AKP ភ្នំពេញ ថ្ងៃទី១៨ ខែសីហា ឆ្នាំ២០២៥

ឯកឧត្តមបណ្ឌិត លី ធុជ ទេសរដ្ឋមន្ត្រី អនុប្រធានទី១ អាជ្ញាធរមីនបានប្រកាសបដិសេធយ៉ាងដាច់អហង្ការចំពោះការចោទប្រកាន់ដោយគ្មានការពិតរបស់ភាគីថៃ ដែលថាកម្ពុជាបានដាក់មីនថ្មីបង្កគ្រោះថ្នាក់ដល់ទាហានរបស់ខ្លួនជាបន្តបន្ទាប់នាពេលថ្មីៗកន្លងមកនេះ និងបានអះអាងថានៅតាមខ្សែបន្ទាត់ព្រំដែនរវាងកម្ពុជាថៃគឺមានគ្រាប់មីនដែលបន្សល់ទុកពីសង្គ្រាមច្រើនណាស់ គឺវាគ្រប់គ្រាន់ដោយមិនចាំបាច់ដាក់ថ្មីទៀតទេ។ ឯកឧត្ដមបណ្ឌិតបានលើកឡើងថា ដូច្នេះដើម្បីបញ្ចៀសគ្រោះថ្នាក់ដោយសារមីន សូមកងកម្លាំងរបស់ថៃកុំចល័តចូលមកទឹកដីកម្ពុជាឱ្យសោះ។ ការបញ្ជាក់យ៉ាងដូច្នេះរបស់ឯកឧត្ដមអនុប្រធានទី១ អាជ្ញាធរមីនបែបនេះ ធ្វើឡើងក្នុងសន្និសីទសារព័ត៌មាន ស្តីពីការចោទប្រកាន់របស់ថៃមកលើកម្ពុជាអំពីការដាក់មីនថ្មី និងជំហរកម្ពុជាក្នុងនាមជារដ្ឋភាគីនៃអនុសញ្ញាហាមប្រាមការប្រើប្រាស់មីនប្រឆាំងមនុស្សគឺ (អនុសញ្ញាអូតាវ៉ា) នាព្រឹកថ្ងៃទី១៨ ខែសីហា ឆ្នាំ២០២៥។

ឯកឧត្តមបណ្ឌិត លី ធុជ មានប្រសាសន៍ថា វាជាការគួរឱ្យសោកស្តាយដែលភាគីថៃបានបំពានទាំង កម្រោលមកលើកម្ពុជាក្រោយពីមានយោធារបស់ខ្លួនជាន់មីនដាច់ជើង ថៃក៏បានបើកការវាយប្រហារ ដោយប្រដាប់អាវុធមកលើកម្ពុជាកាលពីថ្ងៃទី២៤ ខែកក្កដា ឆ្នាំ២០២៥ ដែលមានរយៈពេល៥ថ្ងៃជាប់ៗគ្នាបង្កជាវិនាសកម្មមកលើអាយុជីវិតកងទ័ព ជនស៊ីវិល ហេដ្ឋារចនាសម្ព័ន្ធ វត្តអារាម ជាពិសេសគឺប្រាសាទព្រះវិហាររបស់ខ្មែរ ហើយក៏ជាសម្បត្តិបេតិកភណ្ឌពិភពលោកផងដែរនោះបានទទួលរងនូការ បំផ្លិចបំផ្លាញដ៏គួរឱ្យសោកស្តាយជាទីបំផុត ដែលទង្វើរបស់ថៃបែបនេះគឺមិនសមទាល់តែសោះ។ ឯកឧត្តមបានគូសបញ្ជាក់ថា ការដែលភាគីថៃបានធ្វើការចោទប្រកាន់មកលើកម្ពុជាថាបានដាក់មីនថ្មី គឺជាការប្រមាថចំពោះកិច្ចខិតខំប្រឹងប្រែងពីគ្រប់ភាគីពាក់ព័ន្ធនៅក្នុងកិច្ចការបោសសម្អាតមីន និងយុទ្ធភណ្ឌមិនទាន់ផ្ទុះនៅកម្ពុជា ជាការប្រមាថនៃការចូលរួមរបស់កម្ពុជាក្នុងនាមជារដ្ឋភាគីនៃអនុសញ្ញាហាមប្រាមការប្រើប្រាស់មីនប្រឆាំងមនុស្ស (អនុសញ្ញាអូតាវ៉ា) ហើយក៏ជាការបន្ថែមនូវក្តីឈឺចាប់ចំពោះជនរងគ្រោះដោយសារគ្រាប់មីនថែមទៀតផង។

ឯកឧត្តមបណ្ឌិត លី ធុជ ក៏បានអំពាវនាវទៅដល់ភាគីថៃឱ្យបញ្ឈប់ជាបន្ទាន់នូវការចោទប្រកាន់ដោយគ្មានការពិត និងដោយឥតអៀនខ្មាសមកលើកម្ពុជា រួមទាំងការប្រឌិតរឿងក្លែងក្លាយដើម្បីបោកប្រាស់មតិជាតិ អន្តរជាតិទាក់ទិនទៅនឹងបញ្ហាគ្រាប់មីននេះ។
ជាមួយគ្នានេះដែរ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា(CMAC)បានថ្លែងបញ្ជាក់ថា នៅតាមខ្សែបន្ទាត់ព្រំដែនកម្ពុជា-ថៃ ដែលមានប្រវែងជាង៧០០គីឡូម៉ែត្រគឺមានគ្រាប់មីន និងយុទ្ធភណ្ឌមិនទាន់ផ្ទុះដែលបន្សល់ទុកតាំងពីសម័យសង្គ្រាមស៊ីវិលនៅកម្ពុជាច្រើនណាស់ និងថែមទាំងមិនដែលបានធ្វើការបោសសម្អាតថែមទៀតផង។ ឯកឧត្ដមបន្ដថា ដូច្នេះសូមភាគីថៃមិនចាំបាច់ធ្វើការចោទប្រកាន់ថាកម្ពុជាបានដាក់មីនថ្មីនោះទេ ព្រោះមីនចាស់វាបានបន្សល់ទុកច្រើនណាស់ស្រាប់ទៅហើយនៅតាមបណ្តោយព្រំដែននៃ ប្រទេសទាំងពីរ។

ឯកឧត្តម ហេង រតនា បានបញ្ជាក់បន្ថែមថា ការផ្ទុះមីនបង្កគ្រោះថ្នាក់ដល់កងកម្លាំងថៃបានក្លាយជាឈ្នួនសម្រាប់ថៃក្នុងការផ្ទុះអាវុធយ៉ាងមានគ្រោះថ្នាក់ជាមួយកងកម្លាំងកម្ពុជា ដោយឯកឧត្តមបានអះអាងថា កម្ពុជាពិតជាបានគោរពយ៉ាងត្រឹមត្រូវ និងយ៉ាងខ្ជាប់ខ្ជួននូវអនុសញ្ញាអូតាវ៉ាក្នុងនាមខ្លួនជារដ្ឋភាគីនៃអនុសញ្ញាហាមប្រាមការប្រើប្រាស់មីនប្រឆាំងមនុស្ស ដោយកម្ពុជាគ្មានគ្រាប់មីនស្តុកទុកក្នុងឃ្លាំងទេ ហើយក៏គ្មានមីនថ្មីដើម្បីយកទៅដាក់នោះដែរ។ ផ្ទុយទៅវិញកម្ពុជាមានតែខិតខំប្រឹងប្រែងក្នុងការបោសសម្អាតមីន និងយុទ្ធភណ្ឌមិនទាន់ផ្ទុះដើម្បីយកដីផ្តល់ជូនពលរដ្ឋកសាងភូមិឋាន កសាងជីវិតរស់នៅប្រចាំថ្ងៃ និងធ្វើការអភិវឌ្ឍ ដោយប្រែក្លាយតំបន់ដែលធ្លាប់មានមីនឱ្យទៅជាតំបន់អភិវឌ្ឍន៍ និងផ្តល់ជូននូវការរស់នៅចំពោះប្រជាពលរដ្ឋដោយគ្មានការភ័យខ្លាចដោយសារមីន។ 

ឯកឧត្ដមអគ្គនាយកស៊ីម៉ាក់ក៏បានលើកឡើងទៀតថា ចំពោះតំបន់នៅតាមខ្សែបន្ទាត់ព្រំដែនកម្ពុជា-ថៃ ក៏នឹងត្រូវធ្វើការបោសសម្អាតមីនដូចគ្នានៅក្រោយបញ្ហាព្រំដែនត្រូវបានដោះស្រាយជាមួយគ្នាដាច់ស្រេច ដើម្បីប្រែក្លាយព្រំដែនរួមឱ្យក្លាយជាព្រំដែនសន្តិភាព និងការអភិវឌ្ឍសម្រាប់ប្រជាជននៃប្រទេសទាំងពីរកម្ពុជា-ថៃ៕

ដោយ៖ ចាន់ សុភឿន រូបថត៖ យឹម សុវឌ្ឍនា