AKP ព្រះសីហនុ ថ្ងៃទី១៦ ខែសីហា ឆ្នាំ២០២៥-- ដោយសារភ្លៀងបន្តធ្លាក់ឥតឈប់ឈរ បានធ្វើឱ្យផ្ទះសំបែងរបស់បងប្អូនប្រជាពលរដ្ឋ និងគ្រួសារកងទ័ពស្ថិតនៅភូមិអុង សង្កាត់រាម ក្រុងកំពង់សោម ខេត្តព្រះសីហនុ ត្រូវបានជន់លិច នាព្រឹកថ្ងៃសៅរ៍ទី១៦ ខែសីហា ឆ្នាំ២០២៥។ ការជន់លិចនេះ ដោយសារសម្ពាធទាបកើតនៅសមុទ្រអានដាមម៉ែន អាងទន្លេមេគង្គលើរបបខ្យល់មូសុងនិរតី ព្រះរាជាណាចក្រកម្ពុជា។ ចំពោះខេត្តព្រះសីហនុ មានភ្លៀង និងខ្យល់ ហើ់យរលកសមុទ្រមានកម្ពស់មធ្យមអតិបរិមា១,៥០ម៉ែត្រ។

លោកឧត្តមនាវីទោ ម៉ី ឌីណា មេបញ្ជាការមូលដ្ឋានសមុទ្ររាម បានចាត់តាំងកម្លាំងដែលមាន រថយន្ត និងអូប័រខ្នាតតូច ចុះអន្តរាគមន៍ជួយចម្លង និងជម្លៀសប្រជាពលរដ្ឋ គ្រួសារកងទ័ព និងទ្រព្យសម្បត្តិមកកាន់ទីទួលមានសុវត្ថិភាព ដើម្បីការពារពីករណីគ្រោះថ្នាក់ផ្សេងដោយជំនន់ទឹកភ្លៀង ហើយសកម្មភាពជួយសង្គ្រោះប្រជាពលរដ្ឋ និងគ្រួសារកងទ័ពនេះ បានធ្វើឡើងនៅព្រឹកថ្ងៃសៅរទី១៦ ខែសីហា ឆ្នាំ២០២៥។

សូមបញ្ជាក់ថា ស្ថានភាពទឹកភ្លៀងនៅខេត្តព្រះព្រះសីហនុ នាថ្ងៃទី១៦ ខែសីហានេះ បានបន្តធ្លាក់យ៉ាងខ្លាំងគ្រប់ទីកន្លែង បណ្តាលឱ្យតំបន់មួយចំនួនមានការលិចលង់ ដូចជាផ្លូវ ទំនប់បង្ហៀរជាដើម។ ករណីខាងលើនេះ សូមបងប្អូនប្រជាពលរដ្ឋ ត្រូវមានការប្រុងប្រយ័ត្នខ្ពស់ការពារក្រុមគ្រួសារ និងទ្រព្យសម្បត្តិដែលមានតម្លៃផ្សេងៗ កុំឱ្យរងគ្រោះ និងបាត់បង់ដោយទឹកជំនន់ ហើយក្រុមការងារនៅរង់ចាំទទួលព័ត៌មាន ដើម្បីប្រមូលប្រភពក្នុងការចូលរួមជួយសង្គ្រោះប្រជាពលរដ្ឋចេញពីទឹកជំនន់មកកាន់ទីទួលសុវត្ថិភាព៕

ដោយ ងូ សុមុនី