AKP ភ្នំពេញ ថ្ងៃទី២៧ ខែកញ្ញា ឆ្នាំ២០២៥-- បទពិសោធន៍ និងអនុសាសន៍របស់កម្ពុជា ដែលបានលើកឡើងក្នុងកិច្ចប្រជុំតុមូលថ្នាក់រដ្ឋមន្រ្តីទេសចរណ៍លើប្រធានបទ "ការជំរុញបរិវត្តកម្មក្នុងតំបន់-ការធ្វើពិពិធកម្មគោលដៅទេសចរណ៍ និងការអភិវឌ្ឍធនធានមនុស្ស ត្រូវបានទទួលការសាទរ  និងយកជាគំរូ។

ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ ក្នុងកិច្ចប្រជុំតុមូលថ្នាក់រដ្ឋមន្រ្តីទេសចរណ៍លើកទី៨ ក្រោមប្រធានបទ៖ "ការជំរុញបរិវត្តកម្មក្នុងតំបន់-ការធ្វើពិពិធកម្មគោលដៅទេសចរណ៍ និងការអភិវឌ្ឍធនធានមនុស្ស នៅទីក្រុងណាហ្គូយ៉ា ប្រទេសជប៉ុន ដោយមានអ្នកចូលរួមជាថ្នាក់រដ្ឋមន្រ្តីទេសចរណ៍ និងនិយ័តករទេសចរណ៍មកពី៧ប្រទេស តំណាងអង្គការទេសចរណ៍ពិភពលោក (UN Tourism) World Travel & Tourism Council (WTTC), Pacific Asia Travel Association (PATA) European Travel Commission (ETC), Adventure Travel Trade Association (ATTA) និង Economic Research Institute of ASEAN and East Asia (ERIA) ថ្នាក់ដឹកនាំក្រុមហ៊ុនទេសចរណ៍ជប៉ុន និងអន្តរជាតិជាច្រើន បានថ្លែងនូវសុន្ទរកថាគន្លឹះដោយបានចែករំលែកបទពិសោធនៃការអភិវឌ្ឍវិស័យទេសចរណ៍ដោយផ្អែកលើសក្តានុពលទេសចរណ៍ បេតិកភណ្ឌដ៏ច្រើន វប្បធម៌ ទំនៀមទម្លាប់ប្រពៃណី កត្តាអំណោយផលនៃទីតាំងភូមិសាស្រ្ត ជាពិសេសគឺកត្តាសុខសន្តិភាពដ៏ពេញលេញ ដែលកម្ពុជាបានឆ្លុះបញ្ចាំងដល់ពិភពលោកពីតម្លៃមិនអាចកាត់ថ្លៃបាននៃសន្តិភាព និងទំនាក់ទំនងមិនអាចកាត់ផ្តាច់បានរវាងសន្តិភាព និងទេសចរណ៍ ដូចពាក្យស្លោកប្រកបដោយគតិបណ្ឌិតរបស់សម្តេចមហាបវរធិបតី នាយករដ្ឋមន្ត្រី នៃកម្ពុជា "ទេសចរណ៍រីកលូតលាស់ក្នុងសន្តិភាព" ដោយបទពិសោធ និងអនុសាសន៍របស់កម្ពុជា ដែលបានលើកឡើងក្នុងកិច្ចប្រជុំតុមូលរដ្ឋមន្រ្តីទេសចរណ៍នាពេលនេះបានទទួលការសាទរនិងយកជាគំរូ។ 

ទន្ទឹមនឹងនេះដែរ ឯកឧត្តមរដ្ឋមន្រ្តី ហួត ហាក់ បានលើកជាអនុសាសន៍ចំនួន៣ ក្នុងសុន្ទរកថាគន្លឹះ ដើម្បីសម្រេចបាននូវកិច្ចសហប្រតិបត្តិការជំរុញលំហូរភ្ញៀវទេសចរក្នុងតំបន់ ក៏បានទទួលការសាទរគំាទ្រ និងត្រូវបានយកជាធាតុចូលទុកជាបទពិសោធសម្រាប់ការចែករំលែកបន្តទៀតផងដែរ៕

ដោយ៖ ចាន់ សុភឿន (ប្រភព៖ ក្រសួងទេសចរណ៍)