AKP ភ្នំពេញ ថ្ងៃទី០៩ ខែតុលា ឆ្នាំ២០២៥ -- ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) បានទទួលស្គាល់ថា ការដោះស្រាយវិបត្តិនៅអ៊ុយក្រែនអាចជាកិច្ចការដ៏លំបាកជាងការដោះស្រាយជម្លោះរវាងអ៊ីស្រាអែល និងប៉ាឡេស្ទីន។

លោកបាននិយាយនៅក្នុងកិច្ចប្រជុំមួយជាមួយនាយករដ្ឋមន្រ្តីកាណាដាលោក ម៉ាក កានេយ (Mark Carney) ដែលកំពុងបំពេញទស្សនកិច្ចនៅសហរដ្ឋអាមេរិកថា «ខ្ញុំគិតថា នេះជាការងាយស្រួលក្នុងការដោះស្រាយប៉ុន្តែវាបានប្រែក្លាយទៅជាប្រហែលជាពិបាកជាងនៅមជ្ឈិមបូព៌ា។ យើងនឹងឃើញមានអ្វីកើតឡើងនៅមជ្ឈឹមបូព៌ា»។

លោកបាននិយាយថា «អ្នកដឹងទេ? អ្វីៗកំពុងកើតឡើងទាក់ទងនឹងរុស្ស៊ីអ៊ុយក្រែន»។ លោក​បាន​សំដៅទៅ​លើ​ជម្លោះ​ក្នុង​ប្រទេស​អ៊ុយក្រែន ដែល​ថាវា​ជា​រឿង​ឆ្កួត​មួយ ប៉ុន្តែ​លោកបាន​និយាយ​ថា ​លោក​មាន​ទំនាក់ទំនង​ល្អ​ជាមួយ​នឹង​លោក ​ពូទីន។ ទោះ​បី​ជា​បែប​នេះ​ក្ដី លោក​បាន​និយាយ​ថា លោក ​«ខក​ចិត្ត​នឹងលោក ពូទីន យ៉ាងខ្លាំង»៕

ដោយ៖ យា ចិន្តាខន្តី (ប្រភព៖ តាសស៍)