AKP បន្ទាយមានជ័យ ថ្ងៃទី១៤ ខែសីហា ឆ្នាំ២០២៥-- ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានថ្លែងអំណរគុណយ៉ាងជ្រាលជ្រៅចំពោះធនាគារ អ៊ូរី (ខេមបូឌា) ដែលបានឧបត្ថម្ភអង្ករចំនួន៧,៥០០គីឡូក្រាម និងទឹកសុទ្ធចំនួន១៧២កេស ដល់រដ្ឋបាលខេត្ត ដើម្បីយកទៅចែកជូនប្រជាពលរដ្ឋដែលបានជម្លៀសខ្លួនពីលំនៅឋាន និងកងកម្លាំងដែលប្រចាំការតាមបណ្តោយខ្សែបន្ទាត់ព្រំដែនកម្ពុជា-ថៃ ដោយពិធីទទួលអំណោយនេះធ្វើឡើងនាព្រឹកថ្ងៃទី១៤ ខែសីហា ឆ្នាំ២០២៥នេះ នៅសាលាខេត្តបន្ទាយមានជ័យ។

ក្នុងឱកាសនោះ ឯកឧត្តម អ៊ុ រាត្រី បានគូសបញ្ជាក់ថា ការឧបត្ថម្ភរបស់ធនាគារ អ៊ូរី (ខេមបូឌា) គឺជាទឹកចិត្តដ៏ថ្លៃថ្លាដែលឆ្លុះបញ្ចាំងពីការចូលរួមចំណែកជួយសម្រាលការលំបាករបស់កងកម្លាំង និងប្រជាពលរដ្ឋ និងបានថ្លែងថា "ការចូលរួមឧបត្ថម្ភរបស់ធនាគារ អ៊ូរី (ខេមបូឌា) គឺជាការលើកទឹកចិត្ត និងឆ្លុះបញ្ចាំងឱ្យឃើញពីការចូលរួមចំណែកសម្រាលការលំបាករបស់កងកម្លាំង ដែលបានលះបង់កម្លាំងកាយចិត្តការពារបូរណភាពទឹកដី ស្របតាមអនុសាសន៍ដ៏ខ្ពង់ខ្ពស់របស់ សម្តេចតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានចាត់ទុកកងកម្លាំងប្រដាប់អាវុធជាសមរភូមិមុខ និងសមរភូមិក្រោយ ក្នុងការរួមគ្នាការពារជាតិមាតុភូមិពីសំណាក់សត្រូវឈ្លានពាន"។

ឯកឧត្តម អ៊ុ រាត្រី ក៏បានថ្លែងអំណរគុណចំពោះស្មារតីសាមគ្គីភាព និងការយកចិត្តទុកដាក់ខ្ពស់របស់សប្បុរសជននានាចំពោះសុខទុក្ខរបស់ប្រជាពលរដ្ឋ និងកងកម្លាំងការពារជាតិ ដែលជាកម្លាំងស្នូលក្នុងការថែរក្សាសន្តិភាព និងបូរណភាពទឹកដី និងបានបួងសួងសុំឱ្យសង្គ្រាមឈ្លានពានលើទឹកដីខ្មែរឆាប់ផុតរលត់ និងសុំឱ្យពួកចោរឈ្លានពានវិនាសអន្តរាយផងដែរ។

អំណោយដ៏ថ្លៃថ្លានេះមិនត្រឹមតែជាការជួយឧបត្ថម្ភសម្ភារប៉ុណ្ណោះទេ ប៉ុន្តែក៏ជាការបង្ហាញពីស្មារតីសាមគ្គីភាព និងការយកចិត្តទុកដាក់ខ្ពស់ចំពោះសុខទុក្ខរបស់ប្រជាពលរដ្ឋ និងកងកម្លាំងការពារជាតិផងដែរ៕

ដោយ ឈុន សារ៉ាត