AKP ភ្នំពេញ ថ្ងៃទី១៣ ខែសីហា ឆ្នាំ២០២៥-- លទ្ធផលល្បាតការពារបឹងទន្លេសាបរយៈពេល៦ខែដោយមន្រ្ដីឧទ្យានុរក្ស ដោយមានការគាំទ្រពី អង្គការជីវិតធម្មជាតិនៅកម្ពុជា (NatureLife Cambodia) ក្រោមមូលនិធិ Critical Ecosystem Partnership Fund(CEPF) មន្រ្តីឧទ្យានុរក្សនៃតំបន់រ៉ាមសារស្ទឹងសែន និងតំបន់រ៉ាមសារបឹងទន្លេឆ្មារនៃក្រសួងបរិស្ថាន បានសហការយ៉ាងជិតស្និទ្ធជាមួយក្រុមការងារចម្រុះ និងកម្លាំងមន្រ្តីជលផល ដើម្បីចុះបង្រ្កាបបទល្មើសនេសាទនៅលើផ្ទៃបឹងទន្លេសាប។

ប្រភពពីអង្គការ NatureLife បានឱ្យដឹងនៅថ្ងៃទី១៣ ខែសីហា ឆ្នាំ២០២៥ ថា ក្នុងរយៈពេល៦ ខែចុងក្រោយនេះ កម្លាំងចម្រុះបង្រ្កាបបទល្មើសនេសាទបានចំនួន១៥៨ករណី លែងកូនត្រីចម្រុះប្រមាណ១៥៤គីឡូក្រាម ចូលទៅក្នុងបឹងវិញ។ នេះជាកិច្ចសហការរវាងអាជ្ញាធរមូលដ្ឋាន និងដៃគូកាន់តែរឹងមាំ។ អង្គការ NatureLife សូមអរគុណសម្រាប់កិច្ចខិតខំរួមគ្នាលើការទប់ស្កាត់បទល្មើសនេសាទ ហើយយើងសង្កេតឃើញថា បទល្មើសនេសាទមានការថយចុះច្រើន ខណៈដែលសកម្មភាពនេសាទស្របច្បាប់ និងប្រកបដោយចីរភាព កំពុងត្រូវបានលើកកម្ពស់និងជំរុញបន្ថែម។ នេះមានន័យថា ធនធានមច្ឆជាតិ ជីវចម្រុះ និងតំបន់ដីសើមរបស់យើងនឹងទទួលបានការការពារប្រសើរជាងមុន ដែលនឹងគាំទ្រដល់ការប្រកបរបររកចំណូលប្រកបដោយចីរភាពសម្រាប់សហគមន៍យើង។

ពួកយើងមិនត្រឹមតែកំពុងការពារជីវចម្រុះដ៏សំខាន់នៃបឹងទន្លេសាបប៉ុណ្ណោះទេ ប៉ុន្តែក៏កំពុងធានានូវអាហារូបត្ថម្ភ និងប្រភពចំណូលសម្រាប់ប្រជាពលរដ្ឋដែលរស់នៅតំបន់រ៉ាមសារទាំងពីរនេះផងដែរ៕

ដោយ ណយ នឿន (ប្រភព៖ NatureLife )