AKP ភ្នំពេញ ថ្ងៃទី១៤ ខែសីហា ឆ្នាំ២០២៥-- ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំមន្ត្រីបច្ចេកទេសក្រសួង រួមមានឯកឧត្តមជាថ្នាក់ដឹកនាំ និងមន្រ្ដីបច្ចេកទេសនៃក្រសួងអភិវឌ្ឍន៍ជនបទ និងមន្ទីរអភិវឌ្ឍន៍ជនបទខេត្តតាកែវ នាព្រឹកថ្ងៃទី១៤ ខែសីហា ឆ្នាំ២០២៥ ចុះទៅពិនិត្យវឌ្ឍនភាពនៃការស្ថាបនាផ្លូវក្រាលកៅស៊ូពីរជាន់ប្រភេទDBST ចំនួន៩ខ្សែ នៅស្រុកកោះអណ្ដែត ស្រុកត្រាំកក់ និងស្រុកសំរោង ខេត្តតាកែវ។

ផ្លូវក្រាលកៅស៊ូទាំង៩ខ្សែនោះរួមមាន៖ ខ្សែទី១ជាប្រភេទផ្លូវក្រាលកៅស៊ូពីរជាន់ DBST មានប្រវែង ១០,៤៨គីឡូម៉ែត្រ ទទឹង ៦ម៉ែត្រ តភ្ជាប់ពីផ្លូវជាតិលេខ ៣ ត្រង់ចំណុចភូមិត្រាំត្បាល់ ឃុំក្រាំងលាវស្រុកបាទី ទៅផ្លូវជាតិលេខ ២ ត្រង់ចំណុចភូមិថ្មី ឃុំរវៀងស្រុកសំរោង  ដោយឆ្លងកាត់ឃុំចំនួន៣ គឺឃុំរវៀង ឃុំក្រាំងលាវ និងឃុំត្រពាំងក្រសាំង ស្រុកសំរោង និងស្រុកបាទី។ បច្ចុប្បន្នកំពុងធ្វើការជួសជុលឡើងវិញដោយសម្រេចបាន៦០%។ ស្ថិតនៅក្នុងក្របខ័ណ្ឌគម្រោងកែលម្អផ្លូវជនបទ ជំហានទី៣ ហៅកាត់ថា (RRIP3)។ ខ្សែទី២ ជាប្រភេទផ្លូវក្រាលកៅស៊ូពីរជាន់ DBST មានប្រវែង៩គីឡូម៉ែត្រ ទទឹង៦ម៉ែត្រ តភ្ជាប់ពីផ្លូវជាតិលេខ៣ ត្រង់ចំណុចភូមិស្រង៉ែ ឃុំឧត្ដមសូរិយា ទៅដល់ភូមិស្វាយព្រៃ ឃុំលំចង់ ស្រុកសំរោង មានសំណង់សិល្បការ្យចំនួន ២៦កន្លែង ដោយឆ្លងកាត់ឃុំឧត្ដមសូរិយា និងឃុំលំចង់ ស្រុកត្រាំកក់ និងស្រុកសំរោង មានប្រជាពលរដ្ឋទទួលផលចំនួន ១ ៦៨៤គ្រួសារ ស្ថិតនៅក្នុងគម្រោងខ្សែច្រវាក់ផលិតកម្មប្រកបដោយភាតរបរិស្ថាន ហៅកាត់ថា (CFAVC) ដែលទើបតែចាប់ផ្តើម មានវឌ្ឋនភាប្រមាណ៧%។ ខ្សែទី៣ ជាប្រភេទផ្លូវក្រាលកៅស៊ូពីរជាន់ DBST មានប្រវែង ១៥,៧៥គីឡូម៉ែត្រ ទទឹង ៦ម៉ែត្រ មានសំណង់សិល្បការ្យចំនួន ១៧កន្លែង តភ្ជាប់ពីភូមិសំរោង ឃុំរមេញ ទៅដល់ភូមិដើមដូងឃុំក្រពុំឈូក ឆ្លងកាត់ឃុំចំនួន ៣ គឺ ឃុំរមេញ ឃុំព្រៃខ្លា និងឃុំក្រពុំឈូក ស្រុកកោះអណ្ដែត ដែលមានអ្នកទទួលផលចំនួន ១ ៦៩១ គ្រួសារ។ ផ្លូវនេះស្ថិតនៅក្នុងក្របខណ្ឌគម្រោងគាំទ្រនិរន្ដរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករ និងពាណិជ្ជូបនីយកម្មកសិកម្ម ហៅកាត់ថា (SAAMBAT) ដែលមានវឌ្ឍនភាពបានប្រមាណជាង ៥០%។ ខ្សែទី៤ ជាប្រភេទផ្លូវក្រាលក្រួសក្រហម មានប្រវែង ៤ ៥០០ម៉ែត្រ អនុវត្តដោយកងវិស្វកម្មក្រសួងការពាជាតិ តភ្ជាប់ពីភូមិដើមដូង ឃុំក្រពុំឈូក ទៅភូមិព្រៃយុថ្កា យុំព្រៃយុថ្កា ស្រុកកោះអណ្ដែត បានបញ្ចប់កាស្ថាបនា ១០០%។ ខ្សែទី៥. ផ្លូវពោន-ក្រពុំឈូក ប្រវែង៦.៧៥០ម៉ែត្រ ទទឹងខ្នង ៦ម៉ែត្រ  ប្រភេទកៅស៊ូ២ជាន់ DBST មានសំណង់សិល្បការ្យចំនួន ៥កន្លែង ចាប់ពីភូមិពោន ឃុំពេជសារ ដល់ភូមិក្រពុំឈូក ឃុំក្រពុំឈូក ស្រុកកោះអណ្ដែត សម្រេចបានប្រមាណ ៣០%។ ផ្លូវនេះស្ថិតនៅក្នុងក្របខ័ណ្ឌគម្រោងគាំទ្រនិរន្ដរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករ និងពាណិជ្ជូបនីយកម្មកសិកម្ម ហៅកាត់ថា (SAAMBAT)។ ខ្សែទី៦. ពេជសារ-ធ្លាប្រជុំ មានប្រវែង ១២,៨៨ គីឡូម៉ែត្រ តភ្ជាប់ពីផ្លូវជាតិលេខ ២ ត្រង់ចំណុចភូមិពេជសារ ឃុំពេជសារ ទៅដល់ឃុំធ្លាប្រជុំ ស្រុកកោះអណ្ដែត ស្ថិតនៅក្នុងក្របខណ្ឌគម្រោងកែលម្អផ្លូវជនបទ ជំហានទី៣ ហៅកាត់ថា (RRIP3)។ ខ្សែទី៧. ធ្លាប្រជុំ-ឃុំរូង ក្នុងស្រុកកោះអណ្ដែត មានប្រវែង៧,៨៨ គីឡូ ទទឹង៦ម៉ែត្រ ស្ថិតនៅក្នុងក្របខណ្ឌគម្រោងកែលម្អផ្លូវជនបទ ជំហានទី៣ ហៅកាត់ថា(RRIP3)។ ខ្សែទី៨. ផ្សារព្រៃសណ្ដែក-ត្នោតជុំ មានប្រវែង៨.៣៧គីឡូម៉ែត្រ ទទឹងប្រវែង៧ម៉ែត្រប្រភេទកៅស៊ូពីរជាន់ DBST តភ្ជាប់ពីភូមិព្រៃសណ្ដែក ឃុំព្រៃស្លឹក ទៅដល់ភូមិត្នោតជុំ ឃុំសំបួរ ស្រុកទ្រាំង។ ជាលទ្ធផលសម្រេចបាន៩៥%។ គម្រោងផ្លូវនេះស្ថិតនៅក្នុងក្របខ័ណ្ឌគម្រោងគាំទ្រនិរន្ដរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករ និងពាណិជ្ជូបនីយកម្មកសិកម្ម ហៅកាត់ថា (SAAMBAT) និងខ្សែទី៩ ជាប្រភេទផ្លូវក្រាលកៅស៊ូពីរជាន់ DBST មានប្រវែង  ៣គីឡូម៉ែត្រ ស្ថិតនៅភូមិព្រៃផ្អាវ ឃុំរនាមស្រុកទ្រាំង ខេត្តតាកែវ បានសាងសង់រួច ១០០%ហើយ។

សូមជម្រាបជូនផងដែរថា រាជរដ្ឋាភិបាលក្រោមការដឹកនាំប្រកបដោយថាមវ័ន្តរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា បានប្រគល់ភារកិច្ចជូនក្រសួងអភិវឌ្ឍន៍ជនបទ ធ្វើការលើកកម្រិតផ្លូវជនបទឱ្យកាន់តែមានគុណភាព  ពីផ្លូវក្រាលដីស ឬផ្លូវក្រាលក្រួសក្រហមឱ្យទៅជាផ្លូវក្រាលកៅស៊ូ និងបេតុងដើម្បីពង្រឹងភាពធន់នឹងការប្រែប្រួលអាកាសធាតុ   និងប្រើប្រាស់បានគ្រប់រដូវកាល។

ជាមួយគ្នានេះ ឯកឧត្ដមរដ្ឋមន្រ្ដីបានផ្ដាំផ្ញើដល់ក្រុមការងារបច្ចេកទេសដែលប្រចាំការនៅការដ្ឋាន ត្រូវអនុវត្តឱ្យបានខ្ជាប់ខ្ជួននូវរាល់បទដ្ឋានបច្ចេកទេសតាមគ្រោងប្លង់ សំដៅពង្រឹងទាំងបរិមាណ និងគុណភាព ដើម្បីប្រើប្រាស់បានយូរអង្វែង៕

ដោយ ទេស ច័ន្ទសុធារី (ប្រភព៖ ក្រសួងអភិវឌ្ឍន៍ជនបទ)