AKP សៀមរាប ថ្ងៃទី១៥ ខែសីហា ឆ្នាំ២០២៥-- នៅក្នុងពិធីជួបជុំមិត្តសីហនុរាជរបស់សមណនិស្សិត និងនិស្សិតឆ្នាំទី៤នៃពុទ្ធិកសាកលវិទ្យាល័យព្រះសីហនុរាជ សាខារាជធានីភ្នំពេញ សាខាខេត្តកំពង់ឆ្នាំង និងសាខាខេត្តបាត់ដំបង ដែលប្រារព្ធធ្វើនៅក្នុងសាកលវិទ្យាល័យអង្គរក្នុងខេត្តសៀមរាប កាលពីរសៀលថ្ងៃទី១៤ ខែសីហា ឆ្នាំ២០២៥ សម្តេចព្រះមហាអរិយវង្ស បណ្ឌិត យ៉ន សេង យៀត ព្រះសាកលវិទ្យាធិការនៃពុទ្ធិកសាកលវិទ្យាល័យព្រះសីហនុរាជ បានមានថេរដីកាថា សមណនិស្សិត និងនិស្សិតទាំងអស់ សូមឱ្យមានជោគជ័យក្នុងជីវិត ដែលបានខិតខំរៀនសូត្របានចេះដឹង និងត្រូវខិតខំរៀនទៀត មនុស្សកាន់តែចាស់ភ្នែកកាន់តែងងឹតតែភ្នែកនេះ អាចមើលឃើញអំពីឆាកជីវិតច្បាស់ជាងកាលនៅយុវវ័យ ដូច្នេះពេលដែលចាស់ៗឱ្យខំរៀន គឺខំរៀនទៅ គឺមិនខុសទេ កុំឱ្យដល់ពេលវ័យ៦០ឆ្នាំឬ៧០ឆ្នាំ ទើបនិយាយថាស្តាយក្រោយនោះ ដោយក្នុងនោះដែរសម្តេចក៏បានបញ្ជាក់ថា បើចង់ចេះត្រូវខំរៀន ព្រោះគ្មានអ្វីដែលធ្វើឱ្យចេះដោយមិនបាច់រៀននោះដែរ។ ហើយនៅក្នុងសង្គមជាតិ មនុស្សគ្រប់រូប ជាពិសេសសមណសិស្ស ត្រូវតែចេះភាសាជាតិយើង ដែលត្រូវការជួយជ្រុំជ្រែង ការថែរក្សាពីយុវជន បញ្ញវន្តរបស់យើងទាំងអស់គ្នា គឺត្រឹមតែការរៀនអក្សរ និងសរសេរភាសាជាតិឱ្យបានច្បាស់លាស់ និងត្រឹមត្រូវ គឺពិតជាយើងបានលើកតម្កើងតម្លៃអត្តសញ្ញាណជាតិយើងបានហើយ។

សម្តេចព្រះមហាអរិយវង្សបានមានថេរដីកាបញ្ជាក់ថា ពុទ្ធិកសាកលវិទ្យាល័យព្រះសីហនុរាជ គឺជាគ្រឹះស្ថានពុទ្ធិកឧត្តមសិក្សាពុទ្ធសាសនាដំបូង និងឈានមុខគេនៅកម្ពុជា ដែលបានបង្កើតឡើងនៅថ្ងៃទី០១ ខែកក្កដា ឆ្នាំ១៩៥៤ ក្រោមព្រះរាជឧបត្ថម្ភរបស់ព្រះករុណាជាម្ចាស់ ព្រះបាទសម្តេចព្រះនរោត្តម សីហនុ។ 

ពុទ្ធិកសាកលវិទ្យាល័យព្រះសីហនុរាជត្រូវបានទទួលស្គាល់ទូទៅថា ជាពុទ្ធិកសាកលវិទ្យាល័យរដ្ឋមួយក្នុងការបណ្តុះបណ្តាលពុទ្ធសាសនាដំបូង និងលើការបណ្តុះបណ្តាលជំនាញមានដូចជា ទស្សនវិជ្ជាពុទ្ធសាសនា សង្គមវិទ្យា នីតិសាស្ត្រ រដ្ឋបាលអប់រំ គ្រប់គ្រងទូទៅ អក្សរសាស្ត្រខ្មែរ បរិស្ថានវិទ្យា ភាសាបាលី-សំស្ក្រឹត និងភាសាអង់គ្លេស ប្រកបដោយគុណភាពនិងឧត្តមភាព។ ក្នុងពិធីនេះ ក៏មានការជជែកគ្នាអំពីប្រធានបទផ្សេងៗ និងបានចែករំលែកបទពិសោធន៍ពីគ្នាទៅវិញទៅមក ដើម្បីជាការផ្តល់នូវគន្លឹះល្អៗសម្រាប់សមណនិស្សិត និងនិស្សិតជំនាន់ក្រោយផងដែរ៕

ដោយ ឃុត សៅ