AKP ភ្នំពេញ ថ្ងៃទី១៣ ខែសីហា ឆ្នាំ២០២៥-- ឯកឧត្តមទេសរដ្ឋមន្រ្តី លី ធុជ បានបញ្ជាក់ថា ប្រជាពលរដ្ឋកម្ពុជាប្រមាណជាង១៦០០នាក់ ត្រូវបានគ្រូពេទ្យស្ម័គ្រចិត្តប្រទេសបារាំងចុះពិនិត្យនិងព្យាបាលជំងឺជូនដោយឥតគិតថ្លៃ មិនត្រឹមតែព្យាបាលជំងឺឱ្យជាសះស្បើយរាងកាយប៉ុណ្ណោះទេ តែថែមទាំងជាការស្តារឡើងវិញនូវក្តីសង្ឃឹម និងសេចក្តីថ្លៃថ្នូររបស់ប្រជាពលរដ្ឋផង។

ឯកឧត្តមបណ្ឌិត លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីន បានបញ្ជាក់បែបនេះ ខណៈឯកឧត្ដមទទួលជួបសម្ដែងការគួរសម និងផ្ដល់លទ្ធផលបន្ទាប់ពីក្រុមគ្រូពេទ្យស្ម័គ្រចិត្តនៃសមាគមSOS Cambodian Kids និងសមាគម S C.K.L’association មកពីប្រទេសបារាំង ដែលបានចុះពិនិត្យព្យាបាលជំងឺដោយឥតគិតថ្លៃរួច ជូនប្រជាពលរដ្ឋកម្ពុជាប្រមាណជាង១៦០០នាក់ នៅមូលដ្ឋាន ស្រុកចន្ទ្រា និងក្រុងបាវិត ខេត្តស្វាយរៀងមានរយៈពេល៤សប្ដាហ៍មក ដោយជំនួបសម្ដែងការគួរសមនេះបានប្រព្រឹត្ដទៅ កាលពីរសៀលថ្ងៃទី១២ ខែសីហា ឆ្នាំ២០២៥ នៅទីស្នាក់ការអាជ្ញាធរមីន។

ការចុះពិនិត្យព្យាបាលរបស់ក្រុមគ្រូពេទ្យស្ម័គ្រចិត្តមកពីប្រទេសបារាំង ក៏មានការផ្តល់វ៉ែនតាដល់ចាស់ជរា រទេះរុញ ថ្នាំពេទ្យ និងផ្តល់ប្រឹក្សាយោបល់ដល់អ្នកជំងឺ ដែលសកម្មភាពបែបនេះបានធ្វើឡើងជារៀងរាល់ឆ្នាំ ចាប់តាំងពីឆ្នាំ២០១៨ មករហូតដល់បច្ចុប្បន្ន។

ក្នុងជំនួបនោះ ឯកឧត្តមទេសរដ្ឋមន្រ្តី លី ធុជ ក៏បានអរគុណដល់លោកវេជ្ជបណ្ឌិត ឡោ គឹមសុង  អនុប្រធានសមាគម SOS Cambodian Kids និងលោកស្រី ឡោ វីឡា ប្រធានសមាគម S C. K.L’association រួមទាំងអ្នកជំនាញថែទាំសុខភាព និងនិស្សិតពេទ្យ ដែលបានចំណាយពេលវេលាជំនាញ ព្រមទាំងធនធានផ្ទាល់ខ្លួនចុះពិនិត្យ និងព្យាបាលជំងឺជូនប្រជាពលរដ្ឋដោយឥតគិតថ្លៃ និងប្រកបដោយការយកចិត្តទុកដាក់ខ្ពស់អស់រយៈពេល៤សប្តាហ៍ ដើម្បីបម្រើប្រជាជនកម្ពុជា។

ឯកឧត្តមទេសរដ្ឋមន្រ្តីបានអរគុណចំពោះក្រុមគ្រួពេទ្យស្មគ្រ័ចិត្ដបារាំង ដែលបានយកចិត្ដទុកដាក់ ក្នុងការពិនិត្យព្យាបាលជំងឺជូនដល់ប្រជាពលរដ្ឋកម្ពុជា ដែលការព្យាបាលនេះមិនត្រឹមតែព្យាបាលជំងឺឱ្យជាសះស្បើយរាងកាយប៉ុណ្ណោះទេ តែថែមទាំងជាការស្តារឡើងវិញនូវក្តីសង្ឃឹម និងសេចក្តីថ្លៃថ្នូររបស់ប្រជាពលរដ្ឋផងដែរ។

សូមបញ្ជាក់ថា ក្រុមគ្រូពេទ្យស្ម័គ្រចិត្តមកពីប្រទេសបារាំងគិតចាប់តាំងពី២០១៨ រហូតមកបច្ចុប្បន្ន សកម្មភាពមនុស្សធម៌ ចុះពិនិត្យ និងព្យាបាលជំងឺជូនពលរដ្ឋទីទ័លក្រនៅមូលដ្ឋានជនបទដាច់ស្រយាល បានចំនួនប្រមាណជាង១៥៨លើក នៅខេត្ដក្រចេះ មណ្ឌលគិរី ព្រៃវែង និងស្វាយរៀង៕

ដោយ សួស សំរិត