AKP ភ្នំពេញ ថ្ងៃទី២៨ ខែកញ្ញា ឆ្នាំ២០២៥-- លោក ខូវ មាស អគ្គលេខាធិការរង អាជ្ញាធរទន្លេសាប ទទួលបន្ទុកផ្លូវជាតិលេខ៦ នាថ្ងៃទី២៧ ខែកញ្ញា ឆ្នាំ២០២៥ បានដឹកនាំក្រុមការងារបច្ចេកទេស ចុះពិនិត្យស្ថានភាពទូទៅនារដូវវស្សាតាមបណ្តាស្ទឹង ស្ថិតនៅក្នុង ខេត្តកំពង់ធំ សៀមរាប និងបន្ទាយមានជ័យ។

លោក ខូវ មាស បានលើកឡើងថា គោលបំណងនៃការចុះពិនិត្យជាក់ស្តែង គឺដើម្បីវាយតម្លៃអំពីស្ថានភាពធនធានទឹក បរិស្ថាន និងការប្រើប្រាស់ស្ទឹងនារដូវវស្សា ដោយផ្តោតលើការពង្រឹងប្រព័ន្ធគ្រប់គ្រងទឹកប្រកបដោយប្រសិទ្ធភាព បញ្ចៀសការលិចលង់ និងសម្រាប់បម្រើដល់ផលប្រយោជន៍ជូនដល់ប្រជាជនដែលរស់នៅក្នុងតំបន់។ ការចុះពិនិត្យនេះមានសារៈសំខាន់ក្នុងការប្រមូលព័ត៌មាន ទិន្នន័យ ជាក់ស្តែងពីតំបន់នីមួយៗ ដើម្បីធ្វើជាមូលដ្ឋានសម្រាប់ការរៀបចំយុទ្ធសាស្ត្រ និងផែនការគ្រប់គ្រងធនធានទឹកក្នុងតំបន់បឹងទន្លេសាប ពិសេសតាមបណ្តាស្ទឹងទាំងជុំវិញបឹងទន្លេសាប និងបញ្ចៀសការជន់លិចនៅប៉ែកខាងលើឱ្យមានប្រសិទ្ធភាព ការពារ និងអភិវឌ្ឍន៍ប្រកបដោយចីរភាព។

លោកអគ្គលេខាធិការរងបន្តផ្តល់អាទិភាពលើការអភិរក្ស និងការគ្រប់គ្រងធនធានទឹក ដោយសហការជិតស្និទ្ធជាមួយមន្ទីរធនធានទឹក និងឧតុនិយម នៃបណ្តាខេត្តជុំវិញបឹងទន្លេសាប អាជ្ញាធរមូលដ្ឋាន ស្ថាប័នពាក់ព័ន្ធ និងសហគមន៍ក្នុងតំបន់។ ការចូលរួមរបស់ប្រជាពលរដ្ឋ ក៏ជាកត្តាសំខាន់សម្រាប់ការការពារ និងប្រើប្រាស់ធនធានទឹកឱ្យមានប្រសិទ្ធភាព៕

ដោយ ណយ នឿន (ប្រភព៖ អាជ្ញាធរទន្លេសាប)