AKP ភ្នំពេញ ថ្ងៃទី១៥ ខែសីហា ឆ្នាំ២០២៥--រាល់ពាក្យសំដី និងសកម្មភាពផ្សេងៗដែលថៃបានធ្វើសកម្មភាពរំលោភលើដែនអធិបតេយ្យភាពកម្ពុជាទាំងប៉ុន្មានត្រូវបានកត់ត្រាទុកទាំងអស់ ហើយកម្ពុជាមានភាពអត់ធ្មត់ដើម្បីឈ្នះថៃ។ នេះបើតាមការបញ្ជាក់របស់ ឯកឧត្តម ប៉ែន បូណា រដ្ឋមន្រ្ដីប្រតិភូអមនាយករដ្ឋមន្រ្ដី និងជាប្រធានអង្គភាពអ្នកនាំពាក្យរាជរដ្ឋាភិបាល ក្នុងការធ្វើសេចក្តីសង្ខេបព័ត៌មានស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នាព្រឹកថ្ងៃទី១៥ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។

ឯកឧត្តម ប៉ែន បូណា បានថ្លែងយ៉ាងដូច្នេះថា៖ «ការអត់ធ្មត់របស់កម្ពុជាគឺជាពិន្ទុរដែលសហគមន៍អន្តរជាតិបានកំពុងផ្តល់ឱ្យ ហើយ ផ្ទុយទៅវិញរាល់សកម្មភាពបង្កហេតុ មិនថាជាសកម្មភាពមិនថាជាពាក្យសំដី សុទ្ធសឹងតែជាភស្តុតាងទាំងអស់។ ដូច្នេះ ម៉ោងនេះការអត់ធ្មត់គឺជាភាពខ្លាំង ដើម្បីឈ្នះរបស់កម្ពុជា»។ ឯកឧត្ដមអ្នកនាំពាក្យរាជរដ្ឋាភិបាលបានលើកឡើងថា បងប្អូនប្រជាពលដ្ឋខ្មែរបានទុកចិត្តចំពោះថ្នាក់ដឹកនាំព្រោះថាទាំងសម្តេចតេជោ ហ៊ុន សែន ប្រធានព្រឹទ្ធសភា  ទាំងសម្តេចបវរធិបតី ហ៊ុន ម៉ាណែត នាយករដ្ឋមន្ត្រី លោកសុទ្ធសឹងជាអ្នកដឹកនាំមានបទពិសោធន៍ខ្ពស់ ក្នុងការដោះស្រាយបញ្ហាអស់ហើយ ដែលទាំងកងកម្លាំងប្រដាប់អាវុធ  ស៊ីវិលបានកំពុងបានយកចិត្តទុកដាក់យ៉ាងខ្លាំង ក្នុងការដោះស្រាយបញ្ហារបស់ជាតិយើង។ 

ឯកឧត្តម ប៉ែន បូណា បានបន្ថែមថា ថ្នាក់ដឹកនាំបានមើលឃើញវែងឆ្ងាយណាស់ ហើយប្រាកដណាស់ថ្នាក់ដឹកនាំនឹងដឹកនាំប្រជាជន និងប្រទេសជាតិទៅផ្លូវមួយដែលល្អ ។ ឯកឧត្ដមក៏បានគូសបញ្ជាក់ឱ្យដឹងផងដែរថា សរុបមកការអត់ធ្មត់ខ្ពស់បំផុតក្នុងការគោរពកិច្ចព្រមព្រៀងឈប់បាញ់ ការបន្តសាមគ្គីខ្មែរជាធ្លុងមួយជាឯកភាពជាតិខ្មែរ និងការទុកចិត្តលើថ្នាក់ដឹកនាំ ដើម្បីដោះស្រាយបញ្ហាគឺជាចំណុចខ្លាំង និងជាកក្តាជោគជ័យដែលយើងឆ្លងកាត់នៅពេលនេះ៕

ដោយ៖ ប៊ុនរិទ្ធ