

កាលពីថ្ងៃទី២៩ ខែកញ្ញា ឆ្នាំ២០២៥ ប្រធានាធិបតីសហរដ្ឋអាមេរិកលោក ដូណាល់ ត្រាំ បានបង្ហាញផែនការ ២០ចំណុច ដើម្បីដោះស្រាយជម្លោះនៅតំបន់ហ្គាហ្សា។ សំណើ​នេះ​អំពាវនាវឱ្យ​មាន​បទ​ឈប់​បាញ់​ជា​បន្ទាន់ និង​ការ​ដោះលែង​ចំណាប់ខ្មាំង​ក្នុង​រយៈពេល ៧២ម៉ោង។ ផែនការនេះក៏ចែងផងដែរថា ចលនាក្រុមហាម៉ាស់ និងបក្សពួកផ្សេងៗទៀតត្រូវតែលះបង់ការចូលរួមរបស់ពួកគេក្នុងការគ្រប់គ្រងតំបន់ហ្គាហ្សា ដែលវានឹងត្រូវបានប្រគល់ឱ្យទៅឱ្យគណៈកម្មាធិការប៉ាឡេស្ទីនបែបបច្ចេកវិទ្យា និងនយោបាយ ដែលគ្រប់គ្រងដោយក្រុមប្រឹក្សាអន្តរជាតិដែលដឹកនាំដោយលោក ត្រាំ។

កាលពីថ្ងៃទី០៣ ខែតុលា ឆ្នាំ២០២៥ ក្រុមហាម៉ាស់បាននិយាយថា ខ្លួនបានយល់ព្រមប្រគល់អភិបាលកិច្ចនៃតំបន់ហ្គាហ្សាស្ទ្រីបទៅឱ្យគណៈកម្មាធិការប៉ាឡេស្ទីនដោយផ្អែកលើការឯកភាពទូទាំងប្រទេស។ ក្រុមហាម៉ាស់ក៏បានបង្ហាញពីការត្រៀមខ្លួនក្នុងការដោះលែងចំណាប់ខ្មាំងអ៊ីស្រាអែលដែលនៅរស់ទាំងអស់ និងប្រគល់សាកសពអ្នកស្លាប់ស្របតាមផែនការរបស់លោក ត្រាំ ផងដែរ ដោយបាននិយាយបន្ថែមថា ក្រុមចលនានេះនឹងចូលរួមក្នុងកិច្ចពិភាក្សាអំពីអនាគតនៃតំបន់ហ្គាហ្សាស្ទ្រីបក្នុងក្របខ័ណ្ឌនៃរចនាសម្ព័ន្ធប៉ាឡេស្ទីន៕

ដោយ៖ យា ចិន្តាខន្តី (ប្រភព៖ ស្ពុតនីក)