AKP ភ្នំពេញ ថ្ងៃទី២២ ខែសីហា ឆ្នាំ២០២៥--ដើម្បីបង្ហាញពីទិដ្ឋភាពពិតនៃផលប៉ះពាល់បណ្ដាលមកពីជម្លោះប្រដាប់អាវុធ ប្រជាជនភៀសសឹកតាមទីកន្លែងដែលរងផលប៉ះពាល់ និងការពិនិត្យមើលពីការវិវត្ដថ្មីៗក្រោយបទឈប់បាញ់រវាងកម្ពុជា និងថៃ ក្រសួងការបរទេស និងសហប្រតិបត្ដិការអន្ដរជាតិ នៅថ្ងៃ២២-២៣ ខែសីហា ឆ្នាំ២០២៥នេះ បានរៀបចំដំណើរទស្សនកិច្ចសង្កេតការណ៍មួយដែលដឹកនាំដោយឯកឧត្ដម ប្រាក់ សុខុន ឧបនាយករដ្ឋមន្រ្ដី រដ្ឋមន្រ្ដីក្រសួងការបរទេស និងសហប្រតិបត្តិការអន្ដរជាតិជូនដល់គណៈប្រតិភូអង្គទូតបរទេស ភ្នាក់ងារអង្គការសហប្រជាជាតិប្រចាំកម្ពុជា ដែលមានស្នាក់ការនៅកម្ពុជា និងនៅក្រៅប្រទេស ចុះពិនិត្យផ្ទាល់តាមតំបន់ព្រំដែនក្នុងខេត្ដឧត្ដរមានជ័យ បន្ទាយមានជ័យ និងខេត្ដសៀមរាប។

ថ្លែងក្នុងសន្និសីទសារព័ត៌មាន នាព្រឹកថ្ងៃទី២២ ខែសីហា ឆ្នាំ២០២៥ ឯកឧត្តម នង សាកល អនុរដ្ឋលេខាធិការ និងជាអ្នកនាំពាក្យរងក្រសួងការបរទេស និងសហប្រតិបត្តិការអន្តរជាតិបានបញ្ជាក់ថា ឯកឧត្តម ប្រាក់ សុខុន ឧបនាយករដ្ឋមន្ត្រីរដ្ឋមន្ត្រីក្រសួងការបរទេស និងសហប្រតិបត្ដិការអន្ដរជាតិដឹកនាំគណៈប្រតិភូពីបណ្តាអង្គទូតនានាប្រចាំនៅកម្ពុជា និងមកពីខាងក្រៅប្រទេសចុះទស្សនកិច្ចពិនិត្យមើលស្ថានភាពជាក់ស្តែងនៅតាមព្រំដែននិងជនភៀសសឹក ក្រោយកម្ពុជាអនុវត្តន៍នូវបទឈប់បាញ់ នៅថ្ងៃទី២២ -២៣ ខែសីហា ឆ្នាំ២០២៥នេះ។ ឯកឧត្តមអ្នកនាំពាក្យបានលើកឡើងថា គោលបំណងនៃដំណើរទស្សនកិច្ចដែលមានអ្នកចូលរួម៦៣នាក់នេះ ដើម្បីបង្ហាញពីទិដ្ឋភាពពិតនៃផលប៉ះពាល់បណ្ដាលមកពីជម្លោះប្រដាប់អាវុធ ការភៀសសឹកនៃប្រជាពលរដ្ឋតាមទីកន្លែងរងផលប៉ះពាល់ និងបានពិនិត្យមើលពីការវិវត្ដថ្មីៗក្រោយបទឈប់បាញ់។ 

ឯកឧត្ដមក៏បានបញ្ជាក់ផងដែរថា កាលពីរសៀលថ្ងៃទី២១ ខែសីហា ឆ្នាំ២០២៥ នៅទីស្តីការក្រសួងការបរទេសនិងសហប្រតិបត្តិការអន្តរជាតិ មានកិច្ចប្រជុំមួយដែលដឹកនាំដោយឯកឧត្តម ឧបនាយករដ្ឋមន្រ្ដី ប្រាក់ សុខុន ដើម្បីជម្រាបជូនពីការវិវត្តថ្មីៗនៃបញ្ហាជម្លោះព្រំដែនកម្ពុជា-ថៃ ដល់សមាជិកអង្គទូតបរទេសចំនួន៤២ប្រទេសនិងទីភ្នាក់ងារអង្គការសហប្រជាជាតិចំនួន២២ ប្រចាំនៅព្រះរាជាណាចក្រកម្ពុជា។ 

ក្នុងឱកាសនៃកិច្ចប្រជុំនោះ ឯកឧត្តមឧបនាយករដ្ឋមន្ត្រី ប្រាក់ សុខុន បានគូសបញ្ជាក់ឱ្យដឹងផងដែរថា កម្ពុជាបានប្តេជ្ញាចិត្តដ៏ម៉ឺងម៉ាត់ក្នុងការគោរពនូវបទឈប់បាញ់រវាងកម្ពុជា-ថៃ ដែលបានព្រមព្រៀងកាលពីថ្ងៃទី២៨ ខែកក្កដា ឆ្នាំ២០២៥ នៅទីក្រុង Putrajaya ប្រទេសម៉ាឡេស៊ី។ ឯកឧត្តមឧបនាយករដ្ឋមន្ត្រីក៏បានជម្រាបជូនអង្គប្រជុំអំពីស្ថានភាពមីននៅប្រទេសកម្ពុជា ជាពិសេសនៅតាមបណ្តោយព្រំដែនកម្ពុជា-ថៃ ព្រមទាំងបានអះអាងសាជាថ្មីថា កម្ពុជាបានគោរពយ៉ាងម៉ឺងម៉ាត់នូវអនុសញ្ញាស្តីពីការហាមប្រាមការប្រើប្រាស់មីនប្រឆាំងនឹងមនុស្ស (អនុសញ្ញាអូតាវ៉ា)។ 

ជាមួយគ្នានេះ ឯកឧត្តមឧបនាយករដ្ឋមន្ត្រីក៏បានបញ្ជាក់ច្បាស់ពីជំហររាជរដ្ឋាភិបាលកម្ពុជា ក្នុងការបន្តខិតខំប្រឹងប្រែងបោសសម្អាតមីនមនុស្សធម៌ក្នុងការបម្រើគោលដៅសុវត្ថិភាពមនុស្សជាតិ ការអភិវឌ្ឍសេដ្ឋកិច្ចសង្គម និងហេដ្ឋារចនាសម្ពន្ធ័រូបវន្ត។ ឯកឧត្ដមឧបនាយករដ្ឋមន្រ្ដី ប្រាក់ សុខុន ក៏បានបន្ថែមថា រាជរដ្ឋាភិបាល មានគោលបំណងប្រកបដោយសុច្ចន្ទៈក្នុងការបោសសម្អាតមីនតាមបណ្តោយព្រំដែន ដោយបានលើកសំណើទៅកាន់ភាគីថៃក្នុងកិច្ចសហប្រតិបត្តិការ ការបោសសម្អាតមីននៅតំបន់តាមបណ្តោយព្រំដែនកម្ពុជា-ថៃ ដោយផ្តល់អាទិភាពចម្បងនៅតំបន់ណាមានប្រជាជនកំពុងរស់នៅ និងតម្រូវការខាងការអភិវឌ្ឍសេដ្ឋកិច្ចសង្គមជាមួយនឹងការកំណត់ខ្សែបន្ទាត់ព្រំដែនរួចហើយ៕

ដោយ៖ ប៊ុនរិទ្ធ