AKP បន្ទាយមានជ័យ ថ្ងៃទី២៥ ខែកញ្ញា ឆ្នាំ២០២៥--

ក្នុងបរិយាកាសដ៏កក់ក្តៅ និងពោរពេញដោយការយកចិត្តទុកដាក់ខ្ពស់ ឯកឧត្តម អ៊ុ រាត្រី អភិបាលខេត្តបន្ទាយមានជ័យ រួមជាមួយក្រុមការងារ នាព្រឹកថ្ងៃទី២៥ ខែកញ្ញា ឆ្នាំ២០២៥ បានអញ្ជើញជួបសំណេះសំណាល និងជូនដំណើរយ៉ាងស្និទ្ធស្នាលដល់បងប្អូនប្រជាពលរដ្ឋរាប់រយនាក់ ដែលបានឡើងជិះរថយន្តក្រុងដឹកជញ្ជូនឥតគិតថ្លៃ ដើម្បីវិលត្រឡប់ទៅបំពេញការងារ និងមុខរបររៀងៗខ្លួន នៅបណ្តារាជធានី-ខេត្តវិញ ក្រោយបញ្ចប់ឱកាសបុណ្យភ្ជុំបិណ្ឌប្រពៃណីជាតិខ្មែរ។ សកម្មភាពនេះបានគូសបញ្ជាក់ជាថ្មីអំពីការអនុវត្តជាក់ស្តែងនូវគោលនយោបាយយកចិត្តទុកដាក់របស់រាជរដ្ឋាភិបាលកម្ពុជា ចំពោះសុខទុក្ខ និងជីវភាពរបស់ប្រជាពលរដ្ឋ ជាពិសេសក្នុងឱកាសពិធីបុណ្យជាតិធំៗ។

ថ្លែងក្នុងពិធីជូនដំណើរនោះ ឯកឧត្តម អ៊ុ រាត្រី បានសង្កត់ធ្ងន់ថា ការផ្តល់ជូនសេវាកម្មរថយន្តក្រុងធ្វើដំណើរឥតគិតថ្លៃនេះ គឺជាការបង្ហាញពីការយកចិត្តទុកដាក់ដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលតែងតែគិតគូរអំពីការកាត់បន្ថយបន្ទុកចំណាយ និងការសម្រួលការធ្វើដំណើរជូនពលរដ្ឋ។ ការផ្តល់ជូនរថយន្តក្រុងធ្វើដំណើរ ដោយឥតគិតថ្លៃ ជាការយកចិត្តទុកដាក់ដ៏ខ្ពង់ខ្ពស់របស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។ សម្រាប់ខេត្តបន្ទាយមានជ័យ រដ្ឋបាលខេត្តបានសហការជាមួយរដ្ឋបាលរាជធានីភ្នំពេញ បានត្រៀមរថយន្តក្រុង និងរថយន្តជាច្រើនគ្រឿង ដើម្បីអន្តរាគមន៍ដឹកជញ្ជូនបងប្អូនប្រជាពលរដ្ឋនិវត្តន៍ទៅបំពេញការងារវិញ ចាប់អនុវត្តពីថ្ងៃទី២០ ដល់ថ្ងៃទី២៥ ខែកញ្ញា ឆ្នាំ២០២៥។

ទន្ទឹមនឹងការថ្លែងអំណរគុណចំពោះការយកចិត្តទុកដាក់ពីថ្នាក់ដឹកនាំជាតិ ឯកឧត្តម អ៊ុ រាត្រី ក៏បានលើកឡើងអំពីការប្តេជ្ញាចិត្តរបស់រាជរដ្ឋាភិបាលក្នុងការបង្កើតការងារជូនប្រជាពលរដ្ឋ ទោះបីជាក្នុងកាលៈទេសៈប្រទេសជាតិមានបញ្ហាប្រឈមពីការឈ្លានពានរបស់ទាហានថៃក៏ដោយ។ នេះគឺជាការយកចិត្តទុកដាក់មួយ ដែលជាការបម្រើគោលនយោបាយយ៉ាងពិតប្រាកដ សម្រាប់ប្រជាជនទាំងអស់គ្នា ក្រោមការដឹកនាំយ៉ាងប៉ុនប្រសព្វរបស់សម្ដេចមហាបវរធិបតី ហ៊ុន ម៉ាណែត។ ឯកឧត្តមក៏បានគូសបញ្ជាក់ពីកិច្ចខិតខំប្រឹងប្រែងផ្ទាល់ខ្លួនក្នុងនាមជាអភិបាលខេត្ត ដើម្បី "ខិតខំរកគ្រប់មធ្យោបាយទាំងអស់ ដើម្បីបង្កើនការងារ ជូនប្រជាពលរដ្ឋយើង មានការងារធ្វើនៅនឹងមូលដ្ឋាន" ក្នុងខេត្តបន្ទាយមានជ័យ ដែលជាខេត្តជាប់ព្រំដែនដ៏សំខាន់មួយ។

មុនពេលបងប្អូនចេញដំណើរ ឯកឧត្តម អ៊ុ រាត្រី ក៏បានជូនពរដល់ប្រជាពលរដ្ឋទាំងអស់ដែលធ្វើដំណើរចេញពីខេត្តបន្ទាយមានជ័យ ឆ្ពោះទៅបណ្តារាជធានី-ខេត្ត សូមបានប្រកបតែសុខសុវត្ថិភាព និងជួបប្រទះតែពុទ្ធពរទាំង៤ប្រការ គឺ អាយុ វណ្ណៈ សុខៈ ពលៈ និងបានអំពាវនាវដល់បងប្អូនប្រជាពលរដ្ឋឱ្យមានការជឿជាក់លើប្រមុខរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត ដោយសម្តេចទាំងពីរតែងតែ គិតគូរខ្ពស់ គ្រប់វិនាទី សម្រាប់សេចក្តីសុខ សុវត្ថិភាពរបស់បងប្អូនយើងទូទាំងប្រទេស។

ជាមួយគ្នានេះដែរ ប្រជាពលរដ្ឋជាច្រើនរូបដែលកំពុងត្រៀមចេញដំណើរ បានសម្តែងនូវក្តីសប្បាយរីករាយ និងថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល និងអាជ្ញាធរខេត្ត ដែលបានផ្តល់សេវាកម្មដឹកជញ្ជូនឥតគិតថ្លៃនេះ ក្នុងនោះ អ្នកស្រី សុខុម ដែលមកពីស្រុកមង្គលបូរី បានលើកឡើងថា «ខ្ញុំអរគុណណាស់! ការជិះឡានក្រុងឥតគិតថ្លៃនេះ បានជួយកាត់បន្ថយចំណាយលុយបានច្រើនសម្រាប់ខ្ញុំ ហើយការធ្វើដំណើរមានសុវត្ថិភាពជាងមុន ព្រោះយើងមិនបារម្ភរឿងឡានតម្លើងថ្លៃ»។ កញ្ញា ម៉ារី ជាកម្មការិនីរោងចក្រ មកពីក្រុងប៉ោយប៉ែត បានថ្លែងថា «ខ្ញុំមានអារម្មណ៍កក់ក្តៅណាស់ ដែលឯកឧត្តម អភិបាលខេត្ត ចុះមកជួបផ្ទាល់ និងជូនពរយើង។ ពួកខ្ញុំជឿជាក់លើថ្នាក់ដឹកនាំ ដែលតែងតែនឹកឃើញដល់កូនក្មួយកម្មករដូចពួកខ្ញុំនេះ»។

សេវាកម្មដឹកជញ្ជូនឥតគិតថ្លៃនេះ មិនត្រឹមតែជាការជួយសម្រួលដល់ការធ្វើដំណើរ និងកាត់បន្ថយចំណាយប៉ុណ្ណោះទេ ប៉ុន្តែថែមទាំងជាស្ពានភ្ជាប់ទំនាក់ទំនងដ៏រឹងមាំរវាងថ្នាក់ដឹកនាំ និងប្រជាពលរដ្ឋ តាមរយៈការអនុវត្តជាក់ស្តែងនៃគោលនយោបាយមនុស្សធម៌ និងការអភិវឌ្ឍប្រកបដោយចីរភាព៕

ដោយ ឈុន សារ៉ាត