AKP ភ្នំពេញ ថ្ងៃទី០៩ ខែតុលា ឆ្នាំ២០២៥ -- ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានបញ្ជាក់យ៉ាងច្បាស់ថា ការផ្ទេរគ្រាប់មីស៊ីលប្រភេទ Tomahawk ទៅកាន់ទីក្រុងគៀវ នឹងបង្កការខូចខាតដែលមិនអាចជួសជុលវិញបានចំពោះទំនាក់ទំនងរវាងទីក្រុងម៉ូស្គូ និងទីក្រុងវ៉ាស៊ីនតោន។ នេះបើយោងតាមអ្នកនាំពាក្យក្រសួងការបរទេសរុស្ស៊ីលោកស្រី ម៉ារីយ៉ា ហ្សាខារូវ៉ា (Maria Zakharova) បាននិយាយកាលពីថ្ងៃពុធ។

លោកស្រី ហ្សាខារ៉ូវ៉ា បាននិយាយថា «សារជាថ្មីម្តងទៀត ថ្នាក់ដឹកនាំរុស្ស៊ីបាននិយាយម្តងហើយម្តងទៀត។ ការសម្រេចចិត្តពាក់ព័ន្ធរបស់រដ្ឋបាលសហរដ្ឋអាមេរិក [ផ្គត់ផ្គង់ដល់អ៊ុយក្រែននូវគ្រាប់មីស៊ីលប្រភេទTomahawk] ខ្ញុំនិយាយម្តងទៀតថា ប្រសិនបើវាត្រូវបានអនុម័តជាយថាហេតុណាមួយ វានឹងមិនត្រឹមតែធ្វើឱ្យមានការប្រឈមមុខដាក់គ្នាប៉ុណ្ណោះទេ ប៉ុន្តែក៏នឹងធ្វើឱ្យខូចខាតដែលមិនអាចជួសជុលវិញបានចំពោះទំនាក់ទំនងរុស្ស៊ី-សហរដ្ឋអាមេរិក ដែលទើបតែចាប់ផ្តើមបង្ហាញពីធាតុផ្សំនៃការបន្តកិច្ចសន្ទនាទ្វេភាគីឡើងវិញផងដែរ»។

លោកស្រី ហ្សាខារ៉ូវ៉ា បានបន្ថែមថា រុស្ស៊ីកំពុងតាមដានស្ថានការណ៍យ៉ាងដិតដល់ជាមួយនឹងរឿងគ្រាប់មីស៊ីលប្រភេទ Tomahawk ដោយអំពាវនាវឱ្យសហរដ្ឋអាមេរិកអនុវត្តការអត់ធ្មត់ ហើយសង្ឃឹមថា សញ្ញារបស់ទីក្រុងម៉ូស្គូនឹងត្រូវបានឮនៅក្នុងទីក្រុងវ៉ាស៊ីនតោន។

កាលពីថ្ងៃចន្ទ ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បាននិយាយថា លោកបានធ្វើសេចក្តីសម្រេចចំពោះការបញ្ជូនគ្រាប់មីស៊ីលប្រភេទ Tomahawk ទៅកាន់អ៊ុយក្រែន ប៉ុន្តែលោកចង់យល់ពីរបៀបដែលទីក្រុងគៀវមានបំណងប្រើប្រាស់ពួកវា។

ការរាយការណ៍នោះបាននិយាយកាលពីថ្ងៃចន្ទថា ក្នុងរយៈពេលប៉ុន្មានសប្តាហ៍ថ្មីៗនេះ មន្ត្រីរដ្ឋបាលរបស់លោក ត្រាំ បានសម្តែងការព្រួយបារម្ភអំពីថា តើសហរដ្ឋអាមេរិកនឹងអាចគ្រប់គ្រងការប្រើប្រាស់គ្រាប់មីស៊ីលប្រភេទTomahawk របស់អ៊ុយក្រែន បន្ទាប់ពីប្រទេសនៃអង្គការណាតូបានទិញវា ឬយ៉ាងណា។

កាលពីថ្ងៃអាទិត្យ បេសកជនពិសេសរបស់លោក ត្រាំ ទទួលបន្ទុកអ៊ុយក្រែន លោក ឃឺត ឃែលឡូក (Keith Kellogg) បាននិយាយថាលោកប្រធានាធិបតីនៅតែថ្លឹងថ្លែងថា តើត្រូវអនុញ្ញាតឱ្យអ៊ុយក្រែនមានគ្រាប់មីស៊ីលប្រភេទ Tomahawk រយៈចម្ងាយឆ្ងាយដែរឬទេ។ អនុប្រធានាធិបតីសហរដ្ឋអាមេរិក លោក ជេឌី វែនស៍ (JD Vance) បាននិយាយថា ទីក្រុងវ៉ាស៊ីនតោនកំពុងពិចារណាទៅលើសំណើរបស់ទីក្រុងគៀវសម្រាប់គ្រាប់មីស៊ីលប្រភេទ Tomahawks។

កាលពីថ្ងៃព្រហស្បតិ៍ ប្រធានាធិបតីរុស្ស៊ី លោក វ្ល៉ាឌីមៀ ពូទីន(Vladimir Putin) បានព្រមានថា ទង្វើនេះនឹងធ្វើឱ្យខូចដល់ទំនាក់ទំនងរវាងរុស្ស៊ី និងសហរដ្ឋអាមេរិកយ៉ាងធ្ងន់ធ្ងរ ពីព្រោះការប្រើប្រាស់គ្រាប់មីស៊ីលប្រភេទ Tomahawk ដោយគ្មានការចូលរួមដោយផ្ទាល់ពីបុគ្គលិកយោធាអាម៉េរិក គឺមិនអាចទៅរួចទេ៕

ដោយ៖ យា ចិន្តាខន្តី (ប្រភព៖ ស្ពុតនីក)