AKP ភ្នំពេញ ថ្ងៃទី១៥ ខែសីហា ឆ្នាំ២០២៥-- ឧត្តមសេនីយ៍ត្រី ឃួន ឈឿន មេបញ្ជាការរងកងពល តំណាងដ៏ខ្ពង់ខ្ពស់ឯកឧត្តម ឧត្តមសេនីយ៍ទោ ឈរ សុខ នាយសេនាធិការរងកងទ័ពជើងគោក មេបញ្ជាការកងពលតូចដឹកជញ្ជូនលេខ៩០ បានដឹកនាំក្រុមការងាររបស់អង្គភាព និងនាំយកថវិកាផ្ទាល់ខ្លួនរបស់ឯកឧត្តមមេបញ្ជាការកងពលទៅសួរសុខទុក្ខលោកវរសេនីយ៍ត្រី ទឹង វ៉ាន់ នាយរងការិយាល័យភស្តុភារ ដែលមានជំងឺកំពុងសម្រាកព្យាបាលនៅមន្ទីរពេទ្យជាតិតេជោសន្តិភាព នាថ្ងៃទី១៥ ខែសីហា ឆ្នាំ២០២៥។

ក្នុងឱកាសអញ្ជើញសួរសុខទុក្ខ ឧត្តមសេនីយ៍ត្រី ឃួន ឈឿន បាននាំយកនូវប្រសាសន៍ផ្ដាំផ្ញើរបស់ឧត្តមសេនីយ៍ទោ ឈរ សុខ មេបញ្ជាការកងពលសួរសុខទុក្ខអាការៈនៃជំងឺលោកវរសេនីយ៍ត្រី ទឹង វ៉ាន់ និងជូនពរដល់លោកវរសេនីយ៍ត្រីឆាប់ជាសះស្បើយវិលត្រឡប់មកបំពេញភារកិច្ចនៅអង្គភាពវិញ។ តាមរយៈសកម្មភាពខាងលើបានបញ្ជាក់ឱ្យឃើញថា ឯកឧត្តមមេបញ្ជាការកងពល តែងតែយកចិត្តទុកដាក់អំពីសុខទុក្ខគ្រប់កាលៈទេសៈដល់យោធិនទាំងអស់ក្រោមឱវាទ។

បន្ទាប់ពីបានទទួលនៅថវិកាឧបត្ថម្ភរួចមក លោក វរសេនីយ៍ត្រី ទឹង វ៉ាន់ និងក្រុមគ្រួសាររបស់លោកក៏បានថ្លែងអំណរគុណយ៉ាងជ្រាលជ្រៅ និងគោរពជូនពរដល់ក្រុមការងារ ជាពិសេសឯកឧត្តមមេបញ្ជាការកងពល សូមឱ្យជួបប្រទះតែសេចក្តីសុខ និងសម្រេចជោគជ័យគ្រប់ភារកិច្ច៕

ដោយ សំ សាម៉ន (ប្រភព៖ កងទ័ពជើងគោក)