AKP ភ្នំពេញ ថ្ងៃទី២៥ ខែកញ្ញា ឆ្នាំ២០២៥ -- លោកជំទាវ Vivian Loss Sanmartin ឯកអគ្គរដ្ឋទូតសាធារណរដ្ឋសហព័ន្ធប្រេស៊ីល តែងតាំងថ្មីប្រចាំនៅកម្ពុជា បានមានប្រសាន៍ថា ប្រេស៊ីល នឹងពិចារណាក្នុងការរៀបចំឱ្យមានគ្រូបង្វឹក មកកាន់ព្រះរាជាណាចក្រកម្ពុជា ក្នុងការបណ្ដុះបណ្ដាលផ្នែកកីឡាបាល់ទាត់ បាល់ទះ។ នេះបើយោតាមការឱ្យដឹងរបស់ឯកឧត្ដម ជា ធីរិទ្ធ អ្នកនាំពាក្យព្រឹទ្ធសភា បន្ទាប់ពីសម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី នៃព្រះរាជាណាចក្រកម្ពុជា អនុញ្ញាតឱ្យលោកជំទាវ Vivian Loss Sanmartin ឯកអគ្គរដ្ឋទូតសាធារណរដ្ឋសហព័ន្ធប្រេស៊ីល តែងតាំងថ្មីប្រចាំនៅព្រះរាជាណាចក្រកម្ពុជា ចូលជួបសម្ដែងការគួរសម និងជូនសាតាំង នាព្រឹកថ្ងៃទី២៥ ខែកញ្ញា ឆ្នាំ២០២៥ នៅវិមានព្រឹទ្ធសភា។

ក្នុងជំនួបនោះ សម្ដេចតេជោ ហ៊ុន សែន បានសម្ដែងនូវការស្វាគមន៍ ក្នុងព្រះបរមនាមព្រះមហាក្សត្រនៃព្រះរាជាណាចក្រកម្ពុជា ចំពោះលោកជំទាវ ដោយបានចាត់ទុកវត្តមានលោកជំទាវ Vivian Loss Sanmartin ជាផ្នែកមួយដ៏សំខាន់ក្នុងការពង្រីកទំនាក់ទំនងរវាង កម្ពុជា និងប្រេស៊ីល។ សម្ដេចតេជោក៏បានបង្ហាញនូវក្ដីរីករាយផងដែរ ដែលសហព័ន្ធប្រេស៊ីលបានដាក់នៅនិវេសនដ្ឋានទូតនៅក្នុងព្រះរាជាណាចក្រកម្ពុជា ជាលើកដំបូង ដែលជាផ្នែកមួយក្នុងការជំរុញទំនាក់ទំនងទ្វេភាគីរវាងកម្ពុជា និងប្រេស៊ីល ឱ្យកាន់តែរីកចម្រើន។ 

លោកជំទាវឯកអគ្គរដ្ឋទូតប្រេស៊ីល បានសម្ដែងនូវការអរគុណចំពោះសម្ដេចតេជោប្រមុខរដ្ឋស្ដីទី ដែលបានអនុញ្ញាតឱ្យលោកជំទាវបានចូលជួប ហើយប្រគល់សារតាំងចំពោះសម្ដេចប្រមុខរដ្ឋស្ដីទី និងបានជម្រាបជូនសម្ដេចថា ក្នុងបេសកកម្មការទូតរបស់លោកជំទាវ នៅក្នុងព្រះរាជាណាចក្រកម្ពុជា នឹងធ្វើយ៉ាងណា ជំរុញនូវទំនាក់ទំនងទ្វេភាគីរវាងកម្ពុជា និងប្រេស៊ីល ឱ្យមានភាពល្អប្រសើរកាន់តែខ្លាំងឡើងបន្ថែមទៀត ជាពិសេសក្នុងការជំរុញក្នុងវិស័យសេដ្ឋកិច្ច ពាណិជ្ជកម្ម រវាងកម្ពុជា និងប្រេស៊ីលឱ្យមានការកើនឡើង។ លោកជំទាវ Vivian Loss Sanmartin បានរំលេចអំពីការពង្រីកកិច្ចសហប្រតិបត្តិការក្នុងវិស័យនានា រវាងកម្ពុជា និងប្រេស៊ីល ក្នុងនោះក៏មានការពង្រីកនូវទំនាក់ទំនងទាំងរដ្ឋាភិបាល ទាំងស្ថាប័ននីប្បញ្ញត្តិ ដោយលោកជំទាវជំរុញឱ្យប្រទេសទាំងពីរបង្កើននូវកិច្ចសហប្រតិបត្តិការ ជាពិសេសក្នុងស្ថាប័ននីប្បញ្ញត្តិ រវាងប្រទេសទាំងពីរឱ្យមានភាពល្អប្រសើរបន្ថែមទៀត។

សម្ដេចតេជោប្រមុខរដ្ឋស្ដីទី បានសម្ដែងនូវការរីរាយចំពោះការលើកឡើងក្នុងការជំរុញ វិស័យសេដ្ឋកិច្ច ពាណិជ្ជកម្ម រវាងប្រទេសទាំងពីរឱ្យមានការកើនឡើង ដោយសម្ដេចតេជោបានលើកឡើងថា ទំនាក់ទំនងដ៏ល្អទៅមុខលឿនបាន វាអាស្រ័យទៅលើសេដ្ឋកិច្ច ពាណិជ្ជកម្ម។ ដូច្នេះ ប្រសិនបើរដ្ឋាភិបាលប្រទេសទាំងពីរ កម្ពុជា និងប្រេស៊ីល ខិតខំប្រឹងប្រែងពង្រីកពាណិជ្ជកម្មរវាងប្រទេសទាំងពីរឱ្យមានការកើនឡើង។ សម្ដេចតេជោ ក៏បានរំលេចបន្ថែមទៀតអំពីការស្វាគមន៍ចំពោះគំនិតរបស់លោកជំទាវឯកអគ្គរដ្ឋទូតប្រេស៊ីល ក្នុងការពង្រីកនូវកិច្ចសហប្រតិបត្តិការរវាងស្ថាប័ននីប្បញ្ញត្តិរវាងប្រទេសទាំងពីរ ដោយសម្ដេចបានបញ្ជាក់នូវគំនិតផ្ដួចផ្ដើមរបស់សម្ដេចថា ប្រទសទាំងពីរគួរតែបង្កើតនូវក្រុមមិត្តភាពសភារវាងប្រទេសទាំងពីរ ទាំងស្ថាប័នសភា និងព្រឹទ្ធសភា។ ចំពោះវិស័យកីឡា សម្ដេចតេជោបានលើកឡើងថា ប្រទេសប្រេស៊ីលជាប្រទេសមានសក្ដានុពលលើវិស័យកីឡា ពិសេសកីឡាបាល់ទាត់ បាល់ទះ ដែលមានធនធានមនុស្សដ៏ល្អៗ។ ដូច្នេះ ភាគីទាំងពីរកម្ពុជា និងប្រេស៊ីល គួរតែពង្រីកវិស័យកីឡាជាមួយគ្នា ជាពិសេសគឺការបញ្ជូនគ្រូបង្វឹករបស់ប្រេស៊ីលមកជួយបង្វឹក ផ្នែកកីឡារបស់កម្ពុជា ដូចជា កីឡាបាល់ទាត់ និងកីឡាបាល់ទះ ដែលជាផ្នែកមួយដ៏សំខាន់ ក្នុងការរឹតចំណងមិត្តភាពរវាងប្រទេសទាំងពីរ ក៏ដូចជាការផ្លាស់ប្ដូររវាងប្រជាជន និងប្រជាជនរវាងប្រទេសទាំងពីរឱ្យកាន់តែមានភាពរីកចម្រើន។ 
ឆ្លើយតប និងការលើកឡើងរបស់សម្ដេចតេជោ លោកជំទាវ Vivian Loss Sanmartin បានបញ្ជាក់ថា ប្រេស៊ីល នឹងពិចារណាក្នុងការរៀបចំឱ្យមានគ្រូបង្វឹក មកកាន់ព្រះរាជាណាចក្រកម្ពុជា ក្នុងការបណ្ដុះបណ្ដាលផ្នែកកីឡាបាល់ទាត់ បាល់ទះ នៅក្នុងព្រះរាជាណាចក្រកម្ពុជា។

ចំពោះបញ្ហាព្រំដែនរវាងកម្ពុជា និងថៃ សម្ដេចតេជោ ប្រមុខរដ្ឋស្ដីទីក៏បានពន្យល់លោកជំទាវឯកអគ្គរដ្ឋទូតប្រេស៊ីល អំពីសារបាននៃបញ្ហារវាងព្រំដែននៃប្រទេសទាំងពីរ ដែលក្នុងនោះ ជំទាវឯកអគ្គរដ្ឋទូតប្រេស៊ីល បានឆ្លើយតបទៅកាន់សម្ដេចតេជោថា ប្រេស៊ីលគាំទ្រការដោះស្រាយបញ្ហាដោយសន្តិវិធី រវាងកម្ពុជា និងថៃ ដោយលោកជំទាវជំរុញឱ្យភាគីទាំងពីរគោរពនូវបទឈប់បាញ់ ឈានទៅដោះស្រាយបញ្ហាវិលមករកប្រតីភាពឡើងវិញ៕

ដោយ៖ ជឹម ណារី