AKP កំពង់ធំ ថ្ងៃទី១៣ ខែសីហា ឆ្នាំ២០២៥-- លោក សាយ គឹមឡម អភិបាលស្រុកស្ទោង និងសហការីបានអញ្ជើញសំណេះសំណាលសួរសុខទុក្ខយុទ្ធជនសមរភូមិមុខដែលកំពុងសម្រាកព្យាបាលជំងឺនៅមន្ទីរពេទ្យបង្អែកស្រុកស្ទោង កាលពីល្ងាចថ្ងៃទី១២ ខែសីហា ឆ្នាំ២០២៥ក្រោយប្រយុទ្ធយ៉ាងស្វិតស្វាញដើម្បីការពារដែនអធិបតេយ្យភាពជាតិ បូរណភាពទឹកដី និងទប់ទល់មហិច្ឆតាឈ្លានពានរបស់ទាហានថៃចំពោះកម្ពុជា។ 

ក្នុងឱកាសនោះ លោក សាយ គឹមឡម អភិបាលស្រុកស្ទោង បានពាំនាំនូវការផ្តាំផ្ញើរសួរសុខទុក្ខពីសំណាក់ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ ដែលឯកឧត្តមតែងតែយកចិត្តទុក្ខដាក់ជាមួយប្រជាពលរដ្ឋ ពលករ ជនភៀសសឹក ជាពិសេសយុទ្ធជនដែលបានលះបង់កម្លាំងកាយចិត្ត ប្តូរជីវិតដើម្បីបុព្វហេតុជាតិមាតុភូមិ។

លោក សាយ គឹមឡម បានថ្លែងអំណរគុណយ៉ាងជ្រាលជ្រៅចំពោះលោកពលបាលទោ ឈិន ពិសិដ្ឋ ជាពលទាហាននៃកងពលធំអន្តរាគមន៍លេខ៣ ឈរជើងនៅទិសតំបន់មុំបី និងលោកពលបាលត្រី វ៉ាត បូរ៉ាត់ ជាពលទាហាននៃកងពលធំអន្តរាគមន៍លេខ២ ឈរជើងការពារប្រាសាទតាក្របី ដែលបានលះបង់ញើសឈាម ប្តូរផ្តាច់ការពារទឹកដីឱ្យខាងតែបាន។ ក្នុងនាមលោក និងសហការី ក៏ដូចជាប្រជាជនខ្មែរទាំងអស់ជាយុទ្ធជននៅសមរភូមិក្រោយមានតួនាទីគាំទ្រនិងជ្រោមជ្រែងដល់យុទ្ធជនសមរភូមិមុខទៅតាមអ្វីដែលអាចធ្វើបានដើម្បីលើកទឹកចិត្តដល់កងទ័ពខ្មែរក្នុងការបណ្ដេញខ្មាំងឈ្លានពាន។

ជាមួយគ្នានេះដែរ លោកអភិបាលស្រុកស្ទោងបានអំពាវនាវដល់ប្រជាពលរដ្ឋទាំងអស់ឱ្យជឿជាក់លើរាជរដ្ឋាភិបាលក្នុងការដោះស្រាយវិវាទព្រំដែន ក្រោមការដឹកនាំដ៏ប៉ិនប្រសព្វរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជណាចក្រកម្ពុជា និងមានសម្តេចអគ្គមហាសេនាបតីតេជោ ហ៊ុន សែន ជាអគ្គភស្តុភារជាន់ខ្ពស់សម្រាប់ទំនុកបម្រុងដល់កងទ័ពនាគរាជកម្ពុជា។

សូមបញ្ជាក់ថា លោក សាយ គឹមឡម បានឧបត្ថម្ភដល់យុទ្ធជន ឈិន ពិសិដ្ឋ និងវ៉ាត បូរ៉ាត់ នូវ អង្ករ៥០គីឡូក្រាម ទឹកសុទ្ធ ភេសជ្ជៈនិងថវិកាចំនួន៤៥ម៉ឺនរៀល៕

ដោយ ស៊ុម វណ្ណា