AKP ព្រះសីហនុ ថ្ងៃទី១៦ ខែសីហា ឆ្នាំ២០២៥-- ឯកឧត្តម ម៉ាង ស៊ីណេត អភិបាលនៃគណ:អភិបាលខេត្តព្រះសីហនុ នាថ្ងៃសៅរ៍ ទី១៦ ខែសីហា ឆ្នាំ២០២៥ បានធ្វើការណែនាំ និងជំរុញដល់អាជ្ញាធរ កងកម្លាំងប្រដាប់អាវុធ ត្រូវយកចិត្តទុកដាក់តាមដានករណីជំនន់ទឹកភ្លៀងនៅតាមភូមិសាស្ត្រក្នុងខេត្តព្រះសីហនុ ព្រោះភ្លៀងបានធ្លាក់តាំងពីយប់ថ្ងៃទី១៥ ខែសីហា មកដល់ថ្ងៃសៅរ៍ ទី១៦ ខែសីហា ឆ្នាំ២០២៥នេះ ធ្វើឱ្យតំបន់ទំនាបមួយចំនួន ក៏ដូចជាផ្លូវនានាក្នុងក្រុងព្រះសីហនុ ត្រូវបានជន់លិចដោយជំនន់ទឹកភ្លៀងបណ្តាលឱ្យខូចខាត សម្ភារបងប្អូនប្រជាពលរដ្ឋ ក៏ប៉ុន្តែជំនន់ទឹកភ្លៀងនេះវាមិនបង្កឱ្យមានមនុស្សបាត់បង់អាយុជីវិតនោះទេ។

ក្នុងឱកាសនោះ ឯកឧត្តមអភិបាលខេត្តព្រះសីហនុក៏បានដឹកនាំមន្ត្រីជំនាញពាក់ព័ន្ធ ចុះពិនិត្យស្ថានភាពជំនន់ទឹកភ្លៀងនៅតាមអូរប្រឡាយ និងដងផ្លូវនានាក្នុងភូមិសាស្ត្រខេត្តព្រះសីហនុ ព្រមទាំងបានធ្វើការណែនាំដល់មន្ត្រីជំនាញយកគ្រឿងចក្រកាយ ស្តារអូរប្រឡាយ ដើម្បីឱ្យចរន្តទឹកហូរបានលឿនឆាប់ និងចូលរួមកាយសំរាមចេញពីមុខលូនៅតាមដងផ្លូវសាធារណៈនានាក្នុងក្រុងព្រះសីហនុ។

ទន្ទឹមនឹងនោះ ឯកឧត្តមអភិបាលខេត្តព្រះសីហនុបានធ្វើការណែនាំដល់មន្ត្រីជំនាញ និងអាជ្ញាធរពាក់ព័ន្ធត្រូវបន្តយកចិត្តទុកដាក់តាមដានជំនន់ទឹកភ្លៀងឱ្យបានជាប់ជាប្រចាំ ថាតើតំបន់ណាខ្លះដែលត្រូវត្រៀមជម្លៀសប្រជាពលរដ្ឋមកកាន់ទីទួលសុវត្ថិភាព ដោយសារស្ថានភាពភ្លៀងនៅតែបន្តធ្លាក់ឥតឈប់ឈរ ទន្ទឹមនឹងជម្លៀសប្រជាជន យើងក៏ត្រូវត្រៀមស្បៀងជួយពួកគាត់ផងដែរ។ ជាមួយគ្នានេះយើងត្រូវត្រៀមការជួសជុលទំនប់ផ្លូវចូលរមណីយដ្ឋានក្បាលឆាយដែលហូរច្រោះដាច់ផ្លូវ ស្ថិតនៅភូមិ១ សង្កាត់លេខ១ ក្រុងព្រះសីហនុ ដែលជាប្រភពទឹកស្អាតឱ្យបានរឹងមាំប្រកបដោយគុណភាព ប្រសិទ្ធភាពក្នុងការស្ទាក់ទឹកស្អាតសម្រាប់ប្រើប្រាស់។ ហើយការត្រៀមជម្លៀសប្រជាពលរដ្ឋមកកាន់ទីទួលសុវត្ថិភាព និងស្បៀងអាហារមិនត្រឹមតែសម្រាប់ក្រុងព្រះសីហនុនោះទេ យើងក៏ត្រូវត្រៀមជម្លៀសប្រជាពលរដ្ឋរបស់យើងនៅតាមបណ្តាក្រុង ស្រុកផ្សេងៗទៀតផងដែរ។

សូមរម្លឹកថា សម្ពាធទាបកើតនៅសមុទ្រចិនខាងត្បូង មានឥទ្ធិពលើសមុទ្រ អាន ដាម ម៉ែន ឈូងសមុទ្រថៃ អាងទន្លេមេគង្គលើរបបខ្យល់មូសុងនិរតី និងព្រះរាជាណាចក្រកម្ពុជា ដោយឡែកខេត្តជាប់មាត់សមុទ្រ មានដូចជាខេត្តព្រះសីហនុទទួលភ្លៀង ខ្យល់ គ្របដណ្តប់លើផ្ទៃដី ៤០ភាគរយ ហើយរលកសមុទ្រមានកម្ពស់ធម្យមអប្បបរមា០,៥០ម៉ែត្រ និងកម្ពស់មធ្យមអតិបរមា១,៥០ម៉ែត្រ៕

ដោយ ងូ សុមុនី