AKP ភ្នំពេញ ថ្ងៃទី១២ ខែសីហា ឆ្នាំ២០២៥-- ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប ឯកឧត្តម ហ៊ែល តូនី អនុប្រធានក្តាប់រួម អាជ្ញាធរទន្លេសាបនៅសាលប្រជុំអាជ្ញាធរទន្លេសាប នាថ្ងៃទី១១ ខែសីហា ឆ្នាំ២០២៥ បានអញ្ជើញដឹកនាំកិច្ចប្រជុំពិភាក្សាលើការជ្រើសរើសទីតាំងដំឡើងស្ថានីយស្វ័យប្រវត្តិជលសាស្រ្ត ឧតុនិយម និងគុណភាពទឹកនៅតំបន់ទន្លេសាប។

ឯកឧត្តម ហ៊ែល តូនី បានលើកឡើងថា អាជ្ញាធរទន្លេសាប ដោយមានកិច្ចសហប្រតិបត្តិការជាមួយភាគីវិទ្យាស្ថានស្រាវជ្រាវជលសាស្រ្ត និងឧតុនិយមនៃសាធារណរដ្ឋប្រជាមានិតចិន ដើម្បីបន្តធ្វើការសិក្សាស្រាវជ្រាវរួមគ្នាជាមួយអាជ្ញាធរទន្លេសាប ហើយកិច្ចប្រជុំនេះមានគោលបំណងពិនិត្យលើស្ថានភាពភូមិសាស្ត្រតំបន់អាងទន្លេសាប ក្នុងការដំឡើងស្ថានីយថ្មីៗបន្ថែមទៀតតាមតម្រូវការជាក់ស្តែង បន្ថែមពីលើស្ថានីយដែលមានស្រាប់ចំនួន១១ទីតាំង និងទទួលធាតុចូលពីអង្គភាពជំនាញពាក់ព័ន្ធក្នុងសិក្សាលើកសំណើគម្រោងជូនភាគីចិន ពិនិត្យ ពិភាក្សា និងអនុម័តគម្រោងរួមគ្នា។

ក្នុងកិច្ចប្រជុំនោះ ក៏មានការអញ្ជើញចូលរួមពីឯកឧត្តមអគ្គលេខាធិការ អគ្គលេខាធិការរង ប្រធាននាយកដ្ឋាននៃអាជ្ញាធរទន្លេសាប មន្រ្តីបច្ចេកទេសតំណាងនាយកដ្ឋានជលសាស្ត្រ និងការងារទន្លេ នាយកដ្ឋានឧតុនិយមនៃក្រសួងធនធានទឹក និងឧតុនិយម តំណាងមន្ទីរធនធានទឹក និងឧតុនិយមខេត្តទាំង៦ ជុំវិញតំបន់ទន្លេសាប ព្រមទាំងមន្ត្រីបច្ចេកទេសអគ្គលេខាធិការដ្ឋាននៃអាជ្ញាធរទន្លេសាប៕

ដោយ ណយ នឿន (ប្រភព៖ អាជ្ញាធរទន្លេសាប)