AKP ភ្នំពេញ ថ្ងៃទី១១ ខែសីហា ឆ្នាំ២០២៥--

រដ្ឋសភានៃព្រះរាជាណាចក្រកម្ពុជា សម្តែងនូវការខកចិត្តយ៉ាងខ្លាំង ចំពោះការប្រកាសគាំទ្ររបស់ ឯកឧត្តម វ៉ាន់មូហាម៉ាត់ ណ័រ មៈថា ប្រធានសភាតំណាងរាស្ត្រ និងជាប្រធានរដ្ឋសភាថៃ ចំពោះ លោកឧត្តមសេនីយ៍ឯក ប៊ុនស៊ីន ផាត់ឃ្លាំង មេបញ្ជាការយោធភូមិភាគទី២ដែលមានបំណងវាយដណ្តើមយកទឹកដីកម្ពុជា។

យោងតាមសេចក្តីថ្លែងការណ៍ រដ្ឋសភានៃព្រះរាជាណាចក្រកម្ពុជា នៅថ្ងៃទី១១ ខែសីហា ឆ្នាំ២០២៥បានសម្តែងនូវការខកចិត្តយ៉ាងខ្លាំង ចំពោះការប្រកាសគាំទ្ររបស់ ឯកឧត្តម វ៉ាន់មូហាម៉ាត់ ណ័រ មៈថា ប្រធានសភាតំណាងរាស្ត្រ និងជាប្រធានរដ្ឋសភាថៃ ចំពោះ លោកឧត្តមសេនីយ៍ឯក ប៊ុនស៊ីន ផាត់ឃ្លាំង មេបញ្ជាការយោធភូមិភាគទី២ របស់ថៃ ដែលបានចុះផ្សាយជាភាសាថៃនៅក្នុងគេហទំព័រ រដ្ឋសភានៃព្រះរាជាណាចក្រថៃ និងកាសែត The Nation កាលពីថ្ងៃទី១០ ខែសីហា ឆ្នាំ២០២៥ កន្លងទៅ ដែល លោកឧត្តមសេនីយ៍ឯក ប៊ុនស៊ីន ផាត់ឃ្លាំង បានប្រកាសពីផែនការមុនចូលនិវត្តន៍របស់ខ្លួន ដែលនៅសល់ ៥១ ថ្ងៃ ទៀត ដោយ ៖ ទី១) ដណ្តើមកាន់កាប់ប្រាសាទតាក្របី ពីការគ្រប់គ្រងដោយស្របច្បាប់របស់កម្ពុជា និង ទី២) ប្រកាសបិទប្រាសាទតាមាន់ធំដែលស្ថិតក្នុងដែនអធិបតេយ្យ និងបូរណភាពទឹកដីកម្ពុជា។

រដ្ឋសភាបានចាត់ទុក ការប្រកាសនេះជា ភស្តុតាងជាក់ស្តែង និងមិនអាចប្រកែកបាន បញ្ជាក់ពីការបង្កហេតុ និងជាការប៉ុនប៉ងឈ្លានពានទឹកដីកម្ពុជា ដោយចេតនា និងដោយគិតទុកជាមុន។

រដ្ឋសភានៃព្រះរាជាណាចក្រកម្ពុជា ចាត់ទុកការសម្តែងមតិគាំទ្ររបស់ ឯកឧត្តម វ៉ាន់មូហាម៉ាត់ ណ័រ មៈថា គឺជាការរំលោភបំពានយ៉ាងធ្ងន់ធ្ងរលើកិច្ចព្រមព្រៀងបទឈប់បាញ់ ហើយជាការលើកទឹកចិត្តដល់អំពើបង្កហេតុ របស់យោធាថៃ ទៅជាគោលនយោបាយដែលគាំទ្រដោយស្ថាប័ននីតិប្បញ្ញត្តិថៃ។ រដ្ឋសភានៃប្រទេសទាំងពីរដែល ជាស្ថាប័នតំណាងប្រជាពលរដ្ឋ គួរបង្ហាញការសាទរដល់ស្ថានភាពនៅព្រំដែនជាទូទៅដែលមានសភាពស្ងប់ស្ងាត់ ល្អ ហើយយើងគួរបន្តធ្វើឱ្យស្ថានភាពនេះរឹតតែប្រសើរឡើង ជាជាងការធ្វើទង្វើដែលបង្កការរាំងស្ទះដល់ការនាំមក វិញនូវសន្តិភាព ស្ថិរភាព និងប្រក្រតីភាពនៃទំនាក់ទំនងរវាងប្រទេសទាំងពីរ ដែលជាអ្វីមិនត្រឹមតែប្រជាជនកម្ពុជា ចង់បានប៉ុណ្ណោះទេ ប៉ុន្តែពិភពលោកទាំងមូលក៏ចង់ឃើញផងដែរ ដូចដែលបានស្តែងចេញតាមរយៈការសម្តែង ការអបអរសាទរ និងការគាំទ្រចំពោះកិច្ចព្រមព្រៀងបទឈប់បាញ់ និងលទ្ធផលជាវិជ្ជមាននៃកិច្ចប្រជុំវិសាមញ្ញ គណៈកម្មាធិការព្រំដែនទូទៅកម្ពុជា-ថៃជាដើម។

រដ្ឋសភាក៏បានចាត់ទុកការថ្លែងបែបនេះថាជាភស្តុតាង ដែលមិនអាចប្រកែកបាន នៃអំពើបង្កហេតុ និងការប៉ុនប៉ងដោយចេតនា គិតទុកជាមុន ក្នុងការឈ្លានពានអធិបតេយ្យភាព និងបូរណភាព ទឹកដីរបស់កម្ពុជា។ ទង្វើនេះគឺជាការរំលោភបំពានទាំងស្រុងទៅលើកិច្ចព្រមព្រៀងបទឈប់បាញ់ ដែលសម្រេច បាននៅក្នុងកិច្ចប្រជុំពិសេស កាលពីថ្ងៃទី២៨ ខែកក្កដា ឆ្នាំ២០២៥ និងស្មារតីនៃកិច្ចប្រជុំវិសាមញ្ញរបស់គណៈ កម្មាធិការព្រំដែនទូទៅ (GBC) ដែលបានប្រារព្ធធ្វើឡើងនាថ្ងៃទី៧ ខែសីហា ឆ្នាំ២០២៥។ បន្ថែមពីនេះ ការថ្លែង បែបនេះក៏ជាការរំលោភបំពានយ៉ាងធ្ងន់ធ្ងរលើធម្មនុញ្ញអាស៊ាន ធម្មនុញ្ញអង្គការសហប្រជាជាតិ និងសន្ធិសញ្ញា មិត្តភាព និងសហប្រតិបត្តិការនៅអាស៊ីអាគ្នេយ៍។

រដ្ឋសភានៃព្រះរាជាណាចក្រកម្ពុជា សូមអំពាវនាវដល់សហគមន៍អន្តរជាតិ ជាពិសេសប្រទេសដៃគូ ដែល បានខិតខំប្រឹងប្រែងជួយឱ្យសម្រេចបាននូវបទឈប់បាញ់ដ៏លំបាកមួយនេះ ដោយជួយជំរុញយ៉ាងម៉ឺងម៉ាត់ឱ្យភាគីថៃ គោរពកិច្ចព្រមព្រៀងបទឈប់បាញ់ ដោយមិនត្រឹមតែតាមរយៈពាក្យសម្តីប៉ុណ្ណោះទេ ប៉ុន្តែតាមរយៈសកម្មភាពជាក់ស្តែង ដោយបញ្ឈប់រាល់អំពើរំលោភបំពានទាំងឡាយ និងរុះរើបន្លាលួសដែលខ្លួនបានលួចដាក់ ចេញឱ្យអស់ជាបន្ទាន់ពីដែន អធិបតេយ្យរបស់កម្ពុជា។

រដ្ឋសភាក៏កម្ពុជា សូមថ្លែងអំណរគុណយ៉ាងជ្រាលជ្រៅចំពោះ ឯកឧត្តម អាន់វ៉ា អ៊ីប្រាហ៊ីម នាយករដ្ឋមន្ត្រីនៃប្រទេសម៉ាឡេស៊ី សម្រាប់ការផ្តួចផ្តើម សម្របសម្រួល និងធ្វើជាម្ចាស់ផ្ទះនៃកិច្ចប្រជុំសម្រុះសម្រួល រវាងកម្ពុជា-ថៃ និងសូមទទួលស្គាល់នូវតួនាទីគន្លឹះ ដែលបានដើរតួដោយសហរដ្ឋអាមេរិក និងសាធារណរដ្ឋ ប្រជាមានិតចិន ក៏ដូចជាការគាំទ្រដ៏ស្មោះស្ម័គ្រពីបណ្តារដ្ឋជាសមាជិកអាស៊ាន ដៃគូសន្ទនា និងប្រទេសជាមិត្តនានា ក្នុងតំបន់និងពិភពលោក។ ការលើកទឹកចិត្ត និងការចូលរួមរបស់បណ្តាប្រទេសទាំងអស់ គឺជាមធ្យោបាយដ៏ សំខាន់ ក្នុងការនាំមកនូវដំណោះស្រាយជាវិជ្ជមាន។ ជាពិសេស យើងខ្ញុំសូមកត់សម្គាល់ដោយការកោតសរសើរ នូវតួនាទីរបស់ ឯកឧត្តមប្រធានាធិបតី ដូណាល់ ត្រាំ នៅក្នុងកិច្ចខិតខំប្រឹងប្រែង ដែលប្តេជ្ញាចិត្តរួមគ្នា ចំពោះសន្តិភាព សន្តិសុខ និងកិច្ចសហប្រតិបត្តិការ ដើម្បីសុខសុវត្ថិភាព អាយុជីវិត និងជីវភាពប្រជាជនកម្ពុជា-ថៃ ក៏ដូចជាដើម្បីប្រក្រតីភាពក្នុងតំបន់ និងនៅក្នុងសហគមន៍អាស៊ានមួយប្រកបដោយស្ថិរភាព និងវិបុលភាព។

រដ្ឋសភានៃព្រះរាជាណាចក្រកម្ពុជា សូមបញ្ជាក់ពីជំហរដ៏មុតមាំរបស់កម្ពុជាគឺ ស្រឡាញ់សន្តិភាព ការពារសន្តិភាព និងធ្វើជាមិត្តជាមួយគ្រប់បណ្តាប្រទេសក្នុងតំបន់ និងលើសកលលោក។ កម្ពុជាក៏កំពុងធ្វើការ យ៉ាងសកម្ម ដើម្បីលើកកម្ពស់សន្តិភាពតាមរយៈគំនិតផ្តួចផ្តើមនានា ដូចជាធម្មនុញ្ញសន្តិភាពសកល ដែលបាន ផ្តួចផ្តើមឡើងដោយ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ដើម្បីលើកកម្ពស់ កិច្ចសន្ទនាប្រកបដោយបរិយាបន្ន កសាងទំនុកចិត្ត ការយល់ដឹងពីគ្នាទៅវិញទៅមក និងកិច្ចសហប្រតិបត្តិការ សកលសម្រាប់សន្តិភាព និងវិបុលភាពរួម៕

ដោយ៖ ប៊ុនរិទ្ធ