AKP សៀមរាប ថ្ងៃទី២៧ ខែកញ្ញា ឆ្នាំ២០២៥-- ដើម្បីជាការឆ្លើយតបទៅនឹងផែនការយុទ្ធសាស្ត្រវិស័យអប់រំ យុវជន និងកីឡា ឆ្នាំ២០២៤-២០២៨ ដែលយកចិត្តទុកដាក់ខ្ពស់ក្នុងការអភិវឌ្ឍមូលធនមនុស្ស ជាពិសេសផ្អែកលើគោលនយោបាយជាតិស្តីពីការអភិវឌ្ឍយុវជនជាកម្លាំងស្នូល និងជាអ្នកបន្តវេនក្នុងការជួយជំរុញ សេដ្ឋកិច្ចគ្រួសារ សហគមន៍ប្រទេសជាតិ និងពិភពលោក។ មន្ទីរអប់រំយុវជន និងកីឡា ខេត្តសៀមរាប នៅព្រឹកថ្ងៃទី២៧ ខែកញ្ញា ឆ្នាំ២០២៥ បានរៀបចំការប្រកួតជជែកដេញដោលយុវជនថ្នាក់ខេត្ត២០២៥ វគ្គពាក់កណ្តាលផ្តាច់ព្រ័ត្រ និងការនិយាយជាសាធារណៈ វោហាស័ព្ទឆ្នើម ដើម្បីជ្រើសរើសយកអ្នកជាប់លេខ១ទៅប្រគួតនៅថ្នាក់ជាតិ។

លោក ញឹក សាគុណ អនុប្រធានមន្ទីរអប់រំយុវជន និងកីឡា ខេត្តសៀមរាប បានថ្លែងថា កម្មវិធីជជែកដេញដោលយុវជន ជាពិសេសក្រោមប្រធានបទ វោហាស័ព្ទ (ការនិយាយជាសាធារណៈ) គឺមានអត្ថប្រយោជន៍យ៉ាងច្រើនសម្រាប់យុវជនក្នុងការអភិវឌ្ឍសមត្ថភាព និងភាពជឿជាក់របស់ពួកគេ។ កម្មវិធីនេះ បានលើកកម្ពស់វោហាស័ព្ទ មិនមែនត្រឹមតែជួយឱ្យយុវជនចេះនិយាយបានល្អប៉ុណ្ណោះទេ តែថែមទាំងជួយឱ្យពួកគេក្លាយជាពលរដ្ឋម្នាក់ដែលមាន ការគិតពិចារណាខ្ពស់ មានទំនុកចិត្ត និងមានសមត្ថភាព ក្នុងការផ្លាស់ប្តូរសង្គមផងដែរ។ បណ្តុះបណ្តាលយុវជនឱ្យចេះប្រើប្រាស់នូវវប្បធម៌សន្ទនា តាមរយៈការជជែកដេញដោល បណ្តុះសមត្ថភាពយុវជន ក្នុងការដោះស្រាយបញ្ហាផ្សេងៗ ដែលពួកគេជួបប្រទះតាមរយៈការសន្ទនា កសាងសមត្ថភាពយុវជនឱ្យមានភាពក្លាហានចេះប្រើប្រាស់សិទ្ធិស្របច្បាប់ប្រកប ដោយភាពឈ្លាសវៃក្នុង ការបញ្ចេញមតិដើម្បីទទួលបាននូវផ្លែផ្កាជាវិជ្ជមានជូនសង្គម ពង្រឹងជំនាញនៃការត្រិះរិះពិចារណា ការសិក្សាស្រាវជ្រាវ ការចែករំលែកគំនិត ការទាក់ទាញការគាំទ្រ និងជំនាញក្នុងការនិយាយសាធារណៈជាដើម។

ជាមួយគ្នានេះ កម្មវិធីនេះក៏បានផ្តល់ឱកាសឱ្យយុវជនបញ្ចេញគំនិតយោបល់ បង្ហាញសមត្ថភាព និងទេពកោសល្យជាសាធារណៈក្នុងការជជែកដេញដោលក្នុងសមរភូមិគំនិតនៃសង្គមពុទ្ធិ ដើម្បីស្វែងរកនូវសុខដុមនីយកម្មសម្រាប់ទាំងអស់គ្នា បង្កើនបណ្តាញទំនាក់ទំនងល្អរវាងយុវជននិងយុវជន ដើម្បីផ្លាស់ប្តូរបទពិសោធន៍គ្នាក្នុងតម្លៃជាមិត្តភាព ពង្រីកធនធានយុវជន ដើម្បីអាចអភិវឌ្ឍខ្លួនក្លាយជាមូលធនមនុស្សសម្រាប់ជាតិកម្ពុជា បណ្តុះនូវចំណេះដឹងថ្មីៗដែលកើតចេញពីការស្រាវជ្រាវតាមប្រព័ន្ធបច្ចេកវិទ្យានិងការរស់នៅជាក់ស្តែង បណ្តុះនូវគំនិតវិជ្ជមានថ្មីរបស់យុវជនដែលពួកគាត់មិនមានឱកាសក្នុងបញ្ចេញទស្សនៈរបស់ខ្លួនសម្រាប់ការ ចូលរួមសកម្មភាពផ្សេងៗ៕

ដោយ ឃុត សៅ