AKP ភ្នំពេញ ថ្ងៃទី១២ ខែសីហា ឆ្នាំ២០២៥--ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍និងទូរគមនាគមន៍ (ក.ប.ទ.) នៅថ្ងៃទី១២ ខែសីហា ឆ្នាំ២០២៥ បានអញ្ជើញជាអធិបតីក្នុងសិក្ខាសាលាពិនិត្យស៊ីជម្រៅលើ “សេចក្តីព្រាងគោលនយោបាយអភិបាលកិច្ចទិន្នន័យ” នៅសណ្ឋាគារ Sun and Moon Riverside ដោយមានការអញ្ជើញចូលរួមពីឯកឧត្តម លោកជំទាវ លោក លោកស្រី ជាថ្នាក់ដឹកនាំនិងអ្នកជំនាញផ្នែកអភិបាលកិច្ចទិន្នន័យនៃ ក.ប.ទ. ប្រមាណចំនួន ៦០ រូប។

ថ្លែងនៅក្នុងឱកាសនេះ ឯកឧត្តមរដ្ឋលេខាធិការ សុខ ពុទ្ធិវុធ បានមានប្រសាសន៍ថា សិក្ខាសាលានេះ រៀបចំឡើងក្នុងគោលបំណងសំខាន់ៗចំនួន ៣ ទី១ ធានាបាននូវការយល់ស្របរួមលើខ្លឹមសារនៃសេចក្តីព្រាងមុននឹងឈានទៅរកការពិភាក្សាប្រមូលធាតុចូលពីបណ្តាក្រសួងស្ថាប័នជាបន្តបន្ទាប់ ទី២ ពិភាក្សាស៊ីជម្រៅលើផែនការសកម្មភាពនីមួយៗក្នុងចំណោមមន្រ្តីជំនាញដើម្បីស្វែងយល់អំពីភាពអាចទៅរួចនិងការអនុវត្តជាក់ស្តែងនៃគោលនយោបាយនេះ និង ទី៣ ផ្តល់នូវធាតុចូលសំខាន់ៗពីមន្រ្តីជំនាញដើម្បីរួមចំណែករៀបចំទិសដៅនៃការអនុវត្តផែនការសកម្មភាពគាំទ្រគោលនយោបាយនាពេលខាងមុខ។

 ឯកឧត្តមរដ្ឋលេខាធិការ បានសង្កត់ធ្ងន់ លើការចាត់ទុកទិន្នន័យជាទ្រព្យសកម្មជាតិ ដែលជាមូលដ្ឋានគ្រឹះយ៉ាងសំខាន់សម្រាប់ការអភិវឌ្ឍសេដ្ឋកិច្ចនិងសង្គម ស្របទៅនឹងយុទ្ធសាស្ត្រចតុកោណដំណាក់កាលទី១ និងគោលនយោបាយរដ្ឋាភិបាលឌីជីថល ២០២២-២០៣៥។

សូមជម្រាបជូនថា ដើម្បីប្រមូលធាតុចូលសម្រាប់បំពេញបន្ថែមលើខ្លឹមសារសេចក្តីព្រាងគោលនយោបាយអភិបាលកិច្ចទិន្នន័យឱ្យកាន់តែក្បោះក្បាយ សិក្ខាសាលាបានបែងចែកជាកិច្ចពិភាក្សាចំនួន ៤វគ្គ សម្រាប់៤ ប្រធានបទគឺ ការកសាងអភិបាលកិច្ចទិន្នន័យ ការរៀបចំការគ្រប់គ្រងទិន្នន័យ ការជំរុញឱ្យមានការបើកចំហទិន្នន័យ និងការជំរុញឱ្យមានប្រព័ន្ធអេកូឡូស៊ីទិន្នន័យ។ កិច្ចពិភាក្សានេះប្រព្រឹត្តទៅយ៉ាងរលូននិងផុសផុល ដែលមានសារៈសំខាន់ដល់ថ្នាក់ដឹកនាំ និងអ្នកជំនាញក្នុងការស្វែងយល់ ផ្តល់យោបល់ និងកែសម្រួលសេចក្តីព្រាងគោលនយោបាយនេះឱ្យកាន់តែមានអត្ថន័យ អាចអនុវត្តបាន និងមានប្រសិទ្ធភាពតាមទិសដៅជាក់លាក់ និងសមស្របនឹងស្ថានភាពជាក់ស្តែងនៃសង្គមកម្ពុជា៕

ដោយ៖ ណយ នឿន (ប្រភព៖ក្រសួងប្រៃសណីយ៍)