AKP បន្ទាយមានជ័យ ថ្ងៃទី១៣ ខែសីហា ឆ្នាំ០២៥-- ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ នៅថ្ងៃទី១៣ ខែសីហា ឆ្នាំ២០២៥ បានអញ្ជើញជាអធិបតីចែកអំណោយរបស់អ្នកឧកញ៉ា អ៊ឹង សែ អគ្គនាយកក្រុមហ៊ុនPTC និងលោកជំទាវ ព្រមទាំងសហការី ជូនដល់ជនភៀសសឹក នៅក្នុងភូមិសាស្ត្រឃុំគោករមៀត និងឃុំបន្ទាយឆ្មារ ស្ថិតនៅក្នុងស្រុកថ្មពួក ដែលជាឃុំជាប់នឹងព្រំដែនកម្ពុជា-ថៃ សរុបចំនួន១០០០គ្រួសារ។

ក្នុងឱកាសនោះឯកឧត្ដម អ៊ុ រាត្រី និងអ្នកឧកញ៉ា អ៊ឹង សែ ក៏បានចែកជូននូវស្បៀង និងថវិកា ជូនដល់កងកម្លាំងដែលឈរជើងតាមបន្ទាត់ព្រំដែនការពារបូរណភាពទឹកដី ក្នុងភូមិសាស្ត្រខេត្តបន្ទាយមានជ័យផងដែរ។ សកម្មភាពនេះបានឆ្លុះបញ្ចាំងពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្តេចមហាបវរធិបតី នាយករដ្ឋមន្ត្រី ដែលតែងតែគិតគូរពីសុខទុក្ខរបស់ប្រជាពលរដ្ឋគ្រប់ទីកន្លែង ដោយមិនទុកនរណាម្នាក់ចោលនោះឡើយ។

ឯកឧត្តម អ៊ុ រាត្រី បានថ្លែងថា "រាជរដ្ឋាភិបាលជានិច្ចជាកាលតែងតែយកចិត្តទុកដាក់ចំពោះសុខទុក្ខប្រជាពលរដ្ឋនៅគ្រប់ទីកន្លែងជាពិសេសដូចពលរដ្ឋរងគ្រោះដែលបានជម្លៀសខ្លួនចេញពីលំនៅឋាននៅតាមព្រំដែនកម្ពុជា-ថៃ មកកាន់កន្លែងមានសុវត្ថិភាព។"

ថ្លែងទៅកាន់បងប្អូនជនភៀសសឹក ឯកឧត្តម អ៊ុ រាត្រី បានពាំនាំនូវប្រសាសន៍ផ្តាំផ្ញើសួរសុខទុក្ខពីសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្ដេចធិបតី ហ៊ុន ម៉ាណែត ព្រមទាំងលោកជំទាវបណ្ឌិត ពេជ ចន្ទមុន្នី។ ប្រសាសន៍ទាំងនេះបានបញ្ជាក់ពីការគិតគូរ និងនឹករលឹកជានិច្ចដល់សុខទុក្ខរបស់ប្រជាពលរដ្ឋដែលបានឃ្លាតឆ្ងាយពីផ្ទះសម្បែង ដើម្បីមកកាន់ទីសុវត្ថិភាពគេចចេញពីសង្រ្គាមនោះ។

ឯកឧត្តមអភិបាលខេត្តក៏បានសម្តែងការអរគុណយ៉ាងជ្រាលជ្រៅចំពោះការស៊ូទ្រាំ និងការលះបង់របស់ជនភៀសសឹកទាំងអស់។ ការឈ្លានពានរបស់សត្រូវគឺជាការប៉ុនប៉ងដណ្តើមយកទឹកដីកម្ពុជា ប៉ុន្តែដោយសារការខិតខំប្រឹងប្រែងរបស់រាជរដ្ឋាភិបាល និងការជឿជាក់របស់ប្រជាពលរដ្ឋ ទើបយើងអាចការពារបូរណភាពទឹកដីបានយ៉ាងរឹងមាំ ដោយឯកឧត្តមថែមទាំងបានថ្លែងអំណរគុណចំពោះវីរកងទ័ព ដែលបានលះបង់យ៉ាងអង់អាចដើម្បីបុព្វហេតុជាតិ៕

ដោយ ឈុន សារ៉ាត