រាជធានីភ្នំពេញ៖សម្តេចប្រធានរដ្ឋសភាកម្ពុជាបានកោតសរសើរយ៉ាងជ្រាលជ្រៅ ចំពោះតួនាទីដែលមិនអាចខ្វះបាន និងការ គាំទ្រឥតងាករេរបស់សាធារណរដ្ឋប្រជាមានិតចិន ចំពោះកិច្ចព្រមព្រៀងបទឈប់បាញ់នាពេលថ្មីៗនេះ រវាង កម្ពុជា និងថៃ។

យោងតាមលិខិតរបស់សម្តេចរដ្ឋសភាធិការធិបតី ឃួន សុដារីប្រធានរដ្ឋសភាកម្ពុជាបានផ្ញើរជូនឯកឧត្តម ចាវ ឡីជី (Zhao Leji)ប្រធានគណៈកម្មាធិការអចិន្ត្រៃយ៍ នៃសភាតំណាងប្រជាជនទូទាំងប្រទេស នៃសាធារណរដ្ឋប្រជាមានិតចិនបានលើកឡើងតាងនាមរដ្ឋសភា នៃព្រះរាជាណាចក្រកម្ពុជា និងក្នុងនាមខ្ញុំផ្ទាល់ ខ្ញុំសូមចូលរួមសម្តែងនូវការអបអរ សាទរយ៉ាងកក់ក្តៅបំផុត ជូនចំពោះ ឯកឧត្តមប្រធាន សហការី និងប្រជាជន នៃសាធារណរដ្ឋប្រជាមានិតចិន ក្នុងឱកាសដ៏វិសេសវិសាល នៃការប្រារព្ធខួបលើកទី៧៦ នៃការបង្កើតសាធារណរដ្ឋប្រជាមានិតចិន។

សម្តេចបានបញ្ជាក់ថា៖"
ខ្ញុំបានសង្កេតឃើញដោយការពេញចិត្ត ចំពោះចំណងមិត្តភាពដែកថែប និងកិច្ចសហប្រតិបត្តិការ គ្រប់ជ្រុងជ្រោយ រវាងប្រទេសយើងទាំងពីរ ជាពិសេសស្ថាប័ននីតិប្បញ្ញត្តិ ដែលត្រូវបានពង្រឹង និងពង្រីក ឥតឈប់ឈរ ក្នុងរយៈពេលជាច្រើនទសវត្សរ៍កន្លងមកនេះ ហើយខ្ញុំមានជំនឿយ៉ាងមុតមាំថា ចំណងមិត្តភាព ដែលមានស្រាប់ទាំងនេះ នឹងបន្តរីកចម្រើនលូតលាស់បន្ថែមទៀតនាពេលអនាគត ដើម្បីបម្រើផលប្រយោជន៍ ជាមូលដ្ឋាន នៃប្រជាជនយើងទាំងពីរ ឆ្ពោះទៅរកការបង្កើតសហគមន៍អនាគតរួមគ្នា"។

ជាមួយគ្នានោះដែរសម្តេចប្រធានរដ្ឋសភាក៏សូមថ្លែងអំណរគុណយ៉ាងជ្រាលជ្រៅចំពោះសាធារណរដ្ឋ ប្រជាមានិតចិន ដែលបានផ្តល់ជំនួយជាបន្តបន្ទាប់យ៉ាងច្រើនសន្ធឹកសន្ធាប់ក្នុងការរួមចំណែកអភិវឌ្ឍប្រទេស កម្ពុជា។ បន្ថែមលើនេះ យើងខ្ញុំសូមកោតសរសើរយ៉ាងជ្រាលជ្រៅ ចំពោះតួនាទីដែលមិនអាចខ្វះបាន និងការ គាំទ្រឥតងាករេរបស់សាធារណរដ្ឋប្រជាមានិតចិន ចំពោះកិច្ចព្រមព្រៀងបទឈប់បាញ់នាពេលថ្មីៗនេះ រវាង កម្ពុជា និងថៃ ដែលមិនត្រឹមតែដើម្បីផលប្រយោជន៍ដល់ប្រទេសជិតខាងទាំងពីរប៉ុណ្ណោះទេ ប៉ុន្តែដើម្បីថែរក្សា សន្តិភាព និងស្ថិរភាព នៅក្នុងតំបន់ និងលើពិភពលោកផងដែរ។
សម្តេចក៏សូម ឯកឧត្តមប្រធាន មេត្តាទទួលនូវការគោរពរាប់អានដ៏ជ្រាលជ្រៅពីខ្ញុំ និងសូមជូនពរ ឯកឧត្តម ប្រធាន ទទួលបាននូវសុខភាពល្អបរិបូរណ៍ និងជោគជ័យគ្រប់ភារកិច្ច ព្រមទាំងសូមជូនពរដល់សាធារណរដ្ឋ ប្រជាមានិតចិន និងប្រជាជនចិន បន្តរីកចម្រើន និងទទួលបាននូវវិបុលភាពជានិច្ចនិរន្តរ៍៕

ដោយ ៖ ប៊ុនរិទ្ធ