AKP សៀមរាប ថ្ងៃទី១៦ ខែសីហា ឆ្នាំ២០២៥-- កាកបាទក្រហមកម្ពុជាបានចាត់ឯកឧត្តម យូ ឡាណា អគ្គលេខាធិការរងទី២កាកបាទក្រហមកម្ពុជា និងឯកឧត្តម ប្រាក់ សោភ័ណ ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និងសហការី កាលពីថ្ងៃទី១៥ ខែសីហា ឆ្នាំ២០២៥  ចុះសួរសុខទុក្ខ និងនាំយកអំណោយមនុស្សធម៌ផ្តល់ជូនក្រុមគ្រួសាររបស់វីរយុទ្ធជនចំនួន៦រូប ដែលត្រូវបានចាប់ខ្លួនដោយទាហានថៃក្រោយមានបទឈប់បាញ់ចូលជាធរមាន កាលពីថ្ងៃទី២៨ ខែកក្កដា ឆ្នាំ២០២៥កន្លងទៅ ក្នុងពេលបំពេញភារកិច្ចនៅព្រំដែន ហើយដែលក្រុមគ្រួសារវីរយុទ្ធជនទាំង៦រូបនោះកំពុងរស់នៅក្នុងខេត្តសៀមរាប។

ក្នុងពិធីសំណេះសំណាលនៃការសួរសុខទុក្ខនោះ ឯកឧត្តមអគ្គលេខាធិការរងទី២នៃកាកបាទក្រហមកម្ពុជាបានពាំនាំនូវការផ្តាំផ្ញើសួរសុខទុក្ខ និងការលើកទឹកចិត្តពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែគិតគូរពីសុខទុក្ខរបស់បងប្អូនប្រជាពលរដ្ឋជានិច្ច និងសូមអោយបងប្អូនក្រុមគ្រួសារវីរយុទ្ធជនទាំងអស់ ថែទាំសុខភាពឱ្យបានល្អ។ អនុលោមទៅតាមអនុសញ្ញាហ្សឺណែវទី៣ ឆ្នាំ១៩២៩ ក្រុមគ្រួសាររបស់យុទ្ធជនរងគ្រោះខាងលើ ក៏បានសរសេរព័ត៌មានស្តីពីស្ថានភាពគ្រួសារសម្រាប់បញ្ជូនទៅកាន់យុទ្ធជនដែលកំពុងឃុំខ្លួននៅប្រទេសថៃ ដែលការបញ្ជូនសារនេះ គឺធ្វើឡើងតាមរយៈគណៈកម្មាធិការអន្តរជាតិនៃកាកបាទក្រហម (ICRC)។

គួរបញ្ជាក់ថា ដើម្បីជួយសម្រាលការលំបាកដល់ជីវភាពរស់នៅរបស់ក្រុមគ្រួសារវីរយុទ្ធជនទាំងនោះ កាកបាទក្រហមកម្ពុជា បាននាំយកអំណោយផ្តល់ជូនរួមមានជាគ្រឿងឧបភោគបរិភោគ សម្ភារប្រើប្រាស់ និងថវិកាមួយចំនួន៕

ដោយ ហង្ស សៀក