AKP ភ្នំពេញ ថ្ងៃ១៩ ខែសីហា ឆ្នាំ២០២៥-- តំណាងក្រសួងអភិវឌ្ឍន៍ជនបទ ក្រសួងកសិកម្ម រុក្ខាប្រមាញ់ និងនេសាទ ក្រសួងធនធានទឹក និងឧតុនិយម ដែលជាសហប្រធានក្រុមការងារត្រី-វិស័យ (កសិកម្ម-ទឹក-ជនបទ) និងអាជ្ញាធរដែនដី កាលពីថ្ងៃចន្ទ ទី១៨ ខែសីហា ឆ្នាំ២០២៥ បានអញ្ជើញចុះសិក្សា និងពិនិត្យសក្ដានុពលសហគមន៍កសិកម្មទំនើបដំណាំស្រូវបារាយណ៍តាំងគោក នៅភូមិថ្នល់ជាតិ ឃុំបារាយណ៍ ស្រុកបារាយណ៍ ខេត្តកំពង់ធំ។

គោលបំណងនៃការចុះពិនិត្យគឺដើម្បីសិក្សាស្វែងយល់ដឹងពីដំណើរការប្រតិបត្តិ សក្តានុពល តម្រូវការ និងបញ្ហាប្រឈមនានារបស់សហគមន៍ ដើម្បីក្រុមការងារដាក់បញ្ចូលជាគោលដៅនៃផែនការសម្រាប់ការអនុវត្តសកម្មភាពត្រីវិស័យ។ ជាលទ្ធផលក្រុមការងារពិនិត្យឃើញថា សហគមន៍មានសក្តានុពលដី និងទឹកស្រោចស្រព ហើយបាននិងកំពុងដំណើរការក្រោមការសម្របសម្រួលពីក្រសួងកសិកម្ម រុក្ខាប្រមាញ់ និងនេសាទ លើការប្រតិបត្តិការសហគមន៍កសិកម្មទំនើប ដែលមានដីសម្រាប់ការដំណាំស្រូវចំនួន២០០០ហិកតា។ 

ជាការឆ្លើយតបទៅនឹងសំណូមពររបស់សហគមន៍ ដែលស្នើឱ្យមានការដោះស្រាយតម្រូវការទឹកស្រោចស្រព ដែលមានប្រឡាយ និងផ្តល់ស្ថានីយបូមទឹករបស់រដ្ឋ ក្រោមការសម្របសម្រួលពីរដ្ឋបាលខេត្ត មកដល់សហគមន៍គ្រប់គ្រងប្រើប្រាស់ ក្រុមការងារស្នើដល់សហគមន៍ រៀបចំផែនការសកម្មភាពគ្រប់គ្រង ប្រតិបត្តិ និងលក្ខន្តិកៈឱ្យគ្រប់គ្រាន់ ដោយសាររដ្ឋបាលខេត្ត រង់ចាំឱ្យសហគមន៍មានសមត្ថភាពគ្រប់គ្រងស្ថានីយដោយខ្លួនឯង។ ក្រោយពេលស្ដាប់បទបង្ហាញ និងប្រជុំពិភាក្សាក្រុមការងារបានចុះពិនិត្យទីតាំងស្ថានីយ៍បូមទឹករបស់សហគមន៍ និងស្ថានីយបូមទឹករបស់រដ្ឋ ដំណើរការដោយក្រុមហ៊ុនឯកជន សម្របសម្រួលដោយរដ្ឋបាលខេត្តផងដែរ៕

ដោយ៖ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)