AKP ភ្នំពេញ ថ្ងៃទី១៣ ខែ សីហា ឆ្នាំ ២០២៥--
លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋ លេខាធិការ និងជាអ្នកនាំពាក្យក្រសួងការពារជាតិបានថ្លែងថា កងកម្លាំងប៉ារ៉ាថៃ និងតម្រួតព្រំដែនថៃ ប្រដាប់ដោយអាវុធ ធ្វើសកម្មភាព ចូលមកត្រួតពិនិត្យ នៅទល់មុខច្រកជោគជ័យ ក្នុងទឹកដីប្រទេសកម្ពុជានៅថ្ងៃទី១២ និងទី១៣ ខែសីហា ឆ្នាំ ២០២៥ ដោយក្នុងនេះពួកគេបានរាយលួសបន្លា ព្រមទាំងដាក់កង់ឡាន នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យក្នុងទិសទី១យុធភូមិភាគទី៥។ ការថ្លែងរបស់លោកជំទាវឧត្ដមសេនីយឯក អ្នកនាំពាក្យក្រសួងការពារជាតិបែបនេះ ក្នុងសន្និសីទសារព័ត៌មានស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នារសៀលថ្ងៃទី១៣ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។

លោកជំទាវ ឧត្តមសេនីយ៍ឯក ម៉ាលី សុជាតា បានគូសបញ្ជាក់ថា កម្ពុជាទាមទារឱ្យភាគីថៃបញ្ឈប់ជាបន្ទាន់ ដោយគ្មានលក្ខខណ្ឌ នូវរាល់សកម្មភាពដែលរំលោភបំពានបទឈប់បាញ់  ព្រមទាំងស្មារតីនៃការឯកភាពគ្នា នៅក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា -ថៃ (GBC)ជាពិសេសត្រង់ចំណុចទី២ និងចំណុចទី៤ដែលបានចែងថាភាគីទាំងពីរ បានព្រមព្រៀងគ្នារក្សាកងកម្លាំងយោធារបស់ខ្លួននៅទីតាំងបច្ចុប្បន្នដោយមិនអនុញ្ញាត្តិឱ្យផ្លាស់ទី ហួសពីទីតាំងដែលខ្លួនបានឈរជើង ក្នុងពេលកិច្ចព្រមព្រៀង បទឈប់បាញ់បានចូលជាធរមាននៅម៉ោង ១២អាធ្រាត្រ កាលពីថ្ងៃទី ២៨ ខែ កក្កដា ឆ្នាំ២០២៥ឡើយ។
លោកជំទាវ ឧត្តមសេនីយ៍ឯក បានបញ្ជាក់បន្ថែមថា ភាគីទាំងពីរ មិនត្រូវចល័តកងទ័ពរបស់ខ្លួនរាប់ទាំងការល្បាតទៅទីតាំងរបស់ភាគីម្ខាងទៀតឡើយ ហើយភាគីទាំងពីរបានឯកភាពគ្នាមិនប្រព្រឹត្តសកម្មភាពបង្កហេតុណាមួយដែលអាចនាំឱ្យមានភាពតានតឹងកើតឡើងឡើយ៕ដោយ៖ មករា