AKP ភ្នំពេញ ថ្ងៃទី១៨ ខែសីហា ឆ្នាំ២០២៥--អ្នកនាំពាក្យក្រសួងការពារជាតិកម្ពុជាបានអះអាងឱ្យដឹងថា ស្ថានភាពនៅតាមបន្ទាត់ព្រំដែននៅខេត្តព្រះវិហារខេត្តឧត្តរមានជ័យ និងខេត្តបន្ទាយមានជ័យ មានសភាពស្ងប់ស្ងាត់ តែកងកម្លាំងកម្ពុជានៅតែប្រុងប្រយ័ត្នជានិច្ច ខណៈដែលគិតមកដល់ពេលនេះកងទាហានកម្ពុជាចំនួន ១៨រូប ដែលទាហានថៃចាប់ខ្លួនមានរយៈពេល ១៩ថ្ងៃមកហើយ។

ថ្លែងក្នុងសន្និសីទសារព័ត៌មាននាព្រឹកថ្ងៃទី១៨ ខែសីហា ឆ្នាំ ២០២៥ លោកជំទាវឧត្តមសេនីយ៍ឯក ម៉ាលីសុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិលើកឡើងថា គិតចាប់ពីម៉ោង ១២៖០០នាទី យប់ថ្ងៃទី១៨ សីហាឆ្នាំ ២០២៥ មកដល់ម៉ោង ៧៖០០ នាទី ព្រឹកនេះ ស្ថានការណ៍នៅតាមបន្ទាត់ព្រំដែន ខេត្តព្រះវិហារ ឧត្តរមានជ័យ និងខេត្ដបន្ទាយមានជ័យ មានសភាពស្ងប់ស្ងាត់ប៉ុន្តែកងកម្លាំងកម្ពុជានៅតែប្រុងប្រយ័ត្នខ្ពស់ជានិច្ច។ លោកជំទាវអ្នកនាំពាក្យបានបញ្ជាក់ថា គិតមកដល់ពេលនេះ មានរយៈពេល ១៩ ថ្ងៃ ហើយដែលទាហានថៃបានចាប់ខ្លួនទាហានកម្ពុជាចំនួន១៨ រូប ហើយមិនទាន់បានបញ្ជូនត្រឡប់មកវិញនោះ។ លោកជំទាវឧត្ដមសេនីយ៍ឯកបន្ដថា ទាហានកម្ពុជាទាំង ១៨ រូបនេះ ត្រូវបានទាហានថៃចាប់ខ្លួនកាលពីថ្ងៃទី២៩ ខែកក្កដា ឆ្នាំ ២០២៥ នៅពេលដែលទាហានកម្ពុជាបានគោរពបទឈប់បាញ់ តែភាគីថៃបានធ្វើការចាប់ខ្លួនទាហាន      កម្ពុជា។

លោកជំទាវឧត្ដមសេនីយ៍ឯក អ្នកនាំពាក្យក្រសួងការពារជាតិក៏បានបញ្ជាក់បន្ថែមថា កម្ពុជានៅតែគោរពបទឈប់បាញ់ដែលបានព្រមព្រៀងគ្នាកាលពីថ្ងៃទី ២៩ ខែកក្កដាកន្លងមកនៅប្រទេសម៉ាឡេស៊ី ដែលមានការចូលរួមពីម៉ាឡេស៊ី ជាប្រធានប្ដូរវេនអាស៊ាន ប្រទេសចិន សហរដ្ឋអាមេរិក ជាអ្នកសង្កេតការណ៍។

លោកជំទាវឧត្ដមសេនីយ៍ឯក អ្នកនាំពាក្យក្រសួងការពារជាតិកម្ពុជាក៏បានថ្លែងបញ្ជាក់ផងដែរថា ទាំងក្រសួងការពារជាតិ និងកងយោធពលខេមរភូមិន្ទ ព្រមទាំងអន្តរជាតិនៅតែទទួចអំពាវនាវឱ្យប្រទេសថៃធ្វើការដោះលែងបញ្ជូនទាហានកម្ពុជាដែលបានចាប់ខ្លួននោះមកឱ្យកម្ពុជាវិញឱ្យបានឆាប់រហ័ស ដើម្បីឱ្យពួកគេបានជួបក្រុមគ្រួសារដែលកំពុងតែទន្ទឹងរង់ចាំទាំងយប់ទាំងថ្ងៃ៕

ដោយ៖ ប៊ុនរិទ្ធ