AKP ភ្នំពេញ ថ្ងៃទី១៣ ខែសីហា ឆ្នាំ ២០២៥-- 

ដោយមិនទាន់មានបញ្ជាក់ច្បាស់ពីករណីផ្ទុះគ្រាប់មីននៅតាមព្រំដែននោះ កម្ពុជាបានប្រាប់ភាគីថៃថាមកដល់ពេលនេះ មិនទាន់មានការស៊ើបអង្កេតជាផ្លូវការ និងតម្លាភាពការពិតនៅឡើយទេពាក់ព័ន្ធនឹងការផ្ទុះនោះទេ។នេះបើតាមការបញ្ជាក់របស់លោកជំទាវឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិក្នុងសន្និសីទសារព័ត៌មានស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នាព្រឹកថ្ងៃទី១៣ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។

លោកជំទាវឧត្តមសេនីយ៍ឯក ម៉ាលី សុជាតា បានថ្លែងថា ក្រសួងការពារជាតិកម្ពុជាសូមច្រានចោលទាំងស្រុងចំពោះការចោទប្រកាន់ដោយគ្មានមូលដ្ឋានច្បាស់លាស់របស់ភាគីថៃ ពីការរងរបួសរបស់ទាហានថៃដោយសារការផ្ទុះគ្រាប់មីននៅក្បែងប្រាសាទតាមាន់ ក្នុងស្រុកបន្ទាយអំពិល ខេត្តឧត្តរមានជ័យ កាលពីថ្ងៃទី១២ ខែសីហា ឆ្នាំ២០២៥។ លោកជំទាវឧត្តមសេនីយ៍ឯកលើកឡើងថា កម្ពុជា នៅតែរក្សាជំហរថាមិនប្រើប្រាស់ និងដាក់មីនថ្មីជាដាច់ខាត ព្រោះកម្ពុជាជារដ្ឋភាគីនូវ ការប្រើប្រាស់មីនប្រឆាំងមនុស្ស ដែលកម្ពុជាបានផ្តល់សច្ចាប័ននៅឆ្នាំ១៩៩៩ ជាមួយគ្នានោះដែរកម្ពុជាក៏បានទទួ លស្គាល់ជារដ្ឋសកម្មក្នុងការបោសសម្អាតមីន  និងការមិនប្រើប្រាស់មីនឡើយ។ លោកជំទាវឧត្តមសេនីយ៍ឯកបានបន្ដថា កម្ពុជាសូមធ្វើការគូសបញ្ជាក់មកដល់ពេលនេះ មិនទាន់មានការ ស៊ើបអង្កេតជាផ្លូវការ និងតម្លាភាពការពិតនៅឡើយទេពាក់ព័ន្ធនឹងបញ្ហានេះ។

លោកជំទាវឧត្ដមសេនីយ៍ឯកបានបន្ដថា កម្ពុជាក៏តែងតែរម្លឹកដល់ភាគីថៃ ច្រើនលើកច្រើនសារថាតំបន់ទាំងនេះ មានគ្រាប់មីនជាច្រើនដែលសេសសល់នៅសម័យសង្គ្រាម ហេតុដូច្នេះគ្រប់ភាគីពាក់ព័ន្ធគួរចៀសវាងធ្វើសេចក្តីសន្និដ្ឋានជាសារធារណៈណាមួយមុនពេលរកឃើញការពិត និងផ្តល់យុត្តិធម៌ទាំងអស់គ្នាដើម្បីបញ្ជៀសការយល់ច្រឡំរហូតដល់មានការប្រឈមមុខដាក់គ្នាធ្វើឱ្យមានភាពតានតឹងជាថ្មី។ 

លោកជំទាវឧត្ដមសនីយ៍ឯក អ្នកនាំពាក្យក្រសួងការពារជាតិបានអះអាងថា កម្ពុជាបានប្រកាន់ភ្ជាប់នូវគោល ការណ៍ក្នុងការផ្សព្វផ្សាយព័ត៌មានពិត ត្រឹមត្រូវ   ច្បាស់លាស់ ផ្សព្វផ្សាយជូនប្រជាពលរដ្ឋ និងប្រឆាំងដាច់ខាតការផ្សាយព័ត៌មានក្លែងក្លាយ។ «កម្ពុជាសូមបញ្ជាក់យ៉ាងម៉ឺងម៉ាត់ ឥតងាករេ និងប្តេជ្ញាចិត្តក្នុងការអនុវត្តយ៉ាងខ្ជាប់ខ្ជួនការអនុវត្តបទឈប់បាញ់ ដែលបានសម្រេចកាលពីថ្ងៃទី២៨ ខែកក្កដា ឆ្នាំ២០២៥កន្លងមក និងគោលការណ៍ឯកភាពគ្នាទាំង១៣ចំណុច នៃកិច្ចប្រជុំវិសាមញ្ញ គណៈកម្មការធិការព្រំដែនទូទៅកម្ពុជា-ថៃ (GBC) កាលពីថ្ងៃទី០៧ ខែសីហា ឆ្នាំ២០២៥ នៅប្រទេសម៉ាឡេស៊ី ដោយមានការសង្កេតការណ៍ពីអាម៉េរិក និងចិន»។ នេះគឺជាការលើកឡើងបន្ថែមរបស់លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិកម្ពុជា។

ជាមួយគ្នានោះដែរលោកជំទាវឧត្តមសេនីយ៍ឯក អ្នកនាំពាក្យក្រសួងការពារជាតិក៏បានបន្ថែមថា កម្ពុជាជំរុញឱ្យថៃបង្កើតក្រុមអ្នកសង្កេតការណ៍អាស៊ានដែលដឹកនាំដោយម៉ាឡេស៊ី ដើម្បីផ្ទៀងផ្ទាត់និងធានាក្នុងការអនុវត្តបទឈប់បាញ់ឱ្យបានពេញលេញ និងមានប្រសិទ្ធភាព ហើយកម្ពុជាក៏សូមអំពាវនាវដល់ភាគីថៃសូមគោរពនូវកិច្ចឈប់បាញ់ និងការឯកភាពគ្នានូវកិច្ចព្រមព្រៀងរបស់គណៈកម្មាធិការព្រំដែនទូទៅកម្ពុជា-ថៃ(GBC) ដែលលើកឡើងថា ភាគីទាំងពីរបានព្រមព្រៀងគ្នារក្សាកម្លាំងរៀងខ្លួន នៅទីតាំងបច្ចុប្បន្ន ដោយមិនអនុញ្ញាតឱ្យផ្លាស់ប្តូរ ហួសពីទីតាំងកំពុងឈរជើងក្នុងពេលកិច្ចព្រមព្រៀងបទឈប់បាញ់ចូលជាធរមាន៕

ដោយ៖ប៊ុនរិទ្ធ