AKP កំពង់ធំ ថ្ងៃទី២៩ ខែកញ្ញា ឆ្នាំ២០២៥-- ឯកឧត្តម នួន ផារ័ត្ន អភិបាលខេត្តកំពង់ធំ កាលពីថ្ងៃទី២៨ ខែកញ្ញា ឆ្នាំ២០២៥ បានដឹកនាំមន្ត្រីជំនាញចុះពិនិត្យទីតាំងស្រុកបារាយណ៍ រកដំណោះស្រាយកាយផ្តាច់ផ្លូវជាបណ្តោះអាសន្ន បើកមុខទឹកដើម្បីបញ្ចៀសពីការលិចលង់លំនៅឋាន និងដីស្រែចម្ការរបស់ប្រជាពលរដ្ឋស្ថិតនៅភូមិបាណកឃុំបារាយណ៍ស្រុកបារាយណ៍ខេត្តកំពង់ធំ។

ឯកឧត្តម នួន ផារ័ត្ន បានមានប្រសាសន៍ថា ជាក់ស្ដែងប៉ុន្មានថ្ងៃនេះអាកាសធាតុបង្កឱ្យមានភ្លៀងធ្លាក់ ជាញឹកញាប់ធ្វើឱ្យទឹកនៅគ្រប់កន្លែងបានជន់លិចភូមិដ្ឋាននិងដីស្រែចម្ការរបស់បងប្អូនប្រជាពលរដ្ឋ។កត្តាទាំងអស់នេះហើយដើម្បីកុំឱ្យរងប៉ះពាល់ការខូចខាតនៅហេដ្ឋារចនាសម្ព័ន្ធគ្រប់ទីកន្លែងថ្នាក់ដឹកនាំខេត្តនិងអាជ្ញាធរមូលដ្ឋានត្រូវតែរកមធ្យោបាយកាយផ្ដាច់ផ្លូវឱ្យទឹកបានស្រកលឿនបំផុតកុំឱ្យប៉ះពាល់ដល់ការរស់នៅរបស់បងប្អូនប្រជាពលរដ្ឋក្នុងមូលដ្ឋាន។

ទន្ទឹមនឹងនេះឯកឧត្តមអភិបាលខេត្តបានគូសបញ្ជាក់ពីបញ្ហាព្រំដែនយើងបន្តតាមដានយ៉ាងយកចិត្តទុកដាក់ក្នុងនាមជាខ្មែរនិងបន្តជឿជាក់ហើយគាំទ្រចំណាត់ការរបស់សម្តេចតេជោនិងសម្តេចធិបតីក្នុងការដោះស្រាយជម្លោះព្រំដែននេះ ដោយឈរលើឧត្តមប្រយោជន៍ខ្ពស់បំផុតរបស់ជាតិយើង។ដំណើរទៅមុខរបស់ជាតិយើងគឺត្រូវឆ្លងកាត់រឿងល្អ រឿងមិនល្អ និងបញ្ហាប្រឈមជារឿងដែលចៀសមិនផុតប៉ុន្តែអ្វីដែលសំខាន់នោះ គឺការចេះស្រឡាញ់គ្នា រួបរួម សាមគ្គី ទើបដំណើរជាតិយើងបន្តទៅមុខបានលឿននិងរលូន។

សូមបញ្ជាក់ថាផលប៉ះពាល់ដោយជំនន់ទឹកភ្លៀងក្នងឃុំបារាយណ៍បានធ្វើឱ្យប៉ះពាល់ដីស្រែចំនួន៧៥៣ហិកតា ស្មើ៩៧៣គ្រួសារក្នុងនោះខូចខាតចំនួន២៣៩ហិកតាស្មើ២៦១គ្រួសារ។ ភូមិបាណក ប៉ះពាល់ផ្ទះ១៩ខ្នងផ្ទះ ស្មើនឹង១៩គ្រួសារ ផ្លូវលំលិចទឹកប្រវែង១១០ម៉ែត្រ។ ភូមិបារាយណ៍តូចប៉ះពាល់ខ្នងផ្ទះ៦ខ្នងស្មើនឹង៦គ្រួសារ ផ្លូវលំលិចទឹកប្រវែង៧២០ម៉ែត្រ។ ខ្នងប្រឡាយលិចទឹកប្រហែល១៥០ម៉ែត្រ។ ភូមិបារាយណ៍ធំ ផ្លូវលំលិចទឹក១៥០ម៉ែត្រប៉ះពាល់ផ្ទះប្រជាពលរដ្ឋ២៥ខ្នងផ្ទះស្មើនឹង២៥គ្រួសារ ផ្លូវលំលិចទឹកប្រវែង១០៨០ម៉ែត្រ៕

ដោយ ស៊ុម វណ្ណា