AKP កំពង់ធំ ថ្ងៃទី២៨ ខែកញ្ញា ឆ្នាំ២០២៥-- ឯកឧត្តម នួន ផារ័ត្ន អភិបាលខេត្តកំពង់ធំ បានសំណូមពរដល់បងប្អូនប្រជាពលរដ្ឋដែលរស់នៅតាមបណ្ដោយដងស្ទឹងសែនក្នុងក្រុងស្ទឹងសែនខេត្តកំពង់ធំ សូមបញ្ឈប់ការសាងសង់លំនៅឋានខុសច្បាប់តាមដងស្ទឹងសែន និងបញ្ឈប់ការបង្ហូរទឹកកខ្វក់ចូលក្នុងទឹកស្ទឹងដែលបណ្ដាលឱ្យខូចគុណភាពទឹក និងប៉ះពាល់ដល់វិស័យទេសចរណ៍។ ឯកឧត្តមមានប្រសាសន៍លើកឡើងដូចនេះក្នុងពិធីសម្ពោធដាក់ឱ្យប្រើប្រាស់ផ្លូវបេតុងអាមេ០១ខ្សែប្រវែង១៣១៥ម៉ែត្រ ទទឹង៦ម៉ែត្រនៅភូមិបល្ល័ង្កកើត សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ នាព្រឹកថ្ងៃទី២៨ ខែកញ្ញា ឆ្នាំ២០២៥។ 

ឯកឧត្តម នួន ផារ័ត្ន បញ្ជាក់ថាបច្ចុប្បន្ននេះអាជ្ញាធរខេត្តបានរៀបចំផែនការយុទ្ធសាស្ត្រអភិវឌ្ឍក្រុងស្ទឹងសែនឱ្យក្លាយទៅជាទីក្រុងមួយដែលទាក់ទាញភ្ញៀវទេសចរជាតិអន្តរជាតិ និងអ្នកវិនិយោគទុនងាកមកចាប់អារម្មណ៍អំពីសក្តានុពលនៅខេត្តកំពង់ធំជាពិសេសពាក់ព័ន្ធទៅនឹងវិស័យកសិកម្ម និងវិស័យទេសចរណ៍។

ទន្ទឹមនឹងនេះ ឯកឧត្តម នួន ផារ័ត្នបានធ្វើបច្ចុប្បន្នភាពអំពីស្ថានភាពជម្លោះព្រំដែនកម្ពុជា-ថៃ ដែលកំពុងមានភាពតានតឹងនៅឡើយជូនដល់បងប្អូនប្រជាពលរដ្ឋ ជាពិសេសកិច្ចខិតខំប្រឹងប្រែងរបស់រាជរដ្ឋាភិបាលក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ឯកឧត្តមបានសំណូមពរដល់អ្នកប្រើប្រាសផ្លូវទាំងអស់សូមចូលរួមថែរក្សាផ្លូវនេះឱ្យបានគង់វង្សយូរអង្វែងដោយមិនត្រូវដឹកជញ្ជូនទំនិញលើផ្លូវថ្នល់ដែលផ្ទុកលើសទម្ងន់កំណត់ ដែលធ្វើឱ្យស្រុតផ្លូវបេតុងឬបែកលូកាត់ទទឹងផ្លូវ ឬបាក់ស្ពាន និងបានអំពាវនាវដល់ប្រជាពលរដ្ឋដែលចិញ្ចឹមសត្វពាហនៈសូមមានការប្រុងប្រយ័ត្នពេលមានការឆ្លងកាត់ផ្លូវនិងចូលរួមគោរពច្បាប់ចរាចរណ៍ផ្លូវគោកទាំងអស់គ្នាកុំបើកបរលើសល្បឿនកំណត់ ដើម្បីចៀសវាងនូវគ្រោះថ្នាក់ចរាចរណ៍ដែលកើតឡើងជាយថាហេតុនាំឱ្យខូចខាតដល់ទ្រព្យសម្បត្តិ អាយុជីវិតអ្នកធ្វើដំណើរតាមដងផ្លូវជាមួយគ្នា៕

ដោយ ស៊ុម វណ្ណា