AKP ភ្នំពេញ ថ្ងៃទី១៦ ខែសីហា ឆ្នាំ២០២៥–ថ្មីៗនេះសហគមន៍កសិកម្មទំនើបអភិវឌ្ឍន៍ដំណាំស្រូវកំពង់ធំ នៅសង្កាត់ស្រយ៉ូវ ក្រុងស្ទឹងសែន ខេត្តកំពង់ធំ បានចាប់ផ្ដើមប្រមូលផលពូជស្រូវ OM 4900 ក្រោយពីបានដាំដុះតាមការចុះកិច្ចសន្យាទុកជាមុនជាមួយក្រុមហ៊ុន BRM Agro ក្នុងតម្លៃ ១០០០រៀល ក្នុង១គីឡូក្រាម ហើយបើតាមក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ជាទូទៅក្រសួងតែងតែជំរុញសហគមន៍កសិកម្មទំនើបចុះកិច្ចសន្យាដាំដុះពូជយុទ្ធសាស្ត្រក្នុងស្រុក ប៉ុន្តែសហគមន៍ក៏អាចចុះកិច្ចសន្យាដាំដុះពូជដទៃបានដែរ ប្រសិនបើសហគមន៍ទទួលបានតម្លៃ និងលក្ខខណ្ឌល្អពីដៃគូជាអ្នកទិញ។

ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទបានថ្លែងថា នេះគឺជាការប្រមូលផលជុំដំបូងរបស់សហគមន៍កសិកម្មទំនើបអភិវឌ្ឍន៍ដំណាំស្រូវកំពង់ធំ ដែលនៅទីនេះគឺមានលក្ខណៈពិសេសខុសពីសហគមន៍កសិកម្មទំនើបដទៃ ដោយសារតែសហគមន៍កសិកម្មទំនើបនៅក្រុងស្ទឹងសែន ខេត្តកំពង់ធំនេះគឺពួកគាត់បានធ្វើការដាំដុះពូជស្រូវប្រភេទ OM 4900 ដោយបានធ្វើកិច្ចសន្យាលក់ជូនក្រុមហ៊ុនក្នុងតម្លៃ១០០០រៀល ក្នុង១គីឡូក្រាម។ ឯកឧត្តមបានគូសបញ្ជាក់ថា អ្វីដែលជាចំណុចកាន់តែពិសេសនៅក្នុងសហគមន៍កសិកម្មទំនើបអភិវឌ្ឍន៍ដំណាំស្រូវនៅ

កម្ពុជាគឺយើងមិនតម្រូវថាចាំបាច់ត្រូវតែដាំស្រូវប្រភេទណានោះទេ ដោយជាការពិតគឺក្រសួងចង់លើកទឹកចិត្តឱ្យបងប្អូនប្រជាកសិករធ្វើការដាំដុះនូវពូជយុទ្ធសាស្ត្ររបស់កម្ពុជា ប៉ុន្តែក្នុងករណីដែលយើងមានលទ្ធភាពក្នុងការស្វែងរកតម្លៃល្អសម្រាប់ពូជប្រភេទផ្សេងដែលមិនមែនជាពូជក្នុងស្រុករបស់យើងក៏យើងអាចពិចារណាធ្វើទៅបាន ដោយយកឱកាសនេះឯកឧត្តមសូមពន្យល់ និងអំពាវនាវដល់បងប្អូនប្រជាកសិករថា ការចូលរួមជាសហគមន៍កសិកម្មទំនើបគឺបានផ្តល់នូវអត្ថប្រយោជន៍ច្រើនដល់បងប្អូន ជាពិសេសក្នុងបរិបទដែលទីផ្សារមានការប្រែប្រួលថ្លៃលើសពីការរំពឹងទុកក្នុងពេលបច្ចុប្បន្ននេះ មិនមែនក្រសួងជួយបានតែអ្នកនៅក្នុងសហគមន៍ ហើយមិនអាចជួយបានកសិករដែលនៅខាងក្រៅនោះទេ ប៉ុន្តែនេះគឺជាលក្ខខណ្ឌចាំបាច់នៃទីផ្សារ ដែលទីផ្សារគេចង់បាននូវកិច្ចសន្យាមួយច្បាស់លាស់ ដែលចុះកិច្ចសន្យាហើយអាចអនុវត្តបានតែម្តង ជាហេតុធ្វើឱ្យខាងក្រុមហ៊ុនដែលជាអ្នកទិញគាត់ហ៊ានបង់ក្នុងតម្លៃមួយខ្ពស់ជាងគាត់ទិញពីកសិករធម្មតាដែលមិនមែនជាសហគមន៍ ហើយអ្វីដែលជាចំណុចរឹតតែពិសេសនោះគឺការផ្តល់នូវទុនបង្វិលសម្រាប់រដូវកាល ដែលបងប្អូនជាសមាជិកនៃសហគមន៍កសិកម្មទំនើបធ្វើការដាំដុះនៅក្នុងសហគមន៍។ ការធ្វើបែបនេះគឺដើម្បីជួយដល់បងប្អូនកសិកររបស់យើងដែលកន្លងមកគាត់តែងជួបបញ្ហាទីផ្សារ និងជួបបញ្ហាដើមទុនជាដើម។

ឯកឧត្តម ឃឹម ហ្វីណង់ ថាការចងក្រងជាសហគមន៍កសិកម្មទំនើប និងការដាំដុះតាមកិច្ចសន្យាទុកមុន គឺអាចជួយពុកម៉ែបងប្អូនប្រជាកសិករចៀសផុតពីហានិភ័យនៃការប្រែប្រួលថ្លៃស្រូវ និងធានាទីផ្សារទុកមុន ហើយថាក្រសួងត្រៀមខ្លួនជានិច្ច ដើម្បីជួយជ្រោមជ្រែងការចងក្រងជាសហគមន៍កសិកម្មទំនើប ដើម្បីទទួលផលចំណេញទាំងអស់គ្នា៕

ដោយ៖ ចាន់ សុភឿន (ប្រភព៖ ក្រសួងកសិកម្ម)