AKP ភ្នំពេញ ថ្ងៃទី១៥ ខែ សីហាឆ្នាំ ២០២៥ -- មកដល់ពេលនេះកងទ័ពថៃបានធ្វើសកម្មភាពង្រីកជម្លោះចូលទៅក្នុងតំបន់របស់ប្រជាពលរដ្ឋស៊ីវិល ក្នុងនោះមានទាំងការរំលោភរាយលួសបន្លាយកភូមិជោគជ័យ និងភូមិព្រៃចាន់ ដែលសកម្មភាពទាំងនេះបានបង្ខំឱ្យប្រជាពលរដ្ឋកម្ពុជាផ្លាស់ប្តូរទីលំនៅ ធ្វើឱ្យពួកគាត់បាត់បង់លំនៅឋាន និងជីវភាពរស់នៅ ហើយនេះជាការរំលោភបំពានសិទ្ធិជាមូលដ្ឋានរបស់ពួកគេយ៉ាងធ្ងន់ធ្ងរបំផុត។ នេះបើតាមការលើកឡើងរបស់ ឯកឧត្តម ជុំ សុន្ទរី រដ្ឋលេខាធិការ និងជាអ្នកនាំពាក្យ ក្រសួងការបរទេស និងសហប្រតិបត្តិការអន្ដរជាតិ ក្នុងការធ្វើសេចក្តីសង្ខេបព័ត៌មាន ស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នាព្រឹកថ្ងៃទី១៥ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។

ឯកឧត្តម ជុំ សុន្ទរី បានថ្លែងបញ្ជាក់ថា ចាប់ពីថ្ងៃទី ១២ ដល់ថ្ងៃទី ១៣ ខែ សីហា ឆ្នាំ ២០២៥ កងទ័ពថៃប្រកបដោយប្រដាប់អាវុធបានផ្លាស់ប្តូរ រនាំងបិទរបស់ខ្លួន ហើយបានរាយលួសបន្លា ហួសពីទីតាំងកាលពីមុនរបស់ខ្លួនចូលមកក្នុងទឹកដីរបស់កម្ពុជា នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ ឯកឧត្ដមបន្ដថា នៅថ្ងៃទី១៣ ខែ សីហា ឆ្នាំ ២០២៥ កងទ័ពថៃបានរុលចូលក្នុងទឹកដីរបស់កម្ពុជា នៅក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ហើយបានដាក់រាយលួសបន្លា និងកង់យានយន្ត។ ក្នុងថ្ងៃដដែលនេះកងទ័ពថៃ ក៏បានសាងសង់ស្នាក់ការពីឈើរបស់ខ្លួននៅក្នុងភូមិឯកភាព ស្រុកវាលវែង ខេត្តពោធិ៍សាត់។ ទន្ទឹមនេះ ក៏ជីកលេណដ្ឋាន នៅខាងលិច និងខាងកើតប្រាសាទតាមាន់ធំ និងក្រៅពីនេះបានរំលោភបំពាន ដំបន់ប្រាសាទតាក្របី ដោយបំពាក់ដោយប្រព័ន្ធកំណត់ទីតាំងតាមផ្កាយរណប GPS និងកាមេរ៉ នៅប្រាសាទតាក្របី។

ឯកឧត្ដម អ្នកនាំពាក្យក្រសួងការបរទេសកម្ពុជាក៏បានថ្លែងបន្ថែមថា ថៃបានរំលោភទៅលើកិច្ចព្រមព្រៀង និងច្បាប់អន្តរជាតិ ដែលសកម្មភាពទាំងនេះបានបំពានទៅលើកិច្ចព្រមព្រៀងកាលពីថ្ងៃទី២៨ ខែ កក្កដា ឆ្នាំ ២០២៥នៅប្រទេស ម៉ាឡេស៊ី កន្លងមក៕

ដោយ៖ មករា