AKP ភ្នំពេញ ថ្ងៃទី០៧ ខែតុលា ឆ្នាំ២០២៥-- ឯកឧត្តម ចាន់ យុត្ថា រដ្ឋលេខាធិការក្រសួងធនធានទឹក និងឧតុនិយម និងជានាយកទទួលបន្ទុកគម្រោងក្រោមហិរញ្ញប្បទានពីទីភ្នាក់ងារបារាំងសម្រាប់អភិវឌ្ឍន៍ (AFD) បានទទួលជួបពិភាក្សាការងារជាមួយលោក Martin LEMENAGER ប្រធានក្រុមបេសកកម្មវាយតម្លៃផ្នែកគម្រោងជលសាស្ត្រទន្លេមេគង្គ ជំហានទី១ និងទី២ (២០១៥-២០២៥) របស់ទីភ្នាក់ងារបារាំងសម្រាប់អភិវឌ្ឍន៍ (AFD) និងសហការី នៅទីស្ដីការក្រសួង នាព្រឹកថ្ងៃអង្គារ ទី០៧ ខែតុលា ឆ្នាំ២០២៥។

ឯកឧត្តមរដ្ឋលេខាធិការបានថ្លែងអំណរគុណ និងកោតសរសើរចំពោះកិច្ចសហប្រតិបត្តិការនាពេលកន្លងមកជាមួយទីភ្នាក់ងារបារាំងសម្រាប់អភិវឌ្ឍន៍ (AFD) និងបានសំណូមពរឱ្យមានការសិក្សាលម្អិតអំពីរបបជលសាស្ត្រតាមដងទន្លេមេគង្គ ទន្លេបាសាក់ និងតាមព្រែកទាំងអស់នៅតាមបណ្តោយទន្លេខាងលើ ដើម្បីជាប្រយោជន៍ដល់ការសិក្សាគម្រោង និងការអភិវឌ្ឍនាថ្ងៃអនាគត។

ភាគីបារាំងបានចែករំលែកនូវទស្សនាទាន និងបទពិសោធន៍រយៈពេល១០ឆ្នាំកន្លងមក ជាមួយគណៈកម្មាធិការជាតិទន្លេមេគង្គកម្ពុជា (MRC) និងស្វែងយល់ពីតម្រូវការចាំបាច់ ដើម្បីរៀបចំផែនការយុទ្ធសាស្ត្រអន្តរាគមន៍បន្ទាន់នៅក្នុងតំបន់ឆ្នាំ២០២៦ខាងមុខ ក្រោមការឧបត្ថម្ភពីទីភ្នាក់ងារបារាំងសម្រាប់អភិវឌ្ឍន៍ (AFD)៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)