AKP បាត់ដំបង ថ្ងៃទី២៩ ខែកញ្ញា ឆ្នាំ២០២៥-- ឯកឧត្តម សុខ លូ អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង អមដោយឯកឧត្តម លោកជំទាវ លោក លោកស្រី គណៈកម្មាធិការសាខា អនុសាខាស្រុក ក្រុមកាកបាទក្រហមឃុំ អ្នកស្មគ្រ័ចិត្តភូមិ នៅថ្ងៃទី២៨ ខែកញ្ញា ឆ្នាំ២០២៥ បានអញ្ជើញចុះប្រគល់ផ្ទះមនុស្សធម៌១ខ្នង លេខរៀងទី២១ ជាអំណោយរបស់សាខាកាកបាទក្រហមកម្ពុជាខេត្ត ជូនដល់លោកតា នេត នូ អាយុ ៧២ឆ្នាំ មានជីវភាពក្រីក្រខ្លាំង និងរងគ្រោះដោយអគ្គិភ័យកន្លងទៅ  និងផ្តល់អំណោយមនុស្សធម៌ដល់ប្រជាពលរដ្ឋងាយរងគ្រោះចំនួន ៣០គ្រួសារស្ថិតភូមិតាថុក ឃុំធិបតី ស្រុកគាស់ក្រឡ ខេត្តបាត់ដំបង។

យោងតាមរបាយការណ៍លោក ញឹក សារ៉ែន អភិបាលស្រុក និងជាប្រធានអនុសាខាស្រុកគាស់ក្រឡ បានឱ្យដឹងថាក្រុមគ្រួសារ លោកតា នេត នូ អាយុ ៧២ឆ្នាំ មានបន្ទុកគ្រួសារចំនួន៣នាក់ស្រី១នាក់ ដែលបានរងគ្រោះដោយអគ្គិភ័យកាលពីថ្ងៃទី៦ ខែឧសភា ឆ្នាំ២០២៥ វេលាម៉ោង ១៣:២០នាទីបណ្តាលឱ្យខូខាតទាំងស្រុងផ្ទះ១ខ្នង ទំហំ៥ម៉ែត្រគុំ៦ម៉ែត្រ ស្ថិតភូមិតាថុក ឃុំធិបតី មូលហេតុផ្ទុះសេខ្សែភ្លើង ហើយគ្រួសារខាងលើមានជីវភាពទ័លក្រ ក្រោយពីរងគ្រោះភ្លាមៗ គ្រួសាររងគ្រោះខាងលើក៏ទទួលបានការយកចិត្តទុកដាក់ពីអាជ្ញាធរមូលដ្ឋាន ពីអនុសាខាកាកបាទក្រហមកម្ពុជា ស្រុក ជាពិសេសទទួលបានការជួយឧបត្ថម្ភរបស់រាជរដ្ឋាភិបាលកម្ពុជាតាមរយៈប័ណ្ណសមធម៌ផងដែរ ។ផ្ទះលេខរៀងទី២១ ដែលជាអំណោយរបស់សាខាខេត្តខាងលើនេះ ចំណាយថវិកា ៥.៥៥០ដុល្លារ មានទំហំ ៤ម៉ែត្រ គុណ ៦ម៉ែត្រ ជញ្ជាំងស៊ីម៉ង់តិ៍ ក្រាលការ៉ូ ដំបូលប្រក់សង្ក័សី មានបន្ទប់ទឹកមួយក្រោយផ្ទះតយ៉ាបខាងមុខ២.៥ម៉ត្រផងដែរ។

ថ្លែងក្នុងឱកាសនោះ ក្នុងនាមកាកបាទក្រហមកម្ពុជា ដែលមានសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ឯកឧត្តម សុខ លូ ប្រធានគណៈកម្មាធិការសាខាកាកបាទក្រហមកម្ពុជាខេត្ត បាននាំនូវប្រសាសន៍ផ្តាំផ្ញើសួរសុខទុក្ខ ក្តីនឹករលឹក អាណិតស្រឡាញ់ចំពោះក្រុមគ្រួសារ លោកតា  នេត នូ ក៏ដូចជាបងប្អូនប្រជាពលរដ្ឋទាំងអស់។ ឯកឧត្តមក៏បានក្រើនរំលឹកដល់ប្រជាពលរដ្ឋទាំងអស់ សូមចូលរួមជាមួយអាជ្ញាធរមូលដ្ឋានដើម្បីលុបបំបាត់គ្រឿងញៀន គ្រឿងស្រវឹង ល្បែងស៊ីសង ក្មេងទំនើងនៅក្នុងភូមិដែលខ្លួនរស់នៅ និងគោរពច្បាប់ចរាចរណ៍ឱ្យបានខ្ជាប់ខ្ជួន ហើយសូមអាណាព្យាបាលទាំងអស់បញ្ជូនកូនៗទៅសាលារៀនឱ្យបានគ្រប់ៗគ្នា រៀនសូត្រឱ្យបានខ្ពង់ខ្ពស់ដើម្បីមានចំណេះដឹង មានការងារធ្វើ និងបន្តខិតខំបង្កបង្កើនផលដាំដុះដំណាំរួមផ្សំនានាដើម្បីជួយលើកស្ទួយក៏ដូចជាការពង្រឹងជីវភាពគ្រួសាររៀងៗខ្លួន។

ប្រជាពលរដ្ឋដែលរស់នៅក្នុងមូលដ្ឋាននេះ សូមស្វែងយល់បន្ថែមពីភាពរឹងមាំនៃលំនៅឋាន ដើម្បីបង្ការ និងការពារហានិភ័យផ្សេងៗ ដែលបង្កដោយគ្រោះធម្មជាតិព្រោះថា ពេលមានភ្លៀងធ្លាក់មកជាមួយនឹងខ្យល់កន្រ្តាក់ លាយឡំនឹងផ្គររន្ទះ អាចបង្កជាគ្រោះថ្នាក់ដល់អាយុជីវិតមនុស្ស-សត្វ ដែលតម្រូវឲឱ្យ ប្រជាពលរដ្ឋគ្រប់រូបមានការប្រុងប្រយ័ត្នឱ្យបានគ្រប់ៗគ្នា ។ ជាមួយគ្នានេះដែរ ដើម្បីជួយសម្រាលដល់ជីវភាពរស់នៅ សាខាកាកបាទក្រហមកម្ពុជាខេត្តបានផ្តល់ជូនអំណោយសម្រាប់សង្កត់ផ្ទះរួមមាន  អង្ករ មី ទឹកត្រី ទឹកស៊ីអ៊ីវ  ត្រីខ ទឹកបរិសុទ្ធ និងថវិកាមួយចំនួន ដោយឡែកគ្រួសារងាយរងគ្រោះមានជនចាស់ជរា ជនមានពិការភាព និងគ្រួសារក្រីក្រ ដែលរស់នៅជិតខាងចំនួន ៣០គ្រួសារ ដោយមួយគ្រួសារទទទួលបានអង្ករ២៥គីឡូក្រាម មី១កេស ទឹកបរិសុទ្ធ១កេស ទឹកត្រី១យួរ ទឹកស៊ីអ៊ីវ១យួរ ផងដែរ៕

ដោយ ណយ នឿន (ប្រភព៖ រដ្ឋបាលខេត្តបាត់ដំបង)