AKP ភ្នំពេញ ថ្ងៃទី១៣ ខែសីហា ឆ្នាំ២០២៥

លោក ស្រេង សោភ័ណ្ឌរស្មី អគ្គលេខាធិការរង នៃអគ្គលេខាធិការដ្ឋានក្រុមប្រឹក្សាជាតិគាំពារសង្គមបានថ្លែងថា ការដាក់ចេញ និងការអនុវត្តនូវគោលនយោបាយនៃយន្តការផ្សព្វផ្សាយស្តីពីប្រព័ន្ធគាំពារសង្គមនាពេលកន្លមកនេះគឺបានបង្ហាញឱ្យឃើញយ៉ាងច្បាស់អំពីសារៈសំខាន់ និងការកំណត់ជាអាទិភាពនៃការផ្សព្វផ្សាយព័ត៌មានអំពីប្រព័ន្ធគាំពារសង្គមប្រកបដោយសុក្រឹតភាព និងសង្គតិភាព ដែលជាកត្តាចម្បងក្នុងការធ្វើឱ្យសម្រចបាននូវគោលនយោបាយគាំពារសង្គមនានា ដែលរាជរដ្ឋាភិបាលបានដាក់ចេញ។ ការលើកឡើងយ៉ាងដូច្នេះធ្វើឡើងក្នុងសិក្ខាសាលាផ្សព្វផ្សាយគម្រោងស្តីពីការលើកកម្ពស់ការយល់ដឹងក្នុងចំណោមមហាជនរងគ្រោះអំពីប្រព័ន្ធគាំពារសង្គមតាមរយៈប្រព័ន្ធផ្សព្វផ្សាយ ដែលរៀបចំឡើងដោយអង្គការមណ្ឌលព័ត៌មានស្ត្រីកម្ពុជា នៅសណ្ឋាគារកាំបូឌីយ៉ាណា នាព្រឹកថ្ងៃទី១៣ ខែសីហា ឆ្នាំ២០២៥។

លោក ស្រេង សោភ័ណ្ឌរស្មី បានគូសបញ្ជាក់ថា កន្លងមករាជរដ្ឋាភិបាលពិតជាបានធ្វើការផ្សព្វផ្សាយច្រើនអំពីប្រព័ន្ធគាំពារសង្គម តែផ្ទុយទៅវិញគឺនៅមានការតវ៉ាពីប្រជាពលរដ្ឋថាអ្នកខ្លះបានទទួល និងអ្នក ខ្លះទៀតមិនបានទទួលនូវប្រព័ន្ធគាំពារសង្គម ដែលតាមការអះអាងរបស់លោកថានេះគឺមិនមែនបណ្តាលមកពីកម្មវិធីមិនច្បាស់លាស់នោះទេ គឺបណ្តាលមកពីបញ្ហាព័ត៌មានមិនបានទៅដល់ក្រុមគោលដៅ ខណៈដែលរាជរដ្ឋាភិបាលបានព្យាយាមផ្សព្វផ្សាយច្រើន រួមទាំងប្រតិបត្តករ ក្រសួង ស្ថាប័ន រួមជាមួយអាជ្ញាធរថ្នាក់ក្រោមជាតិជាដើម ព្យាយាមធ្វើយ៉ាងណាដើម្បីឱ្យព័ត៌មានស្តីពីប្រព័ន្ធគាំពារសង្គមបានចូលទៅដល់ប្រជាពលរដ្ឋ។ ប៉ុន្តែផ្ទុយទៅវិញគឺនៅមានភាពខ្វះចន្លោះដែលនាំឱ្យរាជរដ្ឋាភិបាលបានខិតខំក្នុងការរៀបចំ និងដាក់ចេញនូវសកម្មភាពផ្សព្វផ្សាយជាច្រើនទៀត ដែលយន្តការនេះសង្ឃឹមថានឹងបានជ្រួតជ្រាបកាន់តែច្រើនឡើងសម្រាប់បងប្អូនប្រជាជនយើង។

លោកបានបន្តថា គម្រោងស្តីពីការលលើកកម្ពស់ការយល់ដឹងក្នុងចំណោមជនងាយរងគ្រោះអំពីប្រព័ន្ធគាំពារសង្គមតាមរយៈប្រព័ន្ធផ្សព្វផ្សាយគឺពិតជាមានសារៈសំខាន់ ដែលគម្រោង នេះមានគោលបំណងក្នុងការលើកកម្ពស់ការយល់ដឹង និងផ្សព្វផ្សាយព័ត៌មានអំពីប្រព័ន្ធគាំពារសង្គមដល់សាធារណជនទូទៅ។ ប៉ុន្តែបានផ្តោតជាពិសេសទៅលើក្រុមជនងាយរងគ្រោះមានដូចជា មនុស្សចាស់ ក្មេងស្រី ជនមានពិការភាព និងកុមារ តាមរយៈប្រព័ន្ធផ្សព្វផ្សាយនានា ដែលគម្រោងនេះគឺធ្វើឡើង ស្របតាមទិសដៅរបស់រាជរដ្ឋាភិបាល៕

ដោយ៖ ចាន់ សុភឿន